ابونجاح الغضيب سود الليالي الزرعن درب المحبة اشواك سود الليالي يهيه يالبعيدين طفوني اعلجت بهدومي

سود الليالي أزرعن درب المحبّه أشواك سود الليالي



أسأل سؤالين واريد بكُل صراحه إيكون مجاوب سؤالي

بالليل الهموم علش تكثر عشر قاطات؟ وتسوّي جالي

وجرح الگلُب ليش كلف؟ ما فادُه الموصل لا طب الملالي

واسأل سؤالين أُخُر عود إنتحوّل على ظيم الليالي

دلو الوفا وين هفا؟ ياسامعين الصوت يامن لگاه لي

وْهَل إنتَه راضي إبعشرة الّي إيحچي الوجهين ولاله تالي

ما ساعفنّي العَبَد!! لاحاربنلي إعداي!! شَلنلي حالي

وشورّطك يا گلُب تفلح برض جرجور وصَبْخه الچوالي

ما حسبت بالتعب يرميني وكت الزرع طاب وحلالي

زيد إصطبارك عجَل واذعن للمقدّر وأعلى الله التوالي

حگ الغدر بيك لأن إنت بوطا! وهوّه إيروم المعالي

لاتشتري إعنب كرُف دوّر عل إعجيمي ودوّر كمالي

وكذلك الناس إذا أحببت المعاشر ميّز يغالي

بيهم ينالون علو وانفسهم إعزاز دوم بلا تعالي

وبيهم يفيظون حقد بيهم وسط تلگاه وبيهم مثالي

ودون الوسط ناس أكو أو تاجَب إگصابته لولا أكو والي

طير الگطا وياك أريد ارسل مكاتيبي للشح بوصالي

ولمّن تصل ليه الفجُر تلگاه شرط نايم وگلُّه بدالي

ينايم اگعُد يخَي ماني ارّگت عيني ومدري شجرالي

نام الكسير وهجد . نام الفگد . والذيب وآني إعلى حالي

ساهر وگول السهر لمّن وراه ملگا فلا أُبالي

وعگب البُخل بالدمع صار الكرم شاني بأمر الليالي

فاصلني لبّه وحلي وقيّدني بخيوطها لجيدك يغالي

وطوّلها حول الشبر واحبسني عشر سنين وفضلك خيالي

صابغ محيّاه الوَلَد ومكحِّل عيونُه ولابس ليالي

ما تقبل الست جفن بلا كُحل والوجه لازم يلالي

ولازم زخمة الصدر ضيجة ويكون الكذا بارز وعالي

هم نقتصد باللبس هم المُشاهد يرى كُل التحالي

وهي تنجح الطالبة بالإمتحانات وَهي تنول المعالي

وقادر يمن فصّلت يالتمتحن بينا ياذا الجلالي

ربّي وجِسَمْت الصبر مو بالتساوي وانا قلّ إحتمالي


ابونجاح الغضيب رحمة الله
في بداية الثمانينات