Farhad Perbal xarebytan dakam - فەرهاد پیرباڵ غەریبیتان دەکەم

غەریبیتان دەکەم!
غەریبیی کۆڵانە قوڕاوییە تاریکەکەمان
غەریبیی ئاسمانە شەو پڕ ئەستێرەی سەربانەکەمان

غەریبیتان دەکەم!
غەریبیی ئێواران، ئێوارانی گەڕانەوە ماڵ،
ماڵ:
کە درەختێکی ماندووی چڵوپۆپ لەمل یەکتریی ڕەنگاوڕەنگ بوو.

غەریبیتان دەکەم!
غەریبیی تریفەی سپێدانی جەژن،
جەژن:
کە دایکم بوو، دەنوشتایەوە ماچی دەکردم.

غەریبیتان دەکەم!
غەریبیی کوکوختیی سەر دیواری پاش عەسرەکان، کە لە خوێندنیا
غەم و چیرۆکی حەسرەتباری گوندە چەپەک و دوورە دەستەکانی بۆ بەدیاری دەهاوردم.
غەریبیی چیا سەرکەشەکان کە دڵبڵندی و سەرفرازیم بوون.
غەریبیی ڕسکانی مەرگەساتاویی ترێ، هەنجیر، کەلەگەڵ مندا بەیەکەوە-
بەیەکەوە بەناو دۆزەخی ترسی ئاگر لەڕۆح بەردانماندا تێپەڕ دەبووین.

غەریبیتان دەکەم!
غەریبیی ئەو دەنگە ڕەنگینە میهرەبانەی کە ئێواران، کاتێ دەچوومە دەرەوە، پێی دەگوتم:
کوڕی شیرینم، ئاگات لەخۆت بێ
شەو زۆر درەنگ نەگەڕێیتەوە؛
سەرمات نەبێ!

غەریبیتان دەکەم!
غەریبیی ڕوبع:
ئەو پارچە کاغەزە بچووکە سەوزەی، گشت ئێوارەیەک ڕۆژانەم بوو.

غەریبیتان دەکەم!
غەریبیی باران، پەڕەسێلکەکان،
غەریبیی کۆلارەی پەڕەگەی ئاسمانی منداڵەکان،
ڕستە و تەنافی جلوبەرگ ئاسوودە هەڵواسراوی سەربانەکان.

غەریبیی بازاڕ، غەریبیی گەردەلوول، غەریبیی چرا، غەریبیی دار، غەریبیی بەرد، غەریبیی کەر.
غەریبیی شەو کە ڕەشەبا بوو
لەناخی قوڵترین برینەکانی وەڕسی و توڕەیی ئێوارەی ناو چایخانەکانەوە هەڵی دەکرد.

غەریبیتان دەکەم!
غەریبیی دار کاژ، چنار، چوالەکان، کە بۆ سێبەری ئەوینە بێ ماڵ، بێ پەناکان لەوێ ڕوابوون.

غەریبیتان دەکەم!
من لە غەریبیدا غەریبیی هەموو جمکە سێوێکی نا ڕەسیو دەکەم
کە لە بەرزیی چڵی دارەوە بەردەبوونەوە و لەسەر زەوی لێک دەترازان.
غەریبیی هەموو جوتە ئینسانێک کە دەمدیتن، لە دووڕیان و گەراجەکاندا، چاو پڕ حەسرەت:
-خواحافیز
لەیەکتری جوێ دەبوونەوە..

غەریبیی ئەو گەنجە کۆک و سمێڵ بابڕە نۆزدە ساڵەیەش، کە هەمیشە
ژێر درەختێکی بچکۆلانەی قژ خەنەیی بوو جێ ژوانی؛
بەڵام ئاخ، ئەو گەنجە کۆکە
هەر بە یەکجاری ڕۆیی
تازە چیتر نایبینمەوە
نا ..یـ ..بیـ ..نـ ..مە ..وە ..