Rużarju li junora l-Misteri kollha

Għat-test sħiħ tar-Rużarju u għas-Sors, mur: https://devozzjonilejnmarija.wordpres...

For the English Version: https://devozzjonilejnmarija.wordpres...

L-EWWEL MISTERU: IT-TFULIJA TA' SIDTNA MARIJA U SIDNA ĠESU'...
(Glorja Lilek Santissima Trinita’ għal dawn il-Misteri)

1. It-tnissil Immakulat tal-Verġni Marija fil-ġuf ta' ommha.
2. It-twelid tal-Verġni Marija.
3. Meta Marija daħlet fit-tempju, kienet tistudja l-Iskrittura u titlob, filwaqt li tiġi ffurmata mill-Ispirtu s-Santu.
4. Meta Marija offriet il-verġinita’ tagħha lil Alla u meta tgħarset ma’ Ġużeppi.
5. Meta l-anġlu Gabriel ħabbar lil Marija li kellha tkun omm Alla u bl-iva tagħha tnissel Ġesu’ f'ġufha safi.
6. Meta Marija marret żżur u tgħin lil Eliżabbetta.
7. Meta l-anġlu Gabriel ħabbar lil Ġużeppi bil-ħidma tal-Ispirtu s-Santu f'Marija.
8. Meta Marija ġarret lil Ġesu’ f'ġufha għal disa' xhur u meta għamlu l-vjaġġ fatikuż lejn Betlem.
9. Meta Ġesu’ twieled fl-għar ta’ Betlem u ġew ir-ragħajja u l-Maġi jżuruh.
10. Meta Marija u Ġużepp ippreżentaw lil binhom Ġesu’ fit-tempju.

IT-TIENI MISTERU: IL-ĦAJJA MOĦBIJA TA’ SIDNA ĠESU’ U SIDTNA MARIJA ...
(Glorja Lilek Santissima Trinita’ għal dawn il-Misteri)

1. Meta l-Familja kellha taħrab lejn l-Eġittu, biex tevita l-qerda tat-trabi innoċenti.
2. It-tfulija ta’ Ġesu’ fl-Eġittu – art mimlija nies bi tradizzjonijiet pagani ta’ allat foloz u użu ta’ ħafna statwi tal-ġebel.
3. Meta l-Familja baqgħu hemmhekk sal-mewt ta’ Erodi u b'hekk seħħ dak li qal il-Mulej permezz tal-profeta, ‘Mill-Eġittu sejjaħt lil ibni.’
4. Ġużeppi ġie msejjaħ biex iżomm taħt il-ħarsien tiegħu l-misteru tal-Providenza ta' Alla - Ġesu'.
5. Meta wara l-mewt t'Erodi, il-Familja rritornat lura fl-art ta’ Iżrael, f'Nazaret, b'hekk seħħ dak li kien ingħad permezz tal-profeti, ‘Ikun jissejjaħ Nażri.’
6. Lura f'Nazaret, Ġużeppi u Marija rabbew lil Ġesu’ fl-għożża u l-biża’ t’Alla.
7. Minbarra li Ġesu’ rċieva t-tagħlim dwar ir-Reliġjon Lhudija u l-wegħda tal-Messija mingħand il-ġenituri tiegħu, huwa kien jitlob u jimmedita l-Kelma ta’ Alla u probabbli jattendi għat-tagħlim ma’ tfal oħra fis-Sinagoga.
8. Ta’ kull sena l-ġenituri ta’ Ġesù kienu jmorru Ġerusalemm għall-festa tal-Għid. Ta' tnax-il sena huwa baqa’ f’Ġerusalemm waħdu u l-ġenituri tiegħu fittxewh għal tlitt ijiem qabel ma sabuh fit-tempju jiddisputa mad-dutturi.
9. Ġesu' qallhom: "Għaliex kontu qegħdin tfittxuni? Ma tafux li jiena għandi nkun f’dak li hu ta’ Missieri?" Iżda kliemu ma fehmuhx. Imbagħad niżel magħhom u raġa’ mar Nazaret; u kien jobdihom. U ommu kienet tgħożż f’qalbha dawn il-ħwejjeġ kollha.
10. Meta Ġesù baqa’ jikber fl-għerf, fis-snin u fil-grazzja, quddiem Alla u quddiem il-bnedmin.

