Talba Litanika tad-Demm ta' Kristu

Sors: https://l-ewkaristijaus-sacerdozju.ho...

Talba Litanika tad-Demm Prezzjożissimu ta’ Ġesù. (Tingħad fuq il-Kuruna tar-Rużarju)

Fl-Isem tal-Missier, u tal-Iben u tal-Ispirtu s-Santu. Ammen.

Missierna u Ħobżna
Sliema u Qaddisa
Glorja

(fuq l-għaxar żibġiet tal-Kuruna jingħad dan li ġej:)

1 O Missier, f’ġieħ id-Demm Prezzjożissimu ta’ Ibnek il-Għażiż u ħuna Sidna Ġesù Kristu, li xerred fiċ-ċirkonċiżjoni tiegħu meta kellu biss tmint ijiem;

għinna nżommu safja l-Libsa tal-Magħmudija tagħna.

(Wara għaxra tingħad il-Glorja...)

2 O Missier, f’ġieħ id-Demm Prezzjożissimu ta’ Ibnek il-għażiż u ħuna Sidna Ġesù Kristu, li tħallat mal-għaraq tiegħu fl-agunija fil-Ġetsemani;

ieqaf magħna fil-mard, fl-uġigħ u fl-inkwiet ta’ ħajjitna.

3 O Missier, f’ġieħ id-Demm Prezzjożissimu ta’ Ibnek il-għażiż u ħuna Sidna Ġesù Kristu, li gelgel bħal xmara mad-daqqiet tal-frosti fuq il-Ġisem adorabbli tiegħu fil-flaġellazzjoni;

dewwi l-ġrieħi tagħna, fir-ruħ u fil-ġisem;

4 O Missier, f’ġieħ id-Demm Prezzjożissimu ta’ Ibnek il-għażiż u ħuna Sidna Ġesù Kristu, li ġelben mir-Ras qaddisa tiegħu mdawwra bix-xewk;

agħtina l-fejqan fil-menti, fil-qalb u fil-ġisem tagħna.

5 O Missier, f’ġieħ id-Demm Prezzjożissimu ta’ Ibnek il-għażiż u ħuna Sidna Ġesù Kristu, li kesa, bħal b’tapit irjali, it-Triq Doloroża tiegħu lejn il-Kalvarju;

imxi magħna fit-Triq Doloruża tagħna mgħobbijin bis-slaleb ta’ ħajjitna.

6. O Missier, f’ġieħ id-Demm Prezzjożissimu ta’ Ibnek il-għażiż u ħuna Sidna Ġesù Kristu, li ċarċar minn idejh u minn saqajh imsammrin mas-Salib;

mexxi l-passi tagħna fit-triq tas-sewwa, b’idejna mfawwrin bl-opri tal-ħniena lejn il-proxxmu fil-bżonn.

7. O Missier, f’ġieħ id-Demm Prezzjożissimu ta’ Ibnek il-għażiż u ħuna Sidna Ġesù Kristu, imħallat mal-ilma li nixxa minn Qalbu minfuda bil-lanza;

agħmel li din qalbna tixbaħ lil Tiegħu!

Nitolbu:
O Demm Prezzjożissimu ta’ Ġesù,
mnissel fil-ġuf safi ta’ Marija,
bil-qawwa tal-Ispirtu s-Santu;
Demm imxerred għalina bħala l-prezz tal-Fidwa tagħna;
Demm li jaħsilna minn ħtijietna kollha;
Demm li jbajdilna din qalbna;
Demm li jinżel kotran fuq l-erwieħ tal-Purgatorju;
salvana u kun għalina l-faraġ u l-hena tagħna. Ammen.

O Demm Prezzjuż ta’ Ġesù, aħna nadurawk!

Fl-Isem tal-Missier, u tal-Iben u tal-Ispirtu s-Santu. Ammen.