ЧЕЧЕНА КЫРГЫС

ШУЛУКЧУГЕШ

''Азияның арыны'' деп мөөрейде
Аажок чараш төлдер-биле,
Ачыр-дачыр, тура дүшпейн
Адааннажып чоруп орар
Азияның төвү болур,
Ак-көк хемнер ораны боор,
Артыш-шаанак чыды сиңген,
Аржай-буурул Тывавыстың
Алдар адын делегейде
Алдаржыдып, магададып,
Ам бо хүнде киржип турар
Авазының даңгыназы,
Черниң бүгү каас-чараш
Чечээнден-даа өңгүр чараш,
Чечена деп онза кыска
Чедиишкинни күзээлиңер!
Доңгактарның бүлезиниң
Топтап тургаш шыйып чурааш,
Торгу-чычыы, кидис-биле
Тодарлааштың даарап берген,
Тоолчургу тыва чоннуң
Тонун, бөргүн кедип алган,
Топтуг чараш аажы-чаңы
Дорт-ла шырай-арнында бо
Тода көскү, Тывам кызы,
Тоолда дег чараш-тыр сен!
Хүрең, чараш шырайыңда
Хүлүмзүрүүң, эртен үнген
Чырык хүннүң херели дег,
Чылыг, чымчак чылдып келир.
Эгел чаштан танцы-самныг
''Эдегейниң'' кызы болгаш,
Ээлгир хаак дег дурт-сынның,
Эртен эрте хөлде салдап,
Эштип, ойнаан куу куш дег,
Эмин эртир хостуг, чиик-тир.
Ада-иең шырай-арнын,
Аажы-чаңын дөзеп алган,
Төөгүлүг Тыва чурттуң
Төлептиг-ле ховар кызы!
Талантылыг, тускай чараш
Даңгынавыс, чечээ сеңээ
Авыдайым Чеченага
Ава Тываң булуңундан
''Тиилелге сээңии боор'' деп
Дидим, чоргаар кызывыска
Диңмиттел-дир адыш часкап
Тиилелгени күзеп ор мен!