សង្ខេបព័ត៌មានជាតិសំខាន់ៗ ប្រចាំថ្ងៃទី១៧ ខែវិច្ឆិកា ឆ្នាំ២០២៥

---
១. អ្នកនាំពាក្យរងក្រសួងមហាផ្ទៃកម្ពុជា លោកបណ្ឌិត ទូច សុឃៈ នារសៀលថ្ងៃចន្ទនេះ បានគូសបញ្ជាក់ថា ពិតជាមានករណីក្រុមទាហានថៃ ៧នាក់ រំលោភបំពានលើយុវតីខ្មែរ កាលពីយប់ថ្ងៃទី១៥ ខែវិច្ឆិកា ឆ្នាំ២០២៥ ពេលដែលនាង និងក្រុមពលករខ្មែរ ធ្វើដំណើរវិលត្រឡប់មកកម្ពុជាវិញ។ តាមលោក ទូច សុឃៈ បច្ចុប្បន្ន សមត្ថកិច្ចកម្ពុជាកំពុងរៀបចំចំណាត់ការបន្ទាន់ ដើម្បីដាក់ពាក្យបណ្ដឹងទៅកាន់ ស្ថាប័នចំនួន ៣ ដែលរួមមាន ស្នងការដ្ឋាននគរបាលជាតិថៃ, ស្ថានទូតថៃ និងអង្គការអន្តរជាតិដើម្បីឱ្យភាគីថៃចាប់ខ្លួនទាហានថៃទាំង ៧នាក់ ដែលប្រព្រឹត្តិទង្វើអមនុស្សធម៌មកទទួលទោស។ ជាមួយគ្នានេះ ឯកឧត្ដមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃកម្ពុជា ក៏បានចាត់ទុកថាទង្វើដែលក្រុមទាហានថៃ បានធ្វើមកលើយុវតីកម្ពុជា គឺជាអំពើស្មោកគ្រោក។ បន្ថែមពីនេះ ឯកឧត្ដម ក៏បានអំពាវនាវដល់ពលរដ្ឋខ្មែរនៅប្រទេសថៃ សូមធ្វើដំណើរជាក្រុមពេលធ្វើដំណើរត្រឡប់កម្ពុជាវិញ និងត្រូវរាយការណ៍ពីភាពមិនប្រក្រតីផ្សេងៗ ទៅអាជ្ញាធរមូលដ្ឋានកម្ពុជា។
ប្រភព៖ ក្រសួងមហាផ្ទៃកម្ពុជា (  / 1bmvdciscz  )

២. សម្ដេចតេជោ ហ៊ុន សែន ប្រធានព្រឹទ្ធសភាកម្ពុជា នៅព្រឹកថ្ងៃទី១៧ ខែវិច្ឆិកា បានលើកឡើងថា សម្ដេចទទួលស្គាល់ពីភាពចន្លោះប្រហោងនាពេលកន្លងមក ដែលមិនបានបំពាក់អាវក្រោះ ឬអាវសុវត្ថិភាព ជូនដល់កងទ័ព។ ប៉ុន្តែគិតមកដល់ពេលនេះ, កងទ័ពកម្ពុជា គឺត្រូវបានបំពាក់ដោយគ្រឿងសុវត្ថិភាពបានលើសពីគ្រប់គ្រាន់ហើយ ដែលនេះជាផ្នែកមួយនៃយុទ្ធសាស្រ្តកងទ័ពដែលត្រូវបានធ្វើដោយស្ងាត់ស្ងៀម។ បន្ថែមពីនេះ ក្នុងនាមជាអគ្គភស្តុភារកំពូលកងយោធពលខេមរភូមិន្ទ, សម្ដេចបានបង្ហើបថា បន្តិចទៀត សម្ដេចក៏នឹងមានម៉ាកឈ្មោះថា DSS សម្រាប់ផ្គត់ផ្គង់ដល់កងទ័ពក្នុងស្រុក ក៏ដូចជានាំចេញទៅក្រៅប្រទេសផងដែរ៕
ប្រភព៖ សម្ដេចតេជោ (  / 19ksv73c9g  )

