Thinlung Sungih Nganmi Pathian Ih Daan - Uk Lian

#ukliansermon #Ukliansermon2025

Thinlung Sungih Nganmi Pathian Ih Daan

Kawhhran, khawtlang, khua le rampi kip in daan kan nei. Pathian khalin a mipi hrangah daan a nei. Pathian daan cu kan hrang ṭhatnak dingah tuahmi asi. A thlun duhlotu cu mualphonak, hremnak leh thihnak tiang an tuarih a netah Pathian thawn ṭhenawknak tiang a thleng. Pathian daan a thluntu cun an nun zalam tluan ah nun lungawinak le damsaunak tiang an co.

Pathian ih daan cu a famkim ih thinlung a damter ih a thianghlimmi asi fawn (Saam 19:7-8). Pathian ih daan cu lam hmuhtu le mitkhua vangtertu asi. A daan zaten thlun tlak le rinsantlakmi asi (Saam 119). Pathian ih thukam pahra, a daan le duun dangdang cathianghlim ih kan hmuhmi pawl, Pathian ih ṭongkamsuak pawl cu kan zalam tluangnak dingih tuahmi asiih Pathian thawn kan pehzomawknak dingih tuahmi khal asi.

Pathian duh zawng le a daan fiangten a theilotu cu olsamten an hloral thei (Hosea 4:6). Judah Siangpahrang Josiah in Pathian ih daan a hmu ih a thlun tikah Judah mipi Jerