حكاية اليوتيوبر الأمريكى فى مصر

يوم 6 ابريل اللى فات.. فوجئت مصر والعالم بإن يوتيوبر أمريكى اسمه سونى.. نشر على قناته فيديو من مصر وكتب عليه جمله واحده.. Don’t come here.. أو متجيش هنا.. شويه ونزل فيديو تانى بعنوان Don’t go to Egypt.. أو متروحش مصر.. شويه ونشر فيديو تالت بعنوان Worst country أو أسوأ بلد.. طيب ليه كل ده؟.. مصر عملت لك ايه يا عم سونى؟.. للأسف مصر معملتلوش حاجه.. لكن فرد واحد من جهه واحده هو اللى عمله.. الشخص ده هو رجل شرطه.. طيب رجل الشرطة ده عمله ايه؟.. واللى عمله ده عادى واليوتيوبر هو اللى ظالمه ولا الشرطة فعلا ظلمت اليوتيوبر؟.. تعالا نحكى اللى حصل..

اليوتيوبر ده متخصص فى صناعة المحتوى اللى بيتكلم عن الأكل فى كل دول العالم.. يعنى مثلا يروح اليابان يعمل فيديوهات عن أشهر الأكلات اليابانية.. ويسافر الصين يعمل نفس القصة.. وعد بقى أى دولة تقابله.. الراجل تقريبا لف العالم.. قناته عليها أكتر من 8 مليون متابع.. وعنده فيديوهات الواحد منها عدد مشاهداته تجاوز 8 مليون مشاهده.. مشاهدات قناته من 2010 لحد النهاردة داخله على الـ 2 مليار مشاهده.. وده معناه ببساطة انه مشهور ومؤثر فى عدد كبير من المهتمين بالسياحة الغذائية.. أو السياحة بشكل عام.. ليه؟.. لأن أغلب اللى بيتابعوه ناس مهتمين بالسفر.. يعنى كلمه واحده منه كفيله بإنها تشجعك تسافر بلد معين أو انها تخوفك من نفس البلد.. وبما ان مصر بلد كبير.. فالراجل قرر انه يزور مصر.. وهنا خلينى أنا أسألك سؤال.. لما راجل بالشهرة دى يقرر انه يصور فى مصر.. مصر اللى بتعتمد بشكل أساسي فى مواردها واقتصادها على السياحة.. احنا بلد سياحى أصلا..المفروض نفرح بزيارته ونقدمله كل التسهيلات اللى نقدر عليها؟.. ولا نندمه انه زار البلد؟.. لو انت بقي الشخص اللى هتستقبله هتعمل ايه؟.. أكيد هتقدمله كل التسهيلات علشان الراجل يخرج من مصر مبسوط فيقوم يقول كلام كويس عن البلد.. وبالتالى يقدملنا دعايه مجانيه متكلفناش ولا مليم؟.. صح؟.. مش كده؟..

لكن اللى حصل عكس كده تماما.. الراجل فوجئ بمجرد ما وصل انه بيتفتش تفتيش هو نفسه وصفه بإنه تفتيش مجرمين.. اللى هو انتو بتعاملونى كده ليه؟.. الكاميرات وأدوات الإضاءة والتصوير خضت عمال الفندق اللى نازل فيه لدرجة انهم طلبوله الشرطة.. فالراجل بكل هدوء طلع تصريح التصوير اللى خده من هيئة الاستعلامات المصرية.. يعنى الراجل ورقه سليم ومعندوش أى مشكله.. لكن وبالرغم من كده.. الراجل بيحكى وبيقول ان تفتيش الشنط استمر 6 ساعات.. 6 ساعات كاملين بيفتشوا شنطه.. احنا عبرنا خط بارليف فى 6 ساعات.. وفى الآخر معدات التصوير اتصادرت منه.. طيب يا جماعه أنا معايا تصريح من هيئة الاستعلامات.. قالوله مش كفاية.. يا جماعه أمال ايه لازمته.. لازمته ان ميتقبضش عليك..

