راشد ابن دشن : من قبل ابن ريفه ومن قبل نيله

#راشد_ابن_دشن #راشد_بن_دشن
برقٍ على المشرق ترزّم مناشيه
شوّق نظر عيني وعيني تخيله
‏منْه التبس قلبي نواحي محانيه
ماهدْ حيله لين ماهدْ حيله
‏وصدري همومه تلّته من عراويه
احسوس بالٍ تجْتولْ كل ليله
‏لين انبرا حالٍ توالت مواريه
واعزّي لـ قلبي ويا عزّتي له
‏معاد عيّن خاطري ما يسلّيه
ولا لقيت اللي يبرّد غليله
‏والحظ لا اعطا مرّه وكفْ حاليه
حتّا اعزاز النّفس تصبح ذليله
‏احاوده منّا ومنّا وابي فيه
لاكن عيّا لا يذب الطويله
‏زان اوّله غير البلا شان تاليه
وش حيلتي والوقت مافيه حيله
‏صبرت صبرٍ فرجته في نواصيه
وراح اكثره ما باقي الّا قليله
‏اللي كتبه الله علينا نفاجيه
واللي ماتكتب حاجةٍ مستحيله
‏واعلمي اللي مادري كيف ابدّيه
بأيّة وسيله والله لـ القى وسيله
‏طرى علي اللي عقايب طواريه
غبينةٍ تغبن وتغتال غيله
‏ياللي عليكم من كبار المشاريه
‏من قدّم الحجّه يحضّر دليله
‏اللي يداري واحدٍ ما يداريه
يلقى حساير غفلته في حصيله
‏من لاحفظ سلمه وظيّع مباديه
لعاد يرجي في حياته فضيله
‏وان عوّدت كلّ وله مدّت ايديه
كلٍ على مقدوره ايعن خيله
‏انقدّي الغاوين والكيل نوفيه
والموجبه نلحق وراها نفيله
‏والليل لاطرّف وطابت مساريه
نسريه مسرا اللي مفارق خليله
‏لاويه جورٍ يلوي اللي يلاويه
وادموع عينه واديٍ سال سيله
‏وانا سريت خاطري فيه مافيه
في سكّةٍ فيها يضيع الدليله
‏وهلّيت قافٍ يستهلْ بـ معانيه
جزايله تردف جزيله جزيله
‏مهو قصيد اللي قصيده يحاليه
هزايله تردف هزيله هزيله
‏وانا خوّي اللي عريبٍ مجانيه
ماني خوي اللي يمن بـجميله
‏ربعي سنام المجد لاحل طاريه
قومٍْ يفضّون الجموع المهيله
‏لاهازنا الحف المصالي نصايله
بـ ام الزماميم وام تاج الطويله
‏مقلاطنا فالمجلس الشره تشريه
ومركاضنا يعدل عوج كل ميله
‏في دهر يوم الوقت قشرٍ ملافيه
حلنا على حدّه بـ حد الصقيله
‏فال النّدى تبشر بعزّك ولبّيه
وفال العدا حربه ونارٍ كليله
‏من قبل لاتقبل سياحه وترفيه
ومن قبل بن ريفه ومن قبل نيله
#راشد_ابن_دشن