1. Eltziegoko Dantzak; Uztaritze, 2019-10-12

Aurten, 30 urte betetzen dira Tolosa (Gipuzkoa) eta Uztaritze (Lapurdi) herriak senidetu zirela. 1989az geroztik harreman estua izan dute, eta horren erakusleiho izan zen, pasa den urriaren 12an, Uztaritzen ospatu zen festa eguna. Egun horretan, bi herrietako kultur talde ugarik hartu zuten parte, tartean, Udaberri Dantza Taldeak eta bertako dantza taldeak.

Bideo honetan, Udaberriko kideak, Eltziegoko Dantzak eskaintzen, herri kultura eta erlijio ohitura batzen dituen dantza sorta. Urtero, irailaren 8an Plazako Ama Birjinaren ohoretan dantzatzen da, prozesioan zehar lagunduz eta dantzak burutuz Ama Birjinaren irudia berriro ere ermitara bueltatu aurretik.

Antzina, XVII. mendean, Santa Isabeletan dantzatzen omen zuten. Ondoren, aipaturiko bi egunetan egiten ziren, baina, gaur egun, esan bezala, soilik irailaren 8an amabirjinaren egunean dantzatzen dira. 1936ko gerra zibilera bitartean gizonezkoez soilik osaturiko taldeak egiten zituen dantzak, baina, gerrako etenaldiaren ostean, 40ko hamarkadan, Sección Femeninakoek berreskuratu zituzten dantzak. Ordutik, talde mistoak ere izan diren arren, gaur egun neskaz osatutako taldeak dantzatzen ditu.

Gaur egun, 8 neskek dantzatzen dute “bastonero” deituriko dantza gidari batek gidatuta. Antzina, gisa honetako bi pertsonaia zeuden, bata “bastonero” edo dantza gidaria eta bestea “Katximorro”, zonalde horretan zabaldurik dagoen pertsonaia xelebrea eta jendea zirikatzeaz arduratzen dena. Gaur egun, pertsonaia bakarra dago, soilik dantza gidariaren papera egiten duena, baina, Katximorroz jantzita.

Dantza sorta 5 dantzek osatzen dute: Kalejira, Dantza, Lau kale, Arbola eta Jota.