انت لو مكانه هتعمل ايه؟.. هتاخد بعضك وتقولهم شكرا أنا مش عاوز أصور فى البلد دى وهاخد حاجتى وأمشى.. لكن الراجل معملش كده.. الراجل قالهم طيب يا جماعه متشكرين.. وكمل رحلته فى مصر وبدأ يصور بموبايله زيه زى حضرتك وزيى وزى أى حد ماشي فى الشارع وبيصور أى حاجه بموبايله.. حضرتك تقولى ثانيه واحده بس.. هو كان بيصور ايه؟.. مش يمكن فعلا صور حاجات مش كويسه.. مش يمكن جاسوس.. مش يمكن جاى يسوء سمعة البلد؟..

أقولك برافو عليك.. سؤال كويس.. تعالا نشوف هو صور ايه.. الراجل صور مع سعد الحرامى صاحب مطعم الفول والطعمية اللى عمرو أديب نفسه استضافه وصور معاه.. وبالمناسبة الراجل كان لطيف جدا فى فيديوهاته لدرجة انه كان بيكلم عمى سعد الحرامى ويقوله يا مستر سعد.. عم سعد الحرامى من أشهر أصحاب مطاعم الفول والطعميه فى مصر تما.. غالبا مفيش حد فينا مكلش عنده.. طيب الراجل ده صور فين تانى؟.. صور فى مطعم حوواشي الرفاعى.. صور فى مطعم كشرى أو طارق.. صور نفسه وهو راكب جمل فى الأهرامات.. صور جوه فرن عيش بلدى.. حضرتك تقولى بس.. هو رغيف العيش.. أنا مكنتش مطمن للراجل ده من الأول.. أنا ظنى طلع فى محله.. الراجل ده كان جاى علشان يقول ان رغيف العيش هيغلى أو ان وزنه هيقل ويبوظ سمعة البلد.. أقولك ولا أى حاجه من دى حصلت.. الراجل صور نفسه وهو بياكل رغيف عيش سخن طازه طالع من الفرن.. وقعد يشكر فى طعمه ويقول انه عيش محصلش.. مداقش زيه فى حياته قبل كده.. لا جاب سيرة الأسعار ولا الوزن ولا أى حاجه.. يعنى الانتقادات اللى احنا كمصريين بنقولها أصعب بكتير من اللى كنا خايفين ان الراجل يقوله ومقالوش.. الراجل مقالش حاجه اصلا.. وخلينى أقولك على المفاجأة..

المصريين فى الشوارع والمطاعم اللى الراجل صور فيها.. هما اللى هونوا عليه اللى حصله.. هو نفسه بيقول كده.. قعد يشكر فى الأكل وفى استقبال الناس وضحكهم معاه.. لكن كانت مشكلته الوحيدة هى اللى حصله من تفتيش ومنع تصوير وغيره.. حضرتك تقولى منع تصوير ليه بقى ما انت بتقول انه صور بالموبايل.. أقولك ما هو لما بدأ يصور بالموبايل.. فوجئ بإن الشرطة وقفته وخدته على قسم الشرطة.. وهناك سألوه انت بتصور ايه وليه وعشان ايه وورينا الصور اللى صورتها إلى آخره.. نفس المشهد اللى شوفناه فى فيلم عسل اسود مع أحمد حلمى.. الفرق ان الراجل كان معاه تصريح من الدولة بالتصوير.. أحمد حلمى مكنش معاه.. وفى النهاية وبعد التحقيق معاه فى قسم الشرطة.. أمروه انه يمسح كل اللى صوره على الموبايل..


المصادر
https://bit.ly/3KAlTRz
https://bit.ly/37FYf7x
https://bit.ly/3uv11FG
https://bit.ly/3E1F0l7
https://bit.ly/3riZ9hs
https://bit.ly/3uvB6xJ
https://bit.ly/37biXfQ




#المواطن_سعيد #يوتيوبر_أمريكي #السياحة_فى_مصر