مصر تانية تحت الأرض حقيقة ولا اسطورة -

مصر تانية تحت الأرض حقيقة ولا اسطورة
قبل ما نبدأ، عايزاك تاخد نفس... وتغمض عنيك شوية. تخيل إنك ماشي دلوقتي في وسط البلد، بتعدي من عند طلعت حرب، الناس رايحة جاية، الكلاكسات شغالة، وكل حاجة ماشية عادي... بس تحت رجليك، فيه عالم تاني.
آه والله… تحت الشوارع اللي بنمشي عليها كل يوم، فيه أسرار، فيه تاريخ، فيه حضارات، وفيه حاجات لحد النهاردة العلماء مش قادرين يفسروها.
هل فعلاً في "مصر تانية تحت الأرض"؟ ولا دي خرافات وأفلام؟ ولا يمكن الحقيقة أغرب من الخيال؟
تعالى نحفر سوا. ...... انا .............
نبدأ من أول حتة في السؤال ده… هل فعلاً فيه أنفاق أو مدن تحت الأرض في مصر؟ ولا إحنا بس بنبالغ؟ خليني أقولك على قصة.
في سنة 2017، كانوا بيحفروا في المطرية عشان مشروع مجاري… عادي خالص. وفجأة، لقوا تمثال ضخم جدًا مدفون تحت الأرض. التمثال ده طلع لرمسيس التاني، وكان مدفون في حتة جنب بيت عادي وسط الناس. يعني ببساطة، البيت كان فوق كنز تاريخي.
وده مش أول ولا آخر مرة.
فيه أماكن كتير في مصر الناس ساكنة فوق آثار، وآثار تقيلة كمان. في الأقصر مثلًا، في منطقة اسمها "دير المدينة"، فيه قرية كاملة مبنية فوق مقابر العمال اللي بنوا مقابر الملوك نفسهم
يعني الناس دلوقتي بتطبخ وتغسل فوق قبور ناس ماتوا من آلاف السنين.
بس الكلام ما وقفش عند كده.
في سنة 1997، مجموعة من الباحثين كانوا بيشتغلوا في محيط الهرم الأكبر. ووقتها، ظهرت نظرية غريبة شوية، بتقول إن في غرفة سرية تحت "أبو الهول".
الغرفة دي مش أي كلام… دي غرفة متغطية بالرمل بقالها آلاف السنين، ومش معروف فيها إيه، ولا مين دفنها، ولا ليه محدش قرب منها قبل كده. والمثير إن فيه أجهزة تصوير حراري فعلاً سجلت وجود فراغات تحت الأرض في المكان ده.

الفراغات دي كانت بتسخن وتبرد بشكل مختلف عن بقية الأرض. يعني فيه حاجة تحت… بس إيه هي؟ محدش يعرف.

ونرجع للماضي شوية.

المؤرخ الإغريقي هيرودوت، اللي زار مصر من أكتر من 2500 سنة، كتب عن وجود شبكة من الأنفاق تحت الأرض بتربط بين المعابد وبعضها. وقال إن الكهنة كانوا بيتحركوا من معبد للتاني من تحت الأرض.

كلامه اتقال عليه زمان إنه مبالغة، لكن الحفريات اللي اتعملت في معبد الكرنك ومعبد الأقصر أظهرت فعلاً وجود ممرات حجرية تحت الأرض، لحد النهاردة مش معروف نهايتها فين.

طيب خليني أحكي لك عن حاجة غريبة جدًا حصلت في السبعينات.

في منطقة اسمها "تونا الجبل" في المنيا، فيه سرداب ضخم جدًا تحت الأرض اسمه "الكاتاكومب"، السرداب ده طوله كيلومترات، ومليان تماثيل ومومياوات لطيور وحيوانات، مش بس بشر.

