दिघेवस्ती (धानोरे) शाळेत कवितेचा सुवास: कवी दादासाहेब कोते विद्यार्थ्यांच्या भेटीस

दिघेवस्ती (धानोरे) शाळेत कवितेचा सुवास: कवी दादासाहेब कोते विद्यार्थ्यांच्या भेटीस

दिघेवस्ती (धानोरे) येथील जिल्हा परिषद प्राथमिक शाळेत आनंददायी शनिवार उपक्रमांतर्गत दिनांक १५ नोव्हेंबर या दिवशी ज्ञान, साहित्य आणि संस्कारांनी भरलेला अविस्मरणीय क्षण घडला. मराठी कवितेच्या सशक्त परंपरेत आपली वेगळी ओळख निर्माण केलेले, मराठी काव्यविश्वातील सन्माननीय व्यक्तिमत्त्व, कविवर्य श्री. दादासाहेब कोते यांच्या विशेष मुलाखतीचे आयोजन राहुरी तालुक्याचे सन्माननीय गटशिक्षणाधिकारी श्री.मोहनीराज तुंबारे साहेब यांच्या उपस्थित शाळेच्या वतीने करण्यात आले. साहित्याच्या गगनात झेपावणाऱ्या आपल्या पाठ्यपुस्तकातील कवितेच्या या कवीला प्रत्यक्ष भेटण्याची संधी मिळणार म्हणून विद्यार्थ्यांच्या चेहऱ्यावर आनंद स्पष्ट झळकत होता.प्रसन्न वातावरणात विद्यार्थ्यांच्या डोळ्यांत चमक होती.
कार्यक्रमाच्या प्रारंभी उपक्रमशील शिक्षक श्री.संजय बोकंद सर यांनी स्वागतपर भाषणातून दादासाहेबांच्या साहित्यसेवेचा गौरव केला. “कविता ही संवेदनांची शिदोरी आणि विचारांची दिशा देणारी दीपशिखा आहे,” असे ते म्हणाले, आणि विद्यार्थ्यांनी टाळ्यांचा कडकडाट केला. शाळेचे उपक्रमशील शिक्षक श्री.सोमनाथ अनाप सर यांनी कविवर्य श्री.दादासाहेब कोते यांचा परिचय करून दिला. इयत्ता पहिलीतील “भोपळा” व इयत्ता दुसरीतील “फुलपाखरू” या कविता त्यांनी रचल्या असल्याचे विद्यार्थ्यांना सांगितले. त्यांनी दादासाहेबांच्या साहित्यसेवेचा गौरव करत “कवितेच्या पाऊलखुणा आजही मुलांच्या मनावर उमटतात, त्याचीच ही साक्ष आहे,” असे मनोगत व्यक्त केले. श्री.अनिल घोलप सर व श्री.संजय बोकंद सर यांनी शाल व बुक देऊन दादासाहेबांचे अगत्यपूर्वक स्वागत केले.त्याचबरोबर कवी श्री.शशिकांत शिंदे व कवी श्री.यशवंत पुलाटे यांचे स्वागत श्री.सचिन पारेकर सर,श्रीम.लता खराडे मॅडम व श्रीम.वंदना कोरुलकर मॅडम यांनी केले.
इयत्ता चौथीतील विद्यार्थीनी आरोही अंत्रे व अनुष्का दिघे यांनी वर्गशिक्षिका श्रीम.लता खराडे मॅडम यांच्या मार्गदर्शनाखाली अतिशय मुद्देसूद व नियोजनपूर्वक कवी श्री.दादासाहेब कोते यांची मुलाखत घेतली. मुलाखत उत्साहपूर्ण वातावरणात सुरू झाली. मुलाखत सुरू होताच वातावरणात साहित्याची मोहक झुळूक पसरल्यासारखे वाटले.आरोही व अनुष्का या विद्यार्थिनींनी प्रथम त्यांच्या बालपणाबद्दल, शालेय जीवनाबद्दल आणि कविता लिहिण्याची प्रेरणा कशी मिळाली याबाबत प्रश्न विचारले. त्यावर प्रत्येक प्रश्नाचे उत्तर दादासाहेबांनी जिव्हाळ्याने व अत्यंत साधेपणाने दिले. त्यांनी सांगितले की त्यांना लहानपणापासून निसर्ग, गावकुसातील माणसं आणि त्यांची जीवनशैली यांविषयी प्रेम होते. याच अनुभवांमधून कविता उमलत गेल्या.कविता करण्याची प्रेरणा त्यांना कवी श्री.शशिकांत शिंदे यांच्याकडून मिळाली या बाबीचा त्यांनी आवर्जून उल्लेख केला.
