Սուրեն Բաղդասարյանի արխիվը կպահվի Հանրային ռադիոյի Ոսկե ֆոնդում

Դեռևս «Արարատ 73․ Հայկական ֆուտբոլի ոսկեդարը» գրքի աշխատանքների ժամանակ ուսումնասիրելով ու վերծանելով Սուրեն Բաղդասարյանի արխիվը և հասկանալով այդ նյութերի պատմական արժեքը վերջինիս հետ որոշել էինք, որ այն չպետք է միայն մեզ մոտ լինի ու որ այն պետք է լինի հանրությանը հասանելի։

Որոշեցինք, որ այս արխիվը առաջին հերթին պետք է լինի այն կառույցում, որտեղից որ ծնունդ է առել, խոսքն իհարկե Հայաստանի Հանրային Ռադիոյի մասին է։ Դիմեցինք, ասացինք մեր մտադրության մասին և արժանանալով շատ ջերմ ու մտերմական վերաբերմունքի հասկացանք, որ շատ ճիշտ հասցեով ենք եկել։

Արխիվի փոխանցման միտքը մեկն է՝ հանրությանը հասանելի դարձնել մեր անցյալի պանծալի թիմի հաղթանակը վավերագրող աուդիո/ֆոտո ձայնագրություններն ու փաստաթղթերը, որոնք ոչ միայն վկայում, այլև հաստատում ու արձանագրում են «Արարատի» հաջողությունները։

Սուրեն Բաղդասարյանի արխիվը բազմազան է, այնտեղ կան «Արարատի» հաղթական 1973 թվականի առաջնության 10-ից ավելի խաղերի ռեպորտաժներ, նույն տարվա գավաթի եզրափակիչի ռեպորտաժի երկար տարբերակը, հայկական ֆուտբոլային մեկնաբանության դպրոցի հիմնադիր Լևոն Դանիելյանի ռեպորտաժները, Հայաստանի հավաքականի պաշտոնական առաջին հանդիպման ռեպորտաժը և այսպես շարունակ․․․

Այս ամենն արդեն պահվելու է Հանրային ռադիոյի ոսկե ֆոնդում, իսկ մոտ ժամանակներում հասանելի է լինելու բոլորին։

Միջոցառման երկրորդ հատվածում էլ Հանրային ռադիոյի նվիրյալների արահետում հանդիսավոր պայմաններում ավելացվեց մարզական մեկնաբան Սուրեն Բաղդասարյանի անունը։

Շնորհակալ եմ բոլոր նրանց, ովքեր օգնեցին մեզ կյանքի կոչել վերը նշված ցանկությունը և հավերժացրին պապիս անունը՝ Հանրային ռադիոյի բակում։

#ՍուրենԲաղդասարյան