2025 жыл: Сыр елі - толайым табыстардың төрінде

#qyzylordatv
2025 жылдың мәресіне жеттік. Жыл біздің облыс үшін айтулы оқиғаларымен, жаңа жобаларымен, еселі табысымен есте қалды. Жыл қорытындысын түйіндеген салтанатты іс-шарада аймақ дамуына үлес қосқан бір топ елжанды азаматтар құрмет төрінен көрінді.

2025 жылды біздің облыс жақсы қорытындылап отыр деуге негіз бар. Аймақ энергетикалық қуаттылығын арттыруға үлкен қадам жасады. Жаңа жылу-электр орталығы салынды, одан бөлек «Бейнеу-Шымкент» газ құбырының 2-ші желісі тартылмақ. Газбен қамту 83 пайызға жетті. Инфрақұрылым-логистикада да асығымыз алшысынан түсті: Қорқыт ата әуежайының жаңа терминалы ашылды, жылдың еншісіндегі елеулі оқиғаның бірі - «Қызылорда-Жезқазған» жолының біздің аймаққа тиесілі бөлігі пайдалануға берілді. Биыл 3600 пәтерлі тұрғын үй салуға бюджеттен 58 млрд 785 млн теңге бөлінді. Оның ішінде 322 пәтерлік 161 тұрғын үй аудандарда бой көтеруде. Тізе берсек, атқарылған тірлік аз емес. Оның барлығында осы облыстың азаматтарының еселі еңбегі жатыр, - деді облыс әкімі

Облыс бюджеті қомақты қаржымен толықты, ол ел үшін қажет қарекеттерді еселей түсті. Қаржы тайқазаны 851,3 млрд теңгені құрады. Жалпы өңірлік өнім көлемі 3,7 трлн теңгеге жетіп, 6,5 пайыздық өсім қалыптасты. Аймақ негізгі макроэкономикалық көрсеткіштер бойынша республикада алғашқы орында. Одан бөлек, облыста УЕФА классификациясы бойынша 4-санатты 11 мың орындық «Қайсар arena» стадионы салынды.
Тарих қойнауына енгелі тұрған 2025 жыл еңбек адамдарының жылы болды. «Жұмысшы мамандықтар жылында» түрлі салада тер төккен еңбеккерлер осы салтанатты жиында жоғары мемлекеттік наградалармен марапатталды. Атап айтқанда, «Парасат», «Құрмет», III дәрежелі «Еңбек даңқы» ордендері, «Ерен еңбегі үшін» медалі, Премьер-министрдің Алғыс хаты, Қызылорда облысының Құрмет грамотасы табысталды.

Облыста білім беру саласы республика бойынша көш алдында келеді. Осы іс-шарада оқушылары олимпиадалар мен ғылыми жоба байқауларында жоғары нәтиже көрсеткен шығармашыл мұғалімдерге облыс әкімінің қолдауымен бірреттік сыйақы беріліп, «Үздік педагог» байқауының жеңімпаздары марапатталды.

Сонымен қатар, жыл бойы өз саласында жоғары нәтижеге қол жеткізген әр саланың үздіктеріне арнайы номинациялар табысталды.

Сыр елі бүгінде өзіндік ерекше атмосферасымен баурайтын іскерлік ортаға айналып келеді. Қызылорда өңірі алда әлі талай іргелі істерімен өнеге болар, жұртшылықты жарқын іске жұмылдырар өлкеге айналмақ, - дейді сенатор Р.Рүстемов

Салтанатты іс-шара жаңа 2026 жыл аймағымызды толайым табыстардың төріне шығаратын жыл болсын деген тілекпен түйінделді. Айта кетейік, мерекелік концертте Қазақстанның еңбек сіңірген қайраткері Айгерім Алтынбек Ш.Гуноның «Ромео мен Джульетта» операсынан үзінді және И.Штраустың «Вена орманының ертегілері» шығармасын орындап, жианлған тыңдарман қауымды тәнті етті.

Сайт - https://qyzylordatv.kz/ru/live
Facebook -   / qyzylordatv  
Instagram -   / qyzylordatv  
Telegram - https://t.me/qyzylorda_tv
Tiktok -  / qyzylorda_tv