पुढे विद्यार्थ्यांनी त्यांच्या प्रसिद्ध काव्यसंग्रहांविषयी विचारणा केली. दादासाहेबांनी आपल्या लेखनप्रवासातील काही आठवणी सांगितल्या आणि कविता लिहिताना प्रामाणिकपणा, निरीक्षणशक्ती आणि नियमित वाचन यांचे महत्त्व स्पष्ट केले. त्यांनी आपल्या लेखनप्रवासातील संघर्ष, पहिल्या कवितेचा जन्म, आणि निसर्गाने दिलेल्या अमूल्य प्रेरणांविषयी सांगितले. एक-दोन् छोट्या कविता नम्रपणे सादर करून त्यांनी विद्यार्थ्यांची मने जिंकली.
कवितेतून सकारात्मकता पसरवण्याचा प्रयत्न करणे हे कवीचे प्रमुख कर्तव्य असल्याचे त्यांनी विद्यार्थ्यांना सांगितले. विद्यार्थ्यांना मार्गदर्शन करताना त्यांनी सांगितले,“जग पहा, विचार करा, मनात साठवा आणि मग लिहा. वाचन म्हणजे ज्ञानाचा दीप; आणि निरीक्षण म्हणजे त्या दीपाला लावलेले तेज.”
त्यांच्या या शब्दांनी विद्यार्थ्यांमध्ये साहित्यप्रेमाचा नवा अंकुर फुटल्याचे स्पष्ट जाणवत होते. मुलाखतीदरम्यान विद्यार्थ्यांनी कवींसोबत घेतलेले संवाद, त्यांची अनुभूती व त्यातून निर्माण झालेली साहित्यप्रेमाची ऊर्जा पाहण्यासारखी होती. कविवर्य श्री.शशिकांत शिंदे सर यांनी शाळेसाठी पुस्तके भेट दिली.
मुख्याध्यापक श्री.प्रभाकर शिंदे सर यांच्या संकल्पनेतून दीपावलीच्या सुट्टीत शाळेने राबविलेल्या किल्ले बनविणे स्पर्धेतील प्रथम क्रमांक प्राप्त अच्युत पुलाटे, देवांश गाडेकर, साई खेमनर, स्मृती अंत्रे, काव्या शिंदे, तोहीद तांबोळी व आलिया तांबोळी या विद्यार्थ्यांना उपस्थित मान्यवरांच्या हस्ते गौरव चिन्ह सन्मानपूर्वक प्रदान करण्यात आले. संपूर्ण कार्यक्रमात उत्साह, शिस्त आणि साहित्यशीलता यांचा सुंदर संगम पाहायला मिळाला.
समारोपाच्या वेळी मुख्याध्यापकांनी दादासाहेबांचे, कवी श्री.शशिकांत शिंदे व श्री.यशवंत पुलाटे यांचे आभार मानले आणि या कार्यक्रमामुळे शाळेच्या साहित्यिक उपक्रमाला नवे वळण मिळाल्याचे नमूद केले.कविवर्य दादासाहेब कोते यांची ही मुलाखत विद्यार्थ्यांसाठी ज्ञान, प्रेरणा आणि साहित्यप्रेमाचा अविस्मरणीय ठेवा ठरली.सदर प्रसंगी शाळा व्यवस्थापन समिती अध्यक्ष श्री.राहुल दिघे, श्री.जयराम दिघे, श्री.यशवंत दिघे, ग्रामस्थ, पालक व विद्यार्थी उपस्थित होते.