IT-TIELET MISTERU: IL-ĦAJJA PUBBLIKA TA’ SIDNA ĠESU’ U SIDTNA MARIJA ...
(Glorja Lilek Santissima Trinita’ għal dawn il-Misteri)

1. Meta Ġesu’ tgħammed minn Ġwanni l-Battista fil-Ġordan, kien imġarrab mix-xitan fid-deżert għal erbgħin jum u meta xandar lis-saltna t’Alla waslet u ħeġġeġ lin-nies biex jindmu.
2. Meta Ġesu’ kien jitlob f’postijiet imwarba.
3. Meta għażel tnax-il dixxiplu u għamel l-ewwel sinjal fit-tieġ ta’ Kana bl-intervent t’ommu u d-dixxipli emmnu fih.
4. Meta Ġesu’ ppriedka u tkellem b’awtorita’ u ħafna rġiel u nisa marru warajh imma ma ġiex milqugħ minn diversi nies.
5. Meta Ġesu’ keċċa x-xjaten minn ħafna nies u fejjaq ħafna morda.
6. Meta Ġesu’ ttrasfigura lilu nnifsu fuq il-muntanja Tabor quddiem id-dixxipli tiegħu u meta qajjem mill-mewt lil tlitt persuni.
7. Meta Ġesu’ għamel id-daħla messjanika tiegħu f’Ġerusalemm.
8. Meta Ġesu’ ħasel saqajn id-dixxipli u ħabbar it-tradiment ta’ Ġuda u ċ-ċaħda ta’ Pietru.
9. Meta Ġesu’ tana kmandament ġdid li nħobbu lil xulxin bħalma ħabbna hu u talab għall-għaqda ta’ bejnietna.
10. Meta Ġesu’ tana d-doni tal-Ewkaristija u s-Saċerdozju.

IR-RABA’ MISTERU: IL-PASSJONI TA’ SIDNA ĠESU’ U SIDTNA MARIJA ...
(Glorja Lilek Santissima Trinita’ għal dawn il-Misteri)

1. Meta Ġesu’ talab fl-ort tal-Ġetsemani u għereq l-għaraq tad-demm.
2. Meta Ġesu’ ġie ttradut, arrestat, ħaduh quddiem il-kunsill tas-Sinedriju, ġie mistoqsi mill-qassis il-kbir u miċħud minn Pietru. Ħaduh quddiem Erodi li żebilħu u quddiem Pilatu li jikkundannah għall-mewt.
3. Meta Ġesu’ ġie fflaġellat mal-kolonna.
4. Meta Ġesu’ ġie umiljat, imżeblaħ u nkurunat bil-kuruna tax-xewk.
5. Meta Ġesu’ ġie mgħobbi bis-salib mingħand Pilatu sal-Kalvarju.
6. Meta tul it-triq waqa’ diversi drabi, iltaqa’ m’ommu, mal-Veronika u man-nisa ta’ Ġerusalemm u ġie megħjun minn Xmun iċ-Ċirinew.
7. Meta Ġesu’ ġie mneżża' minn ħwejġu u msammar mas-salib għal tlitt sigħat ta’ agunija.
8. Meta ħafer lil min salbu, wiegħed il-ġenna lill-ħalliel li nidem, ta lil Ġwanni d-dixxiplu f’idejn ommu u lilha f’idejh, staqsa lil Alla għaliex telqu, korob bil-għatx, qal li kollox kien mitmum u qabel miet, telaq ruħu f’idejn Alla Missieru.
9. Meta l-ġenb ta’ Ġesu’ ġie minfud b’lanza.
10. Meta ġismu tniżżel ...