សង្ខេបព័ត៌មានជាតិសំខាន់ៗ ប្រចាំថ្ងៃទី២៥ ខែវិច្ឆិកា ឆ្នាំ២០២៥

--
១. នៅព្រឹកថ្ងៃអង្គារនេះ សម្ដេចធិបតី ហ៊ុន ម៉ាណែត នាយករដ្ឋមន្រ្ដីកម្ពុជា បានឆ្លើយតប៣ចំណុច ពាក់ព័ន្ធនឹងកង្វល់ស្ដីពីការវាស់វែងនិងការបោះបង្គោលព្រំដែនបណ្ដោះអាសន្ននៅចន្លោះបង្គោលព្រំដែនលេខ៤២-៤៧ នៅខេត្តបន្ទាយមានជ័យ និងលេខ៥២-៥៩ នៅខេត្តបាត់ដំបង។ ចំណុចទី១ សម្ដេចធិបតី បានឱ្យដឹងថា ការវាស់វែងនិងបោះបង្គោលព្រំដែនបណ្ដោះអាសន្ននៅចន្លោះបង្គោលព្រំដែនលេខ ៤២-៤៧ និងលេខ៥២-៥៩ មិនមែនធ្វើឡើងប្រញ៉ាប់ប្រញ៉ាល់ ក្នុងរយៈពេលខ្លីនោះទេ ពោលគឺក្រុមការងារបច្ចេកទេសព្រំដែនកម្ពុជា-ថៃ បានរួមគ្នាធ្វើការងារនេះតាំងពីឆ្នាំ២០០៦។ ចំណុចទី២ ការងារវាស់វែងនិងស្វែងរុករកទីតាំងពិតប្រាកដនៃបង្គោលព្រំដែនទាំងនេះ គឺធ្វើឡើង ដោយឈរលើមូលដ្ឋាននៃឯកសារគតិយុត្តដែលបន្សល់ទុកពីអាណាព្យាបាលបារាំង ជាពិសេសកំណត់ហេតុ (Procès Verbaux) បោះបង្គោលរបស់គណៈកម្មការកំណត់ព្រំដែនរវាង ឥណ្ឌូចិន-សៀម ឆ្នាំ១៩០៨-១៩០៩ និងគណៈកម្មការបោះបង្គោលព្រំដែនរវាងឥណ្ឌូចិន-សៀម ឆ្នាំ១៩១៩-១៩២០។ ចំណែកចំណុចចុងក្រោយ សម្ដេចធិបតី បានលើកឡើងថា គោលដៅនៃការវាស់វែងនិងបោះបង្គោលព្រំដែនបណ្តោះអាសន្នខាងលើនេះមិនមែនដើម្បី គណនាអំពីការចំណេញឬខាតដីនោះទេ ប៉ុន្តែគោលដៅចម្បងគឺដើម្បីកំណត់នូវការខ័ណ្ឌសីមានៅលើដី ជាក់ស្តែងដែលបញ្ជាក់អំពីខ្សែព្រំដែនមួយដែលត្រឹមត្រូវនិងច្បាស់លាស់រវាងប្រទេសទាំងពីរ។
ប្រភព៖ សម្ដេចធិបតី ហ៊ុន ម៉ាណែត (  / 14xwznkygrl  )

