蘇玉華獨腳戲《完美證供》18場爆滿 導演潘燦良：冇可能再加場！｜回歸母校演藝學院公演 為保戲劇效果寧選「細場」？｜前期準備長達半年 屋企變成排練室 瞓覺途中都想傾對白｜游大東｜舞台劇｜專訪

兩星期之前在專欄寫過，年底劇場界將有多套焦點製作輪流登場，熱鬧程度近年罕見，身為擁有15年資歷的Theatre-goer，實在難掩興奮。

相比電影和劇集，劇場觀眾人數向來較少，那怕劇本、演員有多出色，網絡世界的討論度始終跟前兩者有明顯的距離，最近之所以能夠引起熱議和撲飛潮，全因幾齣劇作擔綱演出的，統統都是影視界極有知名度的名字。

論牌面最勁的一齣，當然是12月13日在香港演藝學院歌劇院揭幕的《香港式離婚》，單單看到宣傳海報上有黃子華與劉嘉玲，已知道這是「冇得輸」黃金組合，所以就算加至58場，仍然一票難求，上周二（9月3日）公開售票高峰期有近90萬人排隊買飛可謂意料之內。

第二套是《失憶【諒解】備忘鹿》，11月1日在香港演藝學院歌劇院首演，即《香港式離婚》早一個檔期，此乃彭秀慧（KP）相隔五年後再演獨腳戲，日前她接受專訪時對我說，年底多套好戲排住隊開騷，戲迷肯定開心到震，但身為自資開騷的人……「好老實，點會冇憂心？『子華神』一出，簡直係萬佛朝宗嚟㗎嘛，全城震動㗎嘛，咁有冇震傷咗我哋其他人，或者有冇震傷咗一啲願意入場嘅觀眾荷包呢？係unknown嘅，但係…咁都係要做㗎啦，應承咗喇，開咗㗎喇，行啦！」

第三套是11月28日在葵青劇院頭場演出的《餐廳》，這是「風車草劇團」全新創作。事實上劇團過去幾年持續有高質製作推出，周一（9月9日）落幕的《Di-Dar》更是笑到碌地有口佳碑，相信在梁祖堯、邵美君、湯駿業三人組繼續「做膽」以及「阿炳」梁仲恆加盟演出下，《餐廳》絕對值得期待。

最後一套是12月27日在香港演藝學院廖湯慧靄戲劇院亮燈的《完美證供》，雖然這是四套焦點劇目之中唯一的改編劇本，惟無損其叫座力，8月中優先訂票，三小時內爆滿，9月2日公開售票，一個多小時內全數售罄，原因很簡單：這齣100分鐘的戲由蘇玉華一個人撐起，導演是其丈夫兼最佳拍檔潘燦良。

《完美證供》改編自澳洲劇作家Suzie Miller的原著劇本《Prima Facie》，2019年5月至6月期間在澳洲的Griffin Theatre Company首演，故事講述主角Tessa是一位刑事辯護大律師，擅長替涉及性侵的加害人辯護，事業如日中天，然而一場突如其來的打擊，使她不得不轉換身份和角色，努力為自己尋求公義。

何解阿蘇對這個劇本有興趣，最終變成今年在香港公演的《完美證供》？早前因為ViuTV劇集《反起跑線聯盟2》宣傳有機會專訪阿燦，我趁機問他幾句。阿燦解釋，其實《Prima Facie》是朋友介紹給阿蘇看的，私心希望有朝一日能夠在台上見到阿蘇演繹Tessa。

「COVID嘅時候大家都喺屋企睇嘢，佢（朋友）睇咗呢個演出嘅錄像版，就覺得好啱蘇玉華做，就喺佢（阿蘇）生日嗰日送咗一條link（收看連結）畀蘇玉華：『生日快樂，我送條link畀你，你去睇啦！』就係咁樣，咁我哋就喺屋企開嚟睇。」

阿燦笑言阿蘇看完演出後，縱然認同劇本確實很精彩，但自身感覺不算太強烈，直至過了一段時間後，她找到原著劇本來看，愈讀愈有味道，演出意慾也愈見強烈，就嘗試看看有沒有機會與其他單位合作，將這齣舞台劇帶到香港觀眾眼前，「最後我哋就搵咗個新嘅組合（Seeyousoon），搵咗個新嘅單位，然之後就搞呢個production出嚟，就去到今日喇。」

作為導演，阿燦早在半年前已開始跟阿蘇一起為演出做準備，包括翻譯劇本，不是由英文譯做廣東話便算，是要將對白和專業用詞反覆斟酌琢磨，讓觀眾一聽就明。「因為佢有好多法律上一啲專業嘅用詞，或者係佢裡面講嘅嘢啦，我哋唔識㗎，我哋要搵法律顧問，我哋真係問：呢個詞係咩意思，或者呢句說話講緊啲乜嘢，或者呢個戲而家發生緊啲乜嘢（事），我哋要做好多呢啲工夫，希望將嗰個翻譯本去再調校到……觀眾一聽好容易接收到嘅一個版本。因為我哋大家又咁啱住埋一齊（笑），變咗我哋喺屋企好容易就……隨時都可以討論，隨時都可以傾。」

《完美證供》跟《香港式離婚》和《失憶【諒解】備忘鹿》三套劇都會在香港演藝學院演出，但《完》劇租用的是廖湯慧靄戲劇院，而不是能夠容納最多觀眾的歌劇院，多些觀眾入場不是更好嗎？「我哋都會諗應該喺一個點樣嘅場地去做先至最適合，可以發揮到嗰個戲，如果演出場地唔適合呢，對於嗰個戲係會大打折扣，觀眾嘅觀賞感受亦都會唔好嘅，如果我哋擺喺Lyric（歌劇院）嗰度做，可能係觀眾量會多好多，但係嗰個演出嘅效果，唔會係一個好嘅效果。」

採訪：游大東
拍攝：何駿軒
剪接：陳俊文

（29092024）

#游大東專訪 #游大東影視筆記 #舞台劇 #蘇玉華 #潘燦良 #完美證供 #SuzieMiller #primafacie

緊貼「游大東影視筆記」最新資訊：
▇ facebook專頁：facebook.com/yautaitung
▇ instagram： instagram.com/yautaitung
▇ Patreon：www.patreon.com/yautaitung
▇ Telegram：https://t.me/yautaitung