Брифинг: Кепілдік беру қорларының қызметінің қазіргі жай-күйі

«Даму» қоры негізінде таяуда құрылған кепілдік қорларының арқасында кепілдік құралы енді тиімді болып отыр. «Бәйтерек» холдингінде өткен брифингте баспасөз қызметінің жетекшісі Перизат Шәкенова бизнеске қордан кепілдік алу шарттарын түсіндіріп өтті.

«Кепілдік қорлары өзінің кепілзаты жетпей тұрған кәсіпкерлердің қарыздары бойынша банктерге және басқа да кредит беруші ұйымдарға кепілдік береді. Бұл, әсіресе, аймақтардағы кәсіпкерлер үшін өте маңызды, себебі ауылдық жерлердегі мүліктің құны ірі қалаларға қарағанда көбіне төмен бағаланады. Бұл жергілікті бизнесмендердің кредит алуын қиындатады. Таяуда құрылған Кепілдік қорларының арқасында кепілдік құралы енді тиімді болып отыр», - дейді Перизат Шәкенова.

Бірінші Кепілдік қоры шеңберінде кепілдік алу шарты:

🔹қаржыландыру сомасы – 7 млрд теңгеден аспауы керек;
🔹кепілдіктің максималды мөлшері – қаржыландыру сомасының 85%-на дейін, бірақ 3,5 млрд теңгеден аспауы керек;
🔹кепілдік мерзімі – қаржыландыру мерзімінен 5 ай асатын мерзім.

Бірінші Кепілдік қоры шеңберінде кепілдіктер жеделдетілген рәсім бойынша – екі жұмыс күні ішінде беріледі. Бұл Кепілдік қорын іске асыру шеңберінде тоғыз банкпен келісімшарт жасалған. Айта кетерлігі, бірінші Кепілдік қоры бойынша өңдеу өнеркәсібін құруға берілген өтінімдер көбірек мақұлданған.

Екінші Кепілдік қоры шеңберінде кепілдік алу шарттары:

🔹қаржыландыру сомасы 7 млрд теңгеден асатын өтінімдер қаралады;
🔹 кепілдіктің максималды мөлшері – жоба құнының 30%-на дейін;
🔹берілетін кепілдік мерзімі – 15 жылға дейін;

«Кепілдік беруге арналған өтінімдерді «Даму» қоры өзі қарайды. Бұл ірі жобалар болғандықтан, әрбір өтініш бойынша нақты шешімді «Даму» қорының уәкілетті органдары қабылдайды», - дейді Шәкенова.

Кепілдік алу үшін кәсіпкер екінші деңгейдегі банктерге немесе Холдингтің еншілес ұйымдары: Қазақстанның Даму Банкі, Аграрлық несие корпорациясы, Өнеркәсіпті дамыту қоры, және Qazaqstan Investment Corporation-ге жүгінуі қажет. Сондай-ақ ақпаратты «Даму» қорының филиалдарынан немесе 1408 нөмірі бойынша Call-орталықтан сұрап-білуге болады.

‪@FundDamu‬