اللي غريب بقى… إن فيه أجزاء من السرداب ده لحد النهاردة محدش قدر يدخلها، لأن التهوية فيها معدومة، وبعض العمال لما حاولوا يدخلوا، فقدوا الوعي من قلة الأكسجين.

طب هل الموضوع بس في الصعيد؟ لأ، تعالى نرجع تاني للقاهرة.

في ناس كتير من سكان منطقة مصر القديمة، دايمًا بيتكلموا عن "أماكن محظورة" أو "فتحات في الأرض" مقفولة من أيام جدودهم، وكان الأهالي بيقولوا إنهم بيسمعوا أصوات غريبة أو بيلاقوا حيوانات بتختفي جواها.

في قصة انتشرت سنة 2003 عن بيت قديم اتفتح أساسه عشان ترميم، ولقوا تحته نفق بيودي لبئر قديم جداً، ومنه سلم حجري نازل لمكان محدش يعرفه… ومجرد ما دخلت لجنة من الآثار، تم إغلاق المكان بالكامل.

نخش على نقطة مهمة: ليه فيه أماكن كده مش بيتم الكشف عنها بالكامل؟

بعض الباحثين بيقولوا إن فيه أماكن تحت الأرض اتقفلت بقرار من الدولة، لحمايتها من السرقة أو العبث. لكن في ناس تانية مؤمنة إن فيه حاجات "أكبر بكتير" من آثار.

فيه واحدة من أغرب القصص اللي اتقالت، إن فيه نفق تحت الأهرامات بيربط الهرم الأكبر بمعبد في الفيوم! النظرية دي ناس كتير استبعدتها، لكن في سنة 2010، تم اكتشاف مجرى مائي قديم جدًا في منطقة هضبة الجيزة، واللي بيوصل لمجرى أقدم في اتجاه الجنوب… هل ده دليل؟ ولا صدفة؟

خليني أقولك كمان إن علماء آثار من ألمانيا وإيطاليا حاولوا يحصلوا على تصاريح علشان يكشفوا عن الأماكن دي، وتم رفضهم أكتر من مرة… وده بيزود الشكوك.

فيه شخص اسمه زاهي حواس، كلنا عارفينه، قال في تصريحات زمان إن "مافيش حاجة اسمها غرفة تحت أبو الهول"… بس في 2020، نفس الدكتور قال إن فيه فراغات فعلاً تحت الصرح، لكنهم مش عايزين يستعجلوا في الحفر علشان يحافظوا على التوازن.

وده خلّى الناس تسأل: إيه اللي تحت الأرض في مصر ومش عايزيننا نعرفه؟

طب نوسع الدائرة أكتر… هل في عواصم فرعونية اختفت؟

فيه مدينة اسمها "أون" أو "هليوبوليس"، دي كانت العاصمة الدينية لمصر القديمة، والمكان اللي فيه أكبر معابد الشمس. المدينة دي النهارده مابتظهرش في الجولات السياحية، لأنها تحت حي المطرية.

يعني الناس ساكنة فوقها عادي… وأي تنقيب هناك بيبقى معقد جدًا.

ومن القصص المدهشة كمان، قصة مدينة هيراكليون. دي مدينة كانت مغمورة بالكامل تحت البحر المتوسط، ولحد سنة 2000 ماكنش حد يصدق إنها موجودة.

بس فجأة، تم اكتشافها بالكامل تحت الميه… مدينة كاملة بتماثيل ومعابد وموانئ، كانت الناس فاكرة إنها أسطورة، وطلعت حقيقية.

فلو مدينة كاملة اختفت كده، ممكن نصدق إن فيه حاجات تانية مستخبية تحت الأرض.

ودي كانت القصة… وما فيها
#مصر_تحت_الأرض #أسرار_الآثار #حنان_عبد_المجيد #دوائر_ساخنة #أبو_الهول #هرم_خوفو #مدن_مدفونة #حضارات_غامضة #أنفاق_سرية #مصر_الفرعونية #تاريخ_غامض #الآثار_المصرية