Тәліптер АҚШ өз әскерін 31-ші тамызға дейін алып кетсін деген талап қойды! Әйтпесе...

Кабул әуежайы әлі күнге астаң-кестең. АҚШ әскерилері қанша тырысса да бір-бірін таптап, құжынап жатқан халықты тәртіпке келтіре алмай отыр. Әуежайдың жанында қайтыс болған 7 адамның неден көз жұмғанын да ешкім білмейді. Қазір Кабул әуежайы 48 сағатқа жұмысын тоқтатты. Егер айдың соңына дейін АҚШ әскері Кабулден кетпесе тәліптер күш қолданамыз деп, бекініп отыр.
Аңыраған бала мен жылаған ананың барлығы Ауғанстаннан кете алмайды. Өйткені, британдық және америкалық әскерилер тек Еуропалық одақ пен АҚШ-тың азаматтарын эвакуациялау операциясында жүр. Ал, босқындардың көбінде қажетті құжаттары жоқ. Бірақ, жан амандығы үшін халық түрлі амалға барып жатыр. Британдық сержант Даз МакМахон "құжаты жоқ босқындар ұшып кете алмайтынын білсе де, есінен танған болып, су сұрап, бізді алып кетер деген үмітпен байбалам салады" дейді. Сапырылысқан халықтың көптігі сонша кейбірі әуежай маңында мертігіп, тіпті қаза болып жатыр. АҚШ-тың мемлекеттік департаменті енді Кабул әуежайы ішкі аумағындағы адамдарды эвакуациялау үшін 48 сағатқа жабылатынын мәлімдеді.
Ал, тәліптердің жүздеген әскері өздерінің басып алмаған жалғыз аймағы - Пандшжер шатқалына аттанды. Ол жерде бүкіл ауғандықтарды тәліптерге қарсы соғысуға шақырған Ахмад Масуд қарсыласуға дайын. Масуд: "егер Талибан халықты күшпен мойындатқысы келсе билікте ұзақ болмайды" деп, сенімді отыр. Тәліптер осы уақытқа дейін 340 саяси тұтқынды және жазасын өтеп жатқан 40 адамды босатса, күні кеше Лашкаргах түрмесіндегі 350 тұтқынды үйлеріне жіберді. Талибан билігі Ауғанстанның президенті Ашрак Ғаниды кешіреміз, елге оралсын деп мәлімдеді. Талибан көсемі Халилур Рахман Хаккани өздеріне қарсы соғысуға дайын отырған уақытша президент Амрула Салехті де кешіреміз деді.
Алайда Талибан басшыларының уәдесі іс жүзінде қалай орындалатыны белгісіз. Мысалы, әйелдердің құқығын құрметтейміз деген тәліптер Ауғанстанда өз Үкіметін жасақтамаса да, қазірдің өзінде музыка тыңдауға, әйелдердің радиода жұмыс істеуіне тыйым салып отыр. Әйелдерге үйлерінен тек толық тұмшаланып, күйеулерімен ғана шығуға рұқсат. Ал, қызметтегі келіншектер үйлерінде отырып жұмыс істейді. Қыз балаларға білім алуға рұқсат жоқ. Енді Сухейн Шахин АҚШ өз әскерін 31-ші тамызға дейін алып кетсін, бұл ең соңғы шектік мерзім деді. Ал, АҚШ Президенті Джо Байден 31-ші тамызға дейін Ауғанстандағы АҚШ азаматтарының барлығын шығарып үлгермеуіміз мүмкін, тіпті, "бұл операцияның сәтті аяқталатынына кепілдік бере алмайтынын айтты. Байденнің осы мәлімдемесі мен "айдың соңында кетпесеңдер қарсыласуға мәжбүрміз" деген талибан лидерлерінің сөзіне қарағанда қарулы қақтығыс болуы әбден мүмкін.

Айбар Төлжанұлы, Дидар Елеуов











Бізді әлеуметтік желіде оқыңыздар:
Youtube -   / @informburo31kanal  
Facebook -   / informburo31  
Instagram -   / informburo31  
Vkontakte - https://vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31

#геосаясат #Ауғанстан #тәліптер_режимі #соғыс