Naa raw ñi lay sopp raw mbooleem ñi lay jox i yëf - Wolofal Serigne Mbaye Diakhaté

Yaw ngën ji wéttalu bët tay ngën ji wéttalu xol
Nekkal di wéttalu saa bët fàww ak sama xol

Ta donte waa penku ak waa sowwu ñëw na ñu tay
And ak man it, bu ñu tax mbég tàbbi sax sama xol

Saa gët yi nay ja ci yaw, saa xol bi nay ja ci yaw
Saa cër bu nekk nalay béglooka daw ci ndigal

Bu nit ñi dee denci ay soxnaaka fàggu dugub
Di jëndi fas aka war tay dox di denci alal

Naa denci man sa ngëram, tay fàggu nag sa ngëram
Tay jënd it sa ngëram yaw mii ta jàpp la jël

Naa raw ñi lay sopp raw mbooleem ñi lay jox i yëf
Raw gaa yi lay jëfal it, raw gaa yi kenn jotul

Ta jox ma nag itte juy jëm kaw li kaw, rëy a rëy
And ak wér ak gudd fan ak ndimbal ak rafetal

Sakkal ma bunt bu lëf xalseet a dox di ma lor
Ta may ma nag lu nu may soppeeka ñee, yëramal

Yëram nu, jagle nu yërmàndeeki yiw ta dogal
Ci nun lu sedd suñub xol fàww ful nu te fal

Baril nu, yokk nu biir ak biti, ful nu bu wér
Ta fal nu tundu ngëram ak bàrke fàww, defal

May ñooti, jox ñooti, sellal ñooti, yeeti nu nun
Yeeteg ngëram ndax nu far gëmlaati, yaa nu soxal

Gëm yépp nay dollikookay jëm kanam bu rafet
Ta itte yiy yokk nit ñiy sante jëf aki xol