Кореяда алғаш рет қазақ тілінде шешендік сайыс өтті

Құрылтай аясында «Отандастар қоры» КеАҚ пен Қазақстан Республикасының Корея Республикасындағы Елшілігінің ұйымдастыруымен шетелде алғаш рет қазақ тіліндегі шешендік өнер сайысы өтті. Іс-шара Сеул қаласындағы Хангук шет тілдер университетінде ұйымдастырылды.

Сайысқа қазақ тілі мен мәдениетіне қызығушылық танытқан жеті студент қатысып, екі ел арасындағы мәдени байланыс, салт-дәстүрлердің ұқсастығы және Абай Құнанбайұлының шығармашылығы туралы мазмұнды баяндамалар жасады. Қазылар алқасына Қазақстанның мәдениет қайраткері Қанат Айтбаев төрағалық етті.

Бірінші орынды Хангук шет тілдер университетінің 2-курс студенті Ли Со Ён жеңіп алды. Жеңімпазға Air Astana әуе компаниясы мен Pana қонақүйлер желісінің демеушілігімен Сеул–Алматы–Сеул бағыты бойынша ұшақ билеті және Қазақстандағы туристік орындарда орналасқан қонақүй ваучері табысталды. Бұл сыйлық Ли Со Ёнға қазақ тілін одан әрі жетілдіріп, еліміздің мәдениетімен жақынырақ танысуға мүмкіндік береді.