من عرش الله نورك يا علينا | الشاعر الأديب جابر الكاظمي

من عرش الله نورك يا علينا
إشنجعله نور ربنا يا علينا
علي و اش أعلى منَّك يا علينا

تقي و عابد و ناسك منسك إنته
إسكنت گلبي و تنور من سكنته
شفى جرحي و تلايم من سكنته

علي و شعندي غيرك والله مالي
إشأعز إعليك ولدي ولا مالي
إلي حگ من أمدحك ولا مالي

إلي حگ المدح أي ليش طبعاً
إحروف إسمك إبلب إحشاي طبعاً
كل مؤمن لجنة عدن طب عن

طريقك يا قسيم النار والجن
لعد خصمك سواجر سقر وجن
نعم عقلي التسودن بيك والجن

مهو إختل ابغرامك وإنت خلاي
حبيب الروح إنته وإنت خلاي
أبو النخوه و نخيتك وإنت خلاي

ضميرك و الگلب و العين و الروح
يا جنة عدن و الريحان و الروح
و سر العرش والأملاك و الروح

بله جسمي ابغرامك من غديرك
ابضمه و محتاج رشفه من غديرك
صور للناس أعرض من غديرك

صور بيها المحب طالب و داعى
براءة تحمل و تحمل وداعه
يوم اللي النبي بخطبة وداعه

جمع كل گومه و أصحابه و لمهم
إجه بتبليغ من ربنه و لمهم
نبينه ما عذل گومه و لمهم

بإشاره عنده من ربنه و خطبة
قلم ما حمل هادينه و خطبه
و كلامه حاشه بي زلة و خطبه

نزل محكم كلام الله نصبة
و نصيب الناس كلمن أخذ نصبه
منبر من حدوج الإبل نصبه

و صعد بالخطبة سيد الرسل مولاه
و كلامه للإله يعود مولاه
ألا من كنت يا هالناس مولاه

فهذا المرتضى مولاه حيدر
حيى دور الشرع بالعلم حيدر
حي منبعه الآمن بيه حيدر

إنفرض من العرش حبه علينه
إعله كل الناس بوجوده علينه
يا رب والي من والى علينه

و أنصر ناصره و حقق و عادي
و أحفظ من إجه بلهفة و عادي
و إخذل من خذل حيدر و عادي

عدوه من جميع الإنس و الجان
يا بار النسوم الغدن و الجان
اليحب حيدر ارزقه الإنس و الجان

دعاء لكل محب يدعو نبينه
علينه الدهر من طبگن نبينه
ميهم هالأمر لازم نبينه

اليحب النبي و آله فوگ راسي
و تظل خوتنه مثل الجبل راسي
و فلكنه بساحل التوحيد راسي

و تظل يا علي إنت قدوة لانه
اليواليكم يا حيدر قد ولانه
الزمان إشلون ولية قد ولانه

علي و بالشدد غيرك من نجانه
نناجي الباري بسمك من نجانه
إجانه النور صحنه من نجانه

من عرش الله نورك يا علينا
إشنجعله نور ربنا يا علينا
علي و اش أعلى منَّك يا علينا
منك أعلى بس ربنه و نبيه

#جابر_الكاظمي #شعر