#Утумнааһын

Кулун тутар сааскы бастакы ый. Саха былыргы халандаарынан сыл саҕаланыыта буолар. Айыы аартыга арыллар. Айыы суола түһэр, Айыы халлаана кэлэр. Ол ону көрсөр алгыспыт бу курдук буолар.

1
Дьээ-буо!
Алака-чалака!
Үлэлээх олох айыыта
Дьөһөгөй айыы тойон
Үрүҥ тыына
Үрүҥ былыт буола
Бэттэх буол.
Үрүҥ сылгы
Үүт маҥан кылынан
Күндүлээн эрэбин.
Хоруу, хоруу, хоруу.
2
Дьээ!
Алам-чалам!
Үрүҥ былыты
Үрүҥ күлүк гына
Имэҥнээх хойууну ииппит
Киэҥ Киэли Баалы хотун,
Эрсэннээх тиэргэни тэниппит
Киэли Баалы тойон
Бэттэх буол,
Мичик аллай,
Истэ сэргэҕэлээ,
Арыылаах саламаатынан
Айах тутан эрэбин.
Ытык тылбын ыл,
Сүҥкэ тылбын көтөх.
Дуом айхал.

3
Көхсүттэн көнтөстөөх
Күн өркөн ууһа,
Арҕаһыттан тэһииннээх
Айыы хаан аймаҕа
Арыаллаһар аналлаах
Айыы санааны арыйан,
Ааттаан-тускулаан
Маннык диэн
Аманыйан эрэбит.
4
Үрүҥ айыы сахаттан утумнаах
Саха Саарын тойон,
Сабыйа баай хотун
Саргылаах күннэрэ
Салаллыытыгар,
Айыы Намыһын эдьиийдэр
Аттанар атаарыыларыгар
Үөр маҥан куруппааскы
Өрө көтөн иһэрин курдук,
Тоҕус үрүҥ сүүрүк сылгыны
Суй маҥан аттаах,
Суй маҥан таҥастаах,
Тоҕус суй маҥан ураҕастаах,
Тоҕус суй уолан киһи
Илин халлаан анныгар
Кыйдаан – һаттаан эрэр. ,
Айыы Дьөһөгөй оҕото
Аллаах ат
Сэттэ былас тибиилээх сиэлин
Нэлбэгэйдии бырахта ,
Тоҕус былас бурҕааннаах кутуругун
Субуччу тутта,
Сиэлин, кутуругун кынаттанан
Өрө мөҥө көттө,
Иэйэхситтээх илин халлаан
Эҥийэтин диэкки
Ыастаах кустук курдук
Кыһыыра турда.
Түөрт бүтэй туйахтаах
Сыспай нэлим сиэллээх
Сылгы сүөһүгэ
Ымай маҥан ытык киэлитигэр
Иэйэхсит ийэм
Имэҥэ иҥнэ,
Айыыһыт ийэм
Айылгыта ахталыйда.
Нарын-наскыл,
Күөгэр-нусхал буол