مدحة بواليهو مدحو راويهو للراوي ود مصطفى

بواليهو ومدحو راويهو
محمد قلبي غاويهو


عبيدك ربي نجيهو
بعين اللطف راعيهو
نظف قلبه نقيهو
بكاس الحب أسقيهو
قربهو وادنيهو

ياهادي الضالة أهديهو
وكف كيد المعاديهو
طويل الحزن سليهو
برؤية المصطفى نبيهو
يصابحهو وماسيهو

ثنيت بى من أتى ليهو
البعير الضر يشكيهو
في يوم الخوف ينجيهو
كذا المرقوب يعافيهو
حميم النار يطفيهو

وضع صافى ومصفيهو
نور من نور مباديهو
الكون أطرافه واسطيهو
بسر السر مناديهو
قد طاب وطاب من فيهو

نبياً ربه عاطيهو
زمام الكون بأيديهو
جميع الحسن حاويهو
طراز الملك ضاويهو
سماواتو وأراضيهو

فريدا غز ثانيهو
له السبعه المثانيهو
أتى جبريل وثانيهو
نظف قلبه ماليهو
حكم وايمان محشيهو

تواضعه وحلمه ناشيهو
صفوح يحلب مواشيهو
ضعيف القوم يراشيهو
الهزل عطلان يماشيهو
كذا المسكين يهاشيهو

الفتح والنون مدح فيهو
الضحى والشرح تكفيهو
نبيا ربه حابيهو
راه من غير تشابيهو
جمع كل الفضل فيهو

بى مسو الضرع در ليهو
شفى المسقوم يداويهو
فى الحر الغيم يظل ليهو
دعا الأشجار سعت ليهو
من فرقو الجذع يبكيهو

نسيما من نواحيهو
رياح طيبة أم نخيل فيهو
شذا الفردوس محشيهو
اريت قبرا ترب فيهو
بروحى ووالدي ادأفديهو

عبيدا ذنبو ماليهو
وفعل الخير مجافيهو
ولد مصطفى جار بيهو
لان الماحي ماحيهو
عسى تشكر مساعيهو

صلاة الله تحييهو
بِعد من من طاف بواديهو
توازن الكون بما فيهو
تواليهو وتراضيهو
بها ينادي مناديهو