GHAUS KI YAAD SATAAYE | QASIDA

GHAUS-E-AAZAM
MEHBOOB-E-SUBHAANI
QUTB-E-RABBAANI
HAZRAT SAIYED ABDUL QAADIR JILAANI (RA)
ki shaan me,
Marhoom Janaab Mehmoodmiya Bachumiya Malek almaroof ‘Khalish Barodwi’ Sahab ki likhi hui mashhoor-o-maqbool manqabat ko
BAZM-E-REFAI (Khanqah-e-Refaiya, Baroda) ki jaanib se Ghaus-e-Aazam Hazrat Saiyed Abdul Qaadir Jilaani (ra) ki baargaah me ba taur-e-nazraana-e-aqidat pesh karne ki sa’aadat haasil ki jaa rahi hai.

Allah (swt) Huzoor (saw) ke sadqe me hum tamaam ko qayaamat ke din tak Ghaus-e-Aazam Hazrat Saiyed Abdul Qaadir Jilaani (ra) ke fuyuz-o-barakaat se mustafeez farmaaye. AAMEEN.

LYRICS

Ghaus ki yaad sataaye, Toh mazaa aa jaaye,
Maut Baghdaad me aaye, Toh mazaa aa jaaye.

Hai mere saamne Firdaus ka saaraa manzar,
Noor hi noor hai jis samt uthata hoo(n) nazar,
Umr ho jaaye Ilaahi isi aalam me basar,
Hai tasawwur me mera sar Qadam-e-Hazrat par,
Ab mujhe hosh na aaye, Toh mazaa aa jaaye.

Gham-o-Aalaam ke panje se chhudakar mujh ko,
Saari dunya ki nigaaho(n) se bachaakar mujh ko,
Aaina Ghaus ke jalwo(n) ka dikhakar mujh ko,
Sue Baghdaad jo le jaaye udaakar mujh ko,
Aisi aandhi koi aaye, Toh mazaa aa jaaye.

Chhahta hoo(n) ke chala aaye ye mehmaa(n) dil me,
Khil uthe ek mohabbat ka gulistaa(n) dil me,
Roshni apni lutaaye Mah-e-Taabaa(n) dil me,
Lutf toh jab hai ke Yaad-e-Shah-e-Jilaa(n) dil me,
Ek baar aake na jaaye, Toh mazaa aa jaaye.

Jagmagaata hi rahe dil ka mere kaashaanaa,
Saari dunya ki zabaa(n) par ho mera afsaanaa,
Ho mujhe Fikr-e-Haram aur na Gham-e-Butkhaanaa,
Ghaus ke ishq me ho jaau(n) ‘KHALISH’ diwaanaa,
Ye hawaa sar me samaaye, Toh mazaa aa jaaye.

Ghaus ki yaad sataaye, Toh mazaa aa jaaye,
Ishq taaseer dikhaaye, Toh mazaa aa jaaye,
Dil kahi(n) chain na paaye, Toh mazaa aa jaaye,
Jaan iss shaan se jaaye, Toh mazaa aa jaaye,
Maut Baghdaad me aaye, Toh mazaa aa jaaye.