Sud jarayonining borishini qanday qilib qayd etib borish mumkin?

Sud jarayonining qayd etib borilishi odil sudlovning asosiy tamoyili – uning oshkoraligi kafolatlaridan biri. Bu sudning, taraflar va jarayonning boshqa ishtirokchilari protsessual harakatlarini, shuningdek, ishni ko‘rib chiqish paytida holatlarni (faktlarni) belgilovchi hujjatlarning majburiy protsessual bajarilishini anglatadi.

Qayd etish quyidagi shakllarda amalga oshiriladi: texnik vositalarda; sud majlisi jurnalini yuritishda; alohida protsessual harakatlar to‘g‘risida bayonnoma tuzishda.

Ovoz yozib oluvchi texnik vositalar yordamida sud majlisini to‘liq yozib olish sud majlisining kotibi yoki sud raisining buyrug‘i bilan sud apparatining boshqa xodimi tomonidan amalga oshiriladi.

Ishda ishtirok etayotgan shaxslar sud majlisining texnik bayonnomasi, sud majlisi jurnali bilan tanishish huquqiga egalar va agar ulardagi bayonnomaning to‘liq emasligi yoki noto‘g‘riligi yuzasidan biron bir eʼtirozlari bo‘lsa, ish bo‘yicha qaror eʼlon qilingan kundan boshlab uch kun ichida sudga murojaat etishlari mumkin.

Sud zalida hozir bo‘lgan jurnalistlar yoki boshqa shaxslar ham sud majlisining borishini yozma ravishda yoki audio va video yozuvlar, foto va video tasvirga olish orqali qonun hujjatlarida belgilangan tartibda qayd etib borishlari mumkin.

O‘zR JPKning 19-moddasiga binoan sud tashabbusi bilan yoki jinoyat protsessi ishtirokchilarining iltimosiga binoan sudlarda jinoyat ishlari bo‘yicha ochiq sud jarayoni audio va video yozuvlardan foydalangan holda, shuningdek, videokonferensaloqa rejimida o‘tkazilishi mumkin. Yopiq sud majlisida videokonferensaloqa tizimidan foydalanishga yo‘l qo‘yilmaydi va bunday majlisda audio va video yozib olish amalga oshirilmaydi.

Sud zalida ovoz yozish, suratga, videotasvirga va kinoga olishga faqat sud majlisi raisining ruxsati bilan yo‘l qo‘yiladi, bu haqda tegishli ajrim chiqariladi.