២. អាជ្ញាធរមីនកម្ពុជា បានចេញសេចក្តីថ្លែងការណ៍ឆ្លើយតបនឹងការចោទប្រកាន់គ្មានមូលដ្ឋានរបស់ថៃពាក់ព័ន្ធនឹងហេតុការណ៍ផ្ទុះមីននៅតំបន់ព្រំដែន។ តាមរយៈអាជ្ញាធរមីន កម្ពុជាបដិសេធដាច់ខាត ចំពោះរាល់ការចោទប្រកាន់ណាមួយដែលថា យោធាកម្ពុជាបានដាក់មីនថ្មី។ ទាក់ទងនឹងការលើកឡើងអំពី "មីនប្រភេទ PMN-2 ទើបត្រូវបានដាក់ថ្មី" អាជ្ញាធរមីន បានគូសបញ្ជាក់ថា ការលើកឡើងនេះ ត្រូវតែគាំទ្រដោយរបាយការណ៍បច្ចេកទេសផ្លូវការ រួមជាមួយរូបថតដែលមានការផ្ទៀងផ្ទាត់ត្រឹមត្រូវ, របាយការណ៍នៃការប្រមូលនិងរក្សាទុកភស្តុតាង, ការវិភាគទីតាំងផ្ទុះ, ទិន្នន័យ GIS ដែលមានកំណត់ត្រាពេលវេលា និងការវាយតម្លៃដោយអង្គការសកម្មភាពមីនភាគីទីបីដែលអព្យាក្រឹត។ តាមអាជ្ញាធរមីន មកទល់បច្ចុប្បន្ន កម្ពុជា មិនទាន់ទទួលបានរបាយការណ៍ណាមួយនោះទេ។ ចំពោះការអះអាងពាក់ព័ន្ធនឹងការរើសបាន "ទូរស័ព្ទរបស់ទាហានកម្ពុជា" ក៏អាជ្ញាធរមីនកម្ពុជា ពុំទាន់ទទួលបានព័ត៌មាន និងភស្តុតាងដែលបានលើកឡើងដោយថៃ ត្រូវបានបញ្ជូនមកកាន់កម្ពុជា ហើយក៏មិនមានការស្នើសុំណាមួយឱ្យកម្ពុជា ផ្ទៀងផ្ទាត់រូបភាពផងដែរ។
ប្រភព៖ អាជ្ញាធរមីន (  / 15kbmastxr  )

៣. អ្នកនាំពាក្យអយ្យការអមសាលាដំបូងរាជធានីភ្នំពេញ បានចេញសេចក្ដីថ្លែងការណ៍មួយ ឆ្លើយតបទៅនឹង គេហទំព័រ MondayDailyNews បានផ្សាយនូវសំណេរថា “ភាពអាម៉ាស់នៃការដោះលែងជនសង្ស័យល្បួងអនីតិជន៖....”។ ពាក់ព័ន្ធនឹងការសម្រេចដោះលែងឈ្មោះ សូត្រ បញ្ញា ភេទប្រុស កើតថ្ងៃទី០៦ ខែឧសភា ឆ្នាំ២០១១ ឲ្យមានសេរីភាពវិញ, អ្នកនាំពាក្យអយ្យការអមសាលាដំបូងរាជធានីភ្នំពេញ បានឱ្យដឹងថា ក្រោយពីបានពិនិត្យផ្ទៀងផ្ទាត់លើអង្គហេតុ និងភស្តុតាងនានា ឃើញថាជនសង្ស័យ និងជនរងគ្រោះ បានព្រមព្រៀងរួមភេទជាមួយគ្នា មិនមានការបង្ខិតបង្ខំ។ ម្យ៉ាងទៀត ជនសង្ស័យ និងជនរងគ្រោះ សុទ្ធតែមានអាយុក្រោម១៥ឆ្នាំដូចគ្នា។ ជាមួយគ្នានេះ តាមមាត្រា ៤៤ នៃច្បាប់ស្តីពីការបង្ក្រាបអំពើជួញដូរមនុស្ស និងអំពើធ្វើអាជីវកម្មផ្លូវភេទ ចែងថា ជនណាដែលមានអាយុ ក្រោម១៥ឆ្នាំ នឹងត្រូវលើកលែងពីការផ្តន្ទាទោសចំពោះបទល្មើសដូចមានចែងក្នុងមាត្រា ៤២ និងមាត្រា ៤៣ នៃច្បាប់នេះ។ អ្នកនាំពាក្យសាលាដំបូងរាជធានីភ្នំពេញ បន្ដថា ការសម្រេចដោះលែងនេះ ធ្វើឡើងស្របតាមអង្គហេតុ អង្គច្បាប់ និងនីតិវិធីជាធរមាន ពុំដូចការចុះផ្សាយរបស់គេហទំព័រ Monday DailyNews នោះទេ៕
ប្រភព៖ ព្រះខ័ន (https://t.me/preah_khan/8618)

