ရန်ကုန်တိုင်း သုံးခွမြို့နယ်မှာ လေဆင်နှာမောင်း တိုက်ခတ်မှုဖြစ်ပွားခဲ့

ရန်ကုန်တိုင်း သုံးခွမြို့နယ်မှာ လေဆင်နှာမောင်း တိုက်ခတ်မှုဖြစ်ပွားခဲ့

ဧပြီ ၁၀ - ၂၀၂၅
SN (VOM)

ရန်ကုန်တိုင်း၊ သန်လျင်ခရိုင်၊ သုံးခွမြို့နယ်အတွင်းက ပျဥ်းမကန်ကျေးရွာအနီး ပုလဲကျေးရွာမှာ ဧပြီ ၈ ရက်နေ့က လေဆင်နှာမောင်း အသေးစား တိုက်ခတ်ခဲ့တယ်လို့ ဒေသခံတွေဆီက သိရပါတယ်။

လေဆင်နှာမောင်းကြောင့် နေအိမ် သုံးလုံး ပျက်စီးခဲ့ပြီး လူနဲ့ တိရစ္ဆာန် ထိခိုက်မှု မရှိခဲ့ဘူးလို့ သိရပါတယ်။

“သုံးခွနယ် အစက ပုလဲကျေးရွာမှာ ဖြစ်သွားတာပါ။ သန်လျင် ကျောက်တန်း အပိုင်ထဲက ရွာပေါ့။ မိုးအုံ့၊ မိုးတွေခြိမ်းပြီး လေပြင်းတွေ တိုက်နေရင်း ဖြစ်သွားတာ။ အိမ် သုံးလုံးလောက်ကတော့ အလုံးလိုက် ပါသွားတယ်” လို့ ဒေသခံတယောက်က ပြောပါတယ်။

လေဆင်နှာမောင်းဟာ ကုန်းတွင်းပိုင်းမှာ ဖြစ်ပေါ်တိုက်ခတ်တဲ့ မုန်တိုင်းအမျိုးအစား ဖြစ်ပြီး မြေပြင်ရှိ အဆောက်အအုံတွေကို လေထဲကို မြောက်တက် ကျွတ်ပါသွားအောင် တိုက်ခတ်တတ်တဲ့ အင်အားပြင်း မုန်တိုင်းအမျိုးအစား ဖြစ်တယ်လို့ သိရပါတယ်။

လေဆင်နှာမောင်း စတင်ဖြစ်ပေါ်ခြင်းကို လေ့လာကြည့်မယ်ဆိုရင် နေပူရှိန်ကြောင့် မြေမျက်နှာပြင် အပူချိန် ရုတ်တရက် မြင့်တက်လာရာကနေ စိုစွတ်တဲ့လေထု ပူနွေးလာရာမှ လေထု အထက်ကို စတင် မြင့်တက်လာတာ ဖြစ်တယ်လို့ သိရပါတယ်။

အဲဒီလေထု ပူနွေးလာချိန်မှာတော့ စိုစွတ်တဲ့လေထုနဲ့ အပေါ်ရှိ အေးမြ ခြောက်သွေ့တဲ့ လေထု ပေါင်းဆုံမိပြီး မိုးအရွာမှာ ပေါက်ကွဲမှုတရပ် ဖြစ်ပေါ်ကာ ထစ်ချုန်း မိုးတိမ်တိုက်တခု ဖြစ်ပေါ်လာပြီးနောက် လေဆင်နှာမောင်းအဖြစ်ကို ရောက်ရှိလာတယ်လို့ သိရပါတယ်။

အဲဒီ လေဆင်နှာမောင်းဟာ လျင်မြန်စွာ အားကောင်းလာပြီး မိုးရွာခြင်း၊ လျှပ်စီးလက်ခြင်းနဲ့ မိုးခြိမ်းခြင်းတွေ ဖြစ်ပေါ်ကာ ဒေါင်လိုက် ရွေ့လျားနေတဲ့ လေထုမှာ အလွန်လျင်မြန်စွာ ရွေ့လျားပြီး လေတွေဟာ လားရာအမျိုးမျိုးကြောင့် ပတ်ချာလည်နေတယ်လို့ သိရပါတယ်။

မြေပြင်နဲ့ တိမ်တိုက်တွေအကြား ဖန်ကတော့ပုံ အနေအထားအတိုင်း ရွေ့လျား တိုက်ခတ်နေတာကို တွေ့မြင်နိုင်မှာဖြစ်ပြီး အဲဒီ တိုက်ခတ်နေတဲ့ လေပွေ၊ လေဝဲဟာ အရွယ်အစားနဲ့ ပုံသဏ္ဌာန်အမျိုးမျိုး ပြောင်းလဲနိုင်တယ်လို့ သိရပါတယ်။

အရွယ်အစားမှာ မီတာ ရာနဲ့ချီ ကျယ်ပြန့်လာနိုင်ပြီး လေဆင်နှာမောင်းတခုဟာ စက္ကန့်ပိုင်းမှ တနာရီအထက် ကြာမြင့်စွာ တိုက်ခတ်နိုင်သလို ရွေ့လျားတိုက်ခတ်တဲ့ လမ်းကြောင်းမှာလည်း နာရီပိုင်းအတွင်း မိုင်အများအပြား တိုက်ခတ်နိုင်တယ်လို့ သိရပါတယ်။

လေဆင်နှာမောင်းအတွင်းရှိ လေတွေဟာ လျင်မြန်စွာ တိုက်ခတ်နေတာကြောင့် တိုင်းတာဖို့ မလွယ်ကူပေမယ့်လည်း လေဆင်နှာမောင်းတခုရဲ့ တိုက်ခတ်နှုန်းကို ဖူဂျီတာစကေးနဲ့ ခန့်မှန်း တိုင်းတာကြတယ်လို့ သိရပါတယ်။

လေဆင်နှာမောင်းရဲ့ လေတိုက်နှုန်းနဲ့ ပြင်းအားပမာဏ အတိုင်းအတာကို ချီကာကိုတက္ကသိုလ် ပါမောက္ခ ပေါက်တာဖူဂျီတာက တိုင်းတာတွက်ချက် ဖော်ထုတ် အသိပေးနိုင်ခဲ့တဲ့အတွက် အဲဒီ စကေးကို ဖူဂျီတာစကေး (Fujita Scale) လို့ ခေါ်တွက်ခဲ့တာ ဖြစ်ပါတယ်။

ဖူဂျီတာစကေး အနိမ့်အမြင့်ကိုလိုက်ပြီး အဆင့် F0, F1, F2, F3, F4, F5 သတ်မှတ်ထားပြီး အနိမ့်ဆုံးလေတိုက်နှုန်း တနာရီ ၇၅ မိုင်မှ ၃၁၈ မိုင်အထိ ရှိတတ်တယ်လို့ သိရပါတယ်။

လေဆင်နှာမောင်း‌တွေဟာ တနှစ်ပတ်လုံး အချိန်မရွေး၊ နေ့ရော ညပါ ဖြစ်ပွားနိုင်ပေမယ့် လေဆင်နှာမောင်း အများစုဟာ ညနေ ၄ နာရီကနေ ၉ နာရီကြားမှာ ဖြစ်ပွားလေ့ရှိတယ်လို့ သိရပါတယ်။

လေဆင်နှာမောင်းကို စိုက်ဆင်းလေပြင်းလို့ခေါ်တဲ့ Downburst နဲ့ ရောထွေး အမှတ်မှားလေ့ရှိကာ လေဆင်နှာမောင်းမှာ အရှိန်မြင့် တိုက်လေတခု အလယ်ဗဟိုပြုပြီး လေက အတွင်းဘက်နဲ့ အပေါ်ဘက်ကို ရွေ့လျားခြင်းဖြစ်ကာ စိုက်ဆင်းလေ‌ပြင်းကတော့ အောက်သို့တဖန် ဆင်းသက်သော အမှတ်မှ အပြင်ဘက်ကို ဖြာထွက်ခြင်း ဖြစ်တယ်လို့ သိရပါတယ်။

လေဆင်နှာမောင်း တိုက်ခတ်ခံရပြီးတဲ့နောက် တွေ့ရတဲ့ အပျက်အစီးတွေရဲ့ လားရာက စက်ဝိုင်းပုံအတိုင်း လဲပြို ပျက်စီးနေတတ်ပြီး စိုက်ဆင်းလေပြင်းကြောင့် ဖြစ်တဲ့ အပျက်အစီးတွေကတော့ စိုက်ဆင်းလေပြင်း မြေပြင်ကို စတင်ထိတွေ့တဲ့ နေရာမှ လားရာတဘက်တည်းကိုသာ ပျက်စီးလဲပြိုနေတာကို တွေ့ရတတ်တယ်လို့ သိရပါတယ်။

Photo/Video - CJ

#voiceofmyanmar #VOM #ရန်ကုန်တိုင်း #သုံးခွမြို့ #လေဆင်နှာမောင်း