Sira Serketina Erdal Kaya Çi ye?

Li dinê her derê, di her dewrê da komedyenên jêhatî naturalîstên dema xwe ne.Ew komedyenên jêhatî, li derdora wan çi mesele hebe, wan tevî mubalaxayên mîzahlêketî rasterast dadixin-radixin sahne û skeçan.

Parametreyên din li hêlekê, zimanê wan komedyanan çiqas pir nêzîkî karakterên li derdora milet be, milet ewqas pir dikene.Komedyen Erdal Kaya jî tevî birayê xwe Rênas Kaya, bi zimanekî natural î ne dûrî milet li sahne û skeçan e.

Ew komedyenê bi zimanê Batmanê mezin bûye, bêyî ku bikeve qeyd û qêxeyên zimanekî sterîl û standart hema çi, çito tê ber devê wî dipeyîve û ew jî dike ku zimanê wî siwar be û sewtê wî neşikê li sahne û skeçan.

Metna Vik û Vala, metna wê stand upa Erdal Kaya payîza 2025an bû kitab derket. Malumatên li kitabê raber dikin ku metna stundupê bi destên Erdal Kaya û Rênas Kaya hatiye hazirkirin. Wan her du birayan ji sosyal medyayê heta îmtihanên jibo memûrîyê ser gelek meseleyên vî zemanî mîzaheka bi zimanê milet danîne standupê.

Di zimanê milet da, di zimanê wan Kurdan da ku li Tirkîyê dijîn, bixwazî nexwazî peyvên bi Tirkî hene ku ew peyv heta radeyekê normal in. Heyata bajarî, heyata di nêv sîstema dewleta Tirkîyê da kiriye ku pirtir kelîme û kinkirinên bi Tirkî bikevin zimanê Kurdan.

Mesela KPSS, bi navê xwe yê dirêj Kamu Personeli Seçme Sınavı.. Vî zemanî hema bêje herkesê li Tirkîyê dijî zane ku ew îmtihan bo kadroyên dewletê heye, bo tayînkirinan. Erdal Kaya û Rênas Kaya xwe nedane zorê û navekî bi Kurdî nedîtine ji wê re, rind jî kirine. Eger Erdal Kaya û Rênas Kaya biketina kompleksên kelîmeyan, wan wê li şûna mîzahê, mecbûrî bi tenê îzah bikirina ku ewê pê ra gotinên wan tehmsarkî bimana.

Di metnê da Erdal Kaya û Rênas Kaya ser KPSSê ji zarê Erdal Abê dibêjin, ‘’Ez êdî nakevim îmtihan mimtihanan’’ ku wê peyva îmtihanê, ewê bi eslê xwe bi Erebî li her derê herkes fehm dike ku çi ye. Kurdên kitabî û dûr ji zimanê milet, nola ku leke li îmtihanê ketibe, xwe li azmûnê digirin ku ew jî bi eslê xwe bi Farisî ye.

Di Vik û Vala da, di kitaba wê da yanî, ser KPSSê îzah heye di notekê da li jêr: KPSS, azmûneke memûrtiyê ye li Tirkiyeyê ku bi rêya vê azmûnê, kesên bi ser dikevin, dibin xwedî kar û pîşe di sazî û dezgehên fermî/dewletê de.

Erdal Kaya bi zimanekî wanî li skeç û sahneyan bûya kesî jê tiştek fehm nedikir elbet, û elbet kes nedikenîya. De bira Erdal Kaya bi zimanê xwe bikenîne û dûr bisekine ji Kurdîya kitabî, feq e ew, ew kozik û kemîn e.

https://open.spotify.com/episode/69cy...