៤. ក្នុងពិធីសំណេះសំណាលជាមួយប្រតិភូកីឡាកម្ពុជា រដ្ឋមន្ត្រីក្រសួងអប់រំ បានបញ្ជាក់ថា ប្រសិនបើកម្ពុជាមិនចូលរួមការប្រកួតកីឡាអាស៊ីអាគ្នេយ៍លើកទី៣៣ ដែលនឹងប្រព្រឹត្តទៅក្នុងប្រទេសថៃ ទេនោះ, ប្រទេសកម្ពុជាទាំងមូលនឹងត្រូវរងការបន្ទោសពីប្រទេសជាសមាជិកអាស៊ាន។ ឯកឧត្តមបណ្ឌិតសភាចារ្យ ហង់ ជួនណារ៉ុន បន្ដថា ប្រទេសសមាជិកអាស៊ានទាំងអស់ នឹងបន្ទោសកម្ពុជាថាមិនគោរពតាមធម្មនុញ្ញអូឡាំពិក និងធម្មនុញ្ញក្រុមប្រឹក្សាសហព័ន្ធកីឡា អាស៊ីអាគ្នេយ៍ (SEAGF) ហើយការមិនចូលរួមប្រកួតកីឡា SEA Games នៅប្រទេសថៃ កម្ពុជាក៏នឹងអាចរងការថ្កោលទោស ឬដាក់ពិន័យផងដែរពីអន្តរជាតិផងដែរ។ ទោះយ៉ាងណាក៏ដោយ រដ្ឋមន្រ្ដីក្រសួងអប់រំ បញ្ជាក់ថា ថៃ ដែលជាប្រទេសម្ចាស់ផ្ទះរៀបចំការប្រកួតត្រូវតែគោរព និងធ្វើតាមសេចក្តីសម្រេចរបស់ក្រុមប្រឹក្សាសហព័ន្ធកីឡាអាស៊ីអាគ្នេយ៍ ពោលគឺ ថៃមិនអាចធ្វើអ្វីតាមចិត្តនោះទេ។
ប្រភព៖ RFI (https://rfi.my/CDEq.g)

៥. សហគ្រាសដែលរកស៊ីលើការដាំដុះ ផលិត ផ្គត់ផ្គង់ក្នុងស្រុក ឬនាំចេញផលិតផលកសិកម្មកម្ពុជា នឹងទទួលបានការអនុគ្រោះពន្ធពីរដ្ឋាភិបាលចំនួន ៣ប្រភេទ។ ក្នុងនោះ គឺរួមមានការព្យួរទុកការបង់ពន្ធអប្បបរមា, ការព្យួរទុកការបង់ប្រាក់រំដោះពន្ធលើប្រាក់ចំណូល និងការរួចផុតពីកាតព្វកិច្ចកាត់ទុកប្រាក់ពន្ធលើការទូទាត់ ចំពោះការផ្គត់ផ្គង់សេវាដោយបុគ្គលមិនស្ថិតក្នុងរបបស្វ័យប្រកាស។ ការអនុគ្រោះពន្ធទាំង៣ប្រភេទក្នុងវិស័យកសិកម្មនេះ នឹងត្រូវអនុវត្តចាប់ពីថ្ងៃទី១ ខែមករា ឆ្នាំ២០២៦ តទៅ។ តាមប្រកាសស្តីពី«ការលើកទឹកចិត្តពន្ធដារចំពោះវិស័យកសិកម្ម» ដើម្បីទទួលបានការលើកទឹកចិត្តពន្ធដារ ចំពោះវិស័យកសិកម្មនេះ ម្ចាស់សហគ្រាសត្រូវបំពេញលក្ខខណ្ឌមួយចំនួនផងដែរ តាមការតម្រូវរបស់ក្រសួងក្រសួងសេដ្ឋកិច្ច និងហិរញ្ញវត្ថុ។
ប្រភព៖ ថ្មីៗ (https://thmeythmey.com/detail/153876)

Facebook:   / preah.khan.khmer  
Telegram: https://t.me/preah_khan
TikTok:   / preah_khan