៣. នៅក្នុងពិធីបើកអនុសំវច្ឆរមហាសន្និបាទមន្ត្រីសង្ឃទូទាំងប្រទេស នាថ្ងៃចន្ទទី១៧ ខែវិច្ឆិកានេះ ប្រធានព្រឹទ្ធសភាកម្ពុជា សម្ដេចតេជោ ហ៊ុន សែន បានព្រមានប្រើធម៌ក្តៅលើពលរដ្ឋប្រើប្រាស់បណ្តាញសង្គម ដែលហ៊ាននិយាយប៉ះពាល់ដល់សន្តិសុខជាតិ។ បើតាមសម្ដេចតេជោ ការចូលទៅបញ្ចេញមតិ ឬ Comment ប៉ះពាល់ដល់សន្តិសុខជាតិ ក្នុងពេលកម្ពុជាមានជម្លោះជាមួយថៃគឺ មិនអាចអត់ឱនឱ្យបាន និងថា សូម្បីតែនាយករដ្ឋមន្ត្រីក៏មិនអាចលូកដៃបានដែរ។ ការព្រមានបែបនេះ ត្រូវបានសម្ដេចតេជោ បញ្ជាក់ថា មិនមែនជាអំពើផ្តាច់ការទេ តែជាការប្រឆាំងនឹងអំពើញុះញង់, អំពើក្បត់ជាតិ និងបង្អាក់ទឹកចិត្តកងទ័ពខ្មែរ។ សូមជម្រាបផងដែរថា ការលើកឡើងរបស់សម្ដេចតេជោយ៉ាងដូច្នេះ គឺជាការឆ្លើយតបនឹងការរិះគន់ថាមានការដោះដីតាមព្រំដែនរវាងប្រទេសកម្ពុជា និងថៃ។
ប្រភព៖ សម្ដេចតេជោ (  / 19ksv73c9g  )

៤. កិច្ចប្រជុំក្រុមបច្ចេកទេសចម្រុះលើការអនុវត្តបែបបទបច្ចេកទេស (Technical Instruction) សម្រាប់ការបោះបង្គោលព្រំដែនបណ្ដោះអាសន្ននៅតំបន់ភូមិព្រៃចាន់ និង ជោគជ័យ ត្រូវបានពន្យារពេលមួយថ្ងៃ ដោយសារភាគីថៃទើបតែបានបញ្ជូនកំណត់ទូតមកកម្ពុជានៅថ្ងៃទី១៧ វិច្ឆិកានេះ។ តាមមន្ត្រីជាន់ខ្ពស់នៃរដ្ឋលេខាធិការដ្ឋានកិច្ចការព្រំដែនកម្ពុជា ការពន្យារពេលកិច្ចប្រជុំរបស់ក្រុមបច្ចេកទេសចម្រុះលើការអនុវត្តបែបបទបច្ចេកទេស (Technical Instruction) ក្នុងការបោះបង្គោលបណ្តោះអាសន្ននៅចន្លោះបង្គោលព្រំដែនលេខ ៤២ ដល់ ៤៧ ដែលគ្រោងធ្វើឡើងនៅកម្ពុជា ត្រូវបានពន្យារពេល ប៉ុន្តែ ការពន្យារពេលមិនមែនជាកំហុសរបស់ភាគីកម្ពុជាទេ។ សូមជម្រាបផងដែរថា កិច្ចប្រជុំបច្ចេកទេសនេះនឹងត្រូវធ្វើឡើងនៅថ្ងៃទី១៨ ខែវិច្ឆិកា ឆ្នាំ២០២៥ ជំនួសវិញ។
ប្រភព៖ ភ្នំពេញប៉ុស្ដិ៍ (https://www.postkhmer.com/national/20...)

៥. ចៅក្រម២២រូប និងព្រះរាជអាជ្ញារង៣រូប ត្រូវបានឧត្តមក្រុមប្រឹក្សានៃអង្គចៅក្រមសម្រេចដាក់ទណ្ណកម្មខាងវិន័យ នៅក្នុងសម័យប្រជុំលើកទី៣៩ ដែលធ្វើឡើងនៅថ្ងៃទី១៧ ខែវិច្ឆិកានេះ។ យោងតាមសេចក្ដីប្រកាសព័ត៌មានរបស់អគ្គលេខាធិការដ្ឋាននៃឧត្តមក្រុមប្រឹក្សានៃអង្គចៅក្រម, ក្នុងចន្លោះសម័យប្រជុំឧត្តមក្រុមប្រឹក្សានៃអង្គចៅក្រម លើកទី៣៨ និង៣៩, មានព្រះរាជអាជ្ញា ២រូប ក៏ត្រូវបានដាក់វិន័យផងដែរ ក្នុងនោះ ព្រះរាជអាជ្ញាមួយរូបត្រូវបានសម្រេចបណ្ដេញចេញពីក្របខណ្ឌព្រះរាជអាជ្ញា ខណៈព្រះរាជអាជ្ញារង១រូបទៀត ត្រូវបានព្យួរពីការងារដោយមិនឱ្យមានបៀវត្សក្នុងរយៈពេល១ឆ្នាំ៕
ប្រភព៖ ឧត្តមក្រុមប្រឹក្សានៃអង្គចៅក្រម

Facebook:   / preah.khan.khmer  
Telegram: https://t.me/preah_khan
TikTok:   / preah_khan