ვატიკანის განცხადება - რომის პაპის გარდაცვალების მიზეზი

რომის პაპის გარდაცვალების ოფიციალურ მიზეზი ინსულტია – ამის შესახებ ინფორმაციას ვატიკანი ავრცელებს. ოფიციალური ინფორმაციის თანახმად, ინსულტმა კომა და გულის შეუქცევადი უკმარისობა გამოიწვია. სამედიცინო დასკვნის თანახმად, პაპს აღენიშნებოდა ორმხრივი პნევმონიით გამოწვეული მწვავე რესპირატორული უკმარისობა და მეორე ტიპის დიაბეტი. ვატიკანმა გამოაქვეყნა პაპის ანდერძიც. მან დაკრძალვა რომის სანტა მარია მაჯორეს ბაზილიკაში ითხოვა. ანდერძში პაპი ამ სურვილს მიზეზსაც განმარტავს და წერს: „რამდენადაც ვგრძნობ ჩემი მიწიერი ცხოვრების მოახლოებულ დასასრულს, მარადიული სიცოცხლის მტკიცე იმედით, მსურს, გამოვხატო ჩემი უკანასკნელი სურვილი ჩემი დაკრძალვის ადგილთან დაკავშირებით. მთელი ჩემი ცხოვრების განმავლობაში და ჩემი მსახურების დროს მე ყოველთვის ვენდობოდი ღვთისმშობელს, ამიტომ ჩემი თხოვნაა, ჩემმა ნეშტმა სანტა მარია მაჯორეს ბაზილიკაში განისვენოს. ჩემი საფლავი მიწაში უნდა იყოს, მარტივი, განსაკუთრებული მორთულობის გარეშე. დაკრძალვის ხარჯები დაიფარება ქველმოქმედების მიერ გამოყოფილი თანხით. მე მივეცი საჭირო მითითებები ამასთან დაკავშირებით კარდინალს. უფალმა მიანიჭოს შესაფერისი ჯილდო ყველას, ვისაც ვუყვარდი და ვინც განაგრძობს ჩემთვის ლოცვას. ტანჯვას, რომელმაც აღბეჭდა ჩემი ცხოვრების უკანასკნელი ნაწილი, მე შევწირავ უფალს, მსოფლიოში მშვიდობისა და ხალხთა შორის ძმობისთვის“ – ნათქვამია პაპის ანდერძში. აღსანიშნავია, რომ საუკუნეზე მეტი ხნის განმავლობაში, ეს იქნება პირველი შემთხვევა, როცა პაპს ვატიკანის გარეთ დაკრძალავენ. რომის პაპი ფრანცისკე გუშინ დილით 88 წლის ასაკში გარდაიცვალა.

ვატიკანმა პაპის ოფიციალური რეზიდენცია დალუქა, რაც სიმბოლურად გლოვის პერიოდის დასაწყისს აღნიშნავს. პაპის გარდაცვალების შემდეგ ცხრადღიანი გლოვა ცხადდება. ჩვეულებისამებრ, პაპი გარდაცვალებიდან მეოთხე და მეექვსე დღეებს შორის უნდა დაიკრძალოს. კონკრეტულად, როდის გაიმართება დაკრძალვის ცერემონია ამას კარდინალები გადაწყვეტენ. პარალელურად ახლა კარდინალები მთელი მსოფლიოდანაც უნდა შეიკრიბონ იმისთვის, რომ პაპი ფრანცისკეს მემკვიდრე აირჩიონ. ჩვეულებრივ, ახალი პაპის ასარჩევად, კონკლავი პონტიფიკოსის გარდაცვალებიდან 15-20 დღის შემდეგ იმართება. ხმის მიცემის პროცესი საიდუმლოა და ჩვეულებრივ ორიდან სამ კვირამდე გრძელდება, თუმცა შეიძლება პროცესი გაჭიანურდეს იმ შემთხვევაში, თუ კარდინალები კანდიდატზე ვერ შეთანხმდებიან. საიდუმლო არჩევნებში მონაწილეობის მიღების უფლება დაახლოებით 135 კარდინალს აქვს. ერთადერთი მინიშნება იმის შესახებ, თუ როგორ მიდის არჩევნები, არის კვამლი, რომელიც დღეში ორჯერ ჩნდება. თუ თეთრი კვამლი გაჩნდა, ეს ნიშნავს, რომ ახალი პაპი აირჩიეს.


ეწვიეთ ჩვენს საიტს - https://1tv.ge/
მოიწონეთ ჩვენი გვერდი -   / 1stchannel.1tv.ge  
გამოიწერეთ ჩვენი არხი -    / georgianpb  
ვიდეო წარმოადგენს საზოგადოებრივი მაუწყებლის საკუთრებას.
მისი გავრცელება შეგიძლიათ მხოლოდ ბმულის გაზიარებით.
დაუშვებელია მასალის ჩამოტვირთვა და სხვაგან ატვირთვა,
ამ შემთხვევაში მაუწყებელი უფლებას იტოვებს მიმართოს შესაბამის ზომებს.