【潮文】

{下文內容取材自網絡, 非本頁原創}
講起我就扯火喇，我家姐一路都喺太古廣場一間名店做sales，間店有好多有錢人同名人幫襯，做咗好多年，已經係senior，咁多年嚟都好俾心機做，經理亦好 like佢。因為收入唔錯又穩定，家姐原本諗住同拍拖多年既boyfriend結婚，咁多年嚟我家姐好少俾人投訴，而且同好多大客既關係都唔錯。前排關小姐去過我家姐間店幫襯，不過serve佢嘅唔係我家姐，但佢一買就買左好多嘢。

過左個幾星期，佢又再去間店行，上次serve嗰個day-off，咁我家姐就頂上serve佢。開頭已經好有禮貌介紹啲新貨俾佢，仲話俾折頭佢。佢就無乜反應，望一望另一堆客。嗰堆客係大陸人，三至四個，講嘢好大聲。關小姐就同我家姐講話可唔可以閂左間舖一陣，等佢揀衫。我家姐同我講，佢公司一向唔俾佢地咁做，驚做壞個頭，除非真係有乜大人物，好多記者好混亂先可以咁做。但佢見到關小姐黑口黑面都識做，話打電話去問一問老闆，老闆梗係話唔得啦，至多俾多啲折頭佢。咁關小姐就發老脾，鬧到我家姐一面屁，啲說話勁難聽，又話自己買野嘅錢多過我家姐搵幾年嘅錢。我家姐都唔敢得罪佢，一味道歉。跟住關小姐就走左人，家姐就同老闆備案，老闆了解左情況就無再追問。

過左兩日，佢接到老闆電話話收到complain，話有人投訴佢態度唔好，唔理顧客感受，公司policy一向唔話俾佢地知係邊次事件，我家姐估嚟估去都淨係得失過關小姐一人，總之俾老闆話左兩句。

又過咗幾日，關小姐又嚟。今次同件西裝友一齊，但好在成間舖都無其他客。我家姐怕又惹事，叫左個junior過去serve佢，點知條老西友係要點返我家姐serve，跟住關小姐就玩野，試衫但係話啲衫俾其他人試過污糟，要開新衫試，我家姐雖然知公司唔俾咁做，但怕左佢，唯有照做，點知試左兩三件，件件佢都要咁試又無話要，我家姐終於話唔好意思，其實唔可以咁做，又話至多俾多啲折頭佢，跟住佢件西裝友就鬧我家姐，話係咪話我地無錢買你哋啲嘢?
我家姐話唔係，但佢照鬧，鬧左十幾分鐘，啲同事見咁，幫手又照鬧，最終打俾老闆備案，之後連收兩封warning letter，早兩日接埋大信封，年尾俾人炒左。