ཤར་གངས་རི་མ། Praise to Jey Tsongkapa (TashiLhunpo Monks)

༈ ཤར་གངས་རི་དཀར་པོའི་རྩེ་མོ་ན། །སྤྲིན་དཀར་པོ་གནམ་ལ་སྙེག་འདྲ་བ། །དེ་མཐོང་བའི་མོད་ལ་བླ་མ་དྲན། །དྲིན་བསམས་ཤིང་བསམས་ཤིང་དད་པ་སྐྱེས། །

སྤྲིན་དཀར་པོ་ལྡིང་བའི་ཤར་ཕྱོགས་ན། །འབྲོག་དགེ་ལྡན་ རྣམ་པར་རྒྱལ་བ་དེར། །མཚན་བརྗོད་པར་དཀའ་བའི་དྲིན་པོ་ཆེ། །ཕ་བློ་བཟང་གྲགས་པ་ཡབ་སྲས་བཞུགས། །

ལམ་རིམ་པ་གཉིས་ཀྱི་རྣལ་འབྱོར་སོགས། །ཆོས་ཟབ་ལ་ཤིན་ཏུ་རྒྱས་པ་གསུངས། །བོད་ཁ་བ་ཅན་གྱི་སྐལ་ལྡན་ལ། །མགོན་ཁྱོད་ཀྱི་བཀའ་དྲིན་བསམ་མི་ཁྱབ། །

སྒོས་སྙོམས་ལས་འཛིན་པའི་དགེ་འདུན་གྲུབ། །བློ་ཅུང་ཟད་ཆོས་ལ་ཕྱོགས་པ་འདི། །རྗེ་ཡབ་སྲས་རྣམས་ཀྱི་བཀའ་དྲིན་ཡིན། །དྲིན་ཆེ་བར་ངེས་སོ་ཡབ་སྲས་རྣམས། །

དུས་དེང་ནས་བྱང་ཆུབ་སྙིང་པོའི་བར། །རྗེ་ཡབ་སྲས་ཁྱེད་རྣམས་མ་གཏོགས་པ། །སྐྱབས་རེ་ས་གཞན་ནས་མི་འཚོལ་བས། །ཐུགས་བརྩེ་བའི་ལྕགས་ཀྱུས་དྲང་དུ་གསོལ། །

དྲིན་ཇི་བཞིན་འཁོར་བར་མ་ནུས་ཀྱང་། །སེམས་ཆགས་སྡང་དབང་དུ་མ་སོང་བས། །མགོན་ཁྱོད་ཀྱི་བསྟན་པ་འཛིན་པ་ལ། །དུས་ནམ་ཡང་བརྩོན་པ་བགྱིད་པར་སྨོན། །

ལར་ད་ལྟ་གངས་རིའི་ཁྲོད་འདི་ན། །རང་བསྟན་པ་འཛིན་པར་ཁས་ལེན་ཅིང་། །གཞན་བསྟན་འཛིན་དགྲ་བོའི་དྭངས་མར་འཛིན། །ཚུལ་འདི་ལ་སྐྱོ་བ་གཏིང་ནས་སྐྱེས། །

གཞན་ཕུང་བར་འདོད་པའི་ཀུན་སློང་དང་། །རྒྱུད་མཚན་འཛིན་དམ་པོས་བཅིངས་ལགས་ཀྱང་། །ལམ་མཐོན་པོར་གནས་པའི་ཁས་ལེན་བྱེད། །འདི་བརྟགས་ན་ཀུན་ཀྱང་ཁྲེལ་བའི་རྒྱུ། །

ལམ་གོལ་སར་རྒས་པའི་སྡུག་ཡུས་ཀྱིས། །ཆོས་ཚུལ་བཞིན་སྒྲུབ་པའི་གང་ཟག་ལ། །རྒྱུད་ཁོང་ནས་འཁྲུགས་པའི་གདུག་སེམས་ཅན། །གདོན་ཐུགས་ལ་ཞུགས་པ་མ་ལགས་སམ། །

དགྲ་ཉོན་མོངས་འདུལ་ཐབས་མི་བྱེད་པར། །གཤགས་འགྱེད་པ་ཙམ་གྱི་འཆད་ཉན་ཡང་། །འདྲེ་ཤར་སྒོའི་ཕྱོགས་སུ་གནས་པ་ལ། །གླུད་ནུབ་སྒོར་སྐྱེལ་བཞིན་དོན་རེ་ཆུང་། །

དོན་དེ་ལྟར་གོ་བའི་བཤེས་གཉེན་རྣམས། ། སྤྱིར་ལུས་ཅན་ཀུན་ལ་བཀའ་དྲིན་སོམས། །སྒོས་ཆོས་མཛད་ཡོངས་ལ་དག་སྣང་སྦྱོངས། །དགྲ་ནང་ན་འདུག་པའི་བདག་འཛིན་ཐུལ། །

མི་ཁོ་བོའི་རྗེས་འཇུག་གྲོགས་པོ་ཀུན། །ཡིད་ཕྱོགས་སུ་ལྷུང་བར་མི་བྱེད་པར། །བློ་གཟུ་བོར་གནས་པའི་རྟོག་དཔྱོད་ཀྱིས། །ལམ་དྲང་པོར་ཞུགས་པ་ཅིས་ཀྱང་ལེགས། །

༈ གཏམ་འདི་ལ་བརྟེན་ནས་འགྲོ་བ་ཀུན། །བྱམས་སྙིང་རྗེས་དྲངས་པའི་སེམས་བསྐྱེད་དང་། །དབྱིངས་སྤྲོས་བྲལ་རྟོགས་པའི་ལྟ་བ་ཡིས། །དཔལ་བླ་མེད་བྱང་ཆུབ་མྱུར་ཐོབ་ཤོག །

སྐུ་ལ་མཚན་དཔེའི་དཔལ་འབར་ཞིང་། །གསུང་དབྱངས་ཡན་ལག་དྲུག་ཅུས་བརྒྱན། །ཐུགས་ནི་ཟབ་ཡངས་མཁྱེན་བརྩེའི་གཏེར། །དཔལ་ལྡན་བླ་མའི་བཀྲ་ཤིས་ཤོག །

འདི་པཎ་ཆེན་དགེ་འདུན་གྲུབ་ཀྱིས་མཛད་པའོ། །