23/10.2025 Վարդան Վիրաբյան

Ֆլեյտայի «աստվածները» կժամանեն Երևան․ «Yerevan International Flute Festival 2025»-ն է մեկնարկում
Հոկտեմբերի 26-30-ը Երևանը կրկին կհնչի ֆլեյտայի ձայնով․ կմեկնարկի «Yerevan International Flute Festival 2025»-ը։ «Ուրիշ նորություններում» փառատոնի հիմնադիր ու գեղարվեստական ղեկավար Վարդան Վիրաբյանը խոսել է այս տարվա միջոցառման առանձնահատկություններից, ընդարձակ աշխարհագրությունից։
Այս տարի 13 երկրներից ՀՀ կժամանեն աշխարհահռչակ ֆլեյտահարներ, դասախոսներ, ուսանողներ և երաժշտասեր հյուրեր։ Հյուրերի թվում կլինեն հայտնի ֆլեյտահարներ՝ Դենիս Լուպաչովը (Ռուսաստան), Երժան Կուշանովը, (Ղազախստան), Եվգենիա Շպալինգերը (Շվեյցարիա), Էլեն Վիրաբյանը Ռուսաստան Հայաստան, Նարեկ Ավագյանը (Հայաստան), Զառա Փարվանյանը ( Ռուսաստան), Դիմիտրի Ստավրիանիդին (Հունաստան, Վրաստան) և այլոք։
«Կարելի է ասել, Երևան կժամանեն ֆլեյտայի «աստվածները», - կատակում է Վիրաբյանը։
Այս տարի փառատոնի շրջանակներում տեղի կունենան 100 ից ավել վարպետաց դասեր, դասախոսություններ, ստեղծագործական հանդիպումներ Ռոմանոս Մելիքյանի անվան պետական երաժշտական քոլեջի և Առնո Բաբաջանյան համերգասրահի հարթակներում ։
Փառատոնի ընթացքում կկայանան երեք մեծ համերգներ։ Հոկտեմբերի 27 ին Արամ Խաչատրյան համերգասրահում՝ Հայաստանի Ազգային Ֆիլհարմոնիկ նվագախմբի մասնակցությամբ (գեղարվեստական ղեկավար և գլխավոր դիրիժոր Էդուարդ Թոփչյան), hոկտեմբերի 28 և 29 ՝ Առնո Բաբաջանյան համերգասրահում՝ «KV art անսամբլի» մասնակցությամբ (դիրիժոր՝ Նարեկ Ավագյան)։
«Այս իրադարձությամբ մեր փառատոնը փաստացի մտավ եվրոպական լավագույն փառատոնների շարքը։ Նման մակարդակի նվագախմբով բացման պատիվ ունեն միայն եզակի փառատոններ, ինչպես, օրինակ, Մարիինյան թատրոնը Սանկտ Պետերբուրգում», — ընդգծում է Վիրաբյանը։
Վարդան Վիրաբյանը նշում է, որ ֆլեյտայի միջազգային փառատոնը Երևանում ոչ միայն բարձրարվեստ իրադարձություն է, այլև կրթական հարթակ։ Այն հնարավորություն է տալիս մեր երիտասարդ երաժիշտներին շփվել աշխարհի լավագույնների հետ՝ առանց Հայաստանի սահմանները հատելու։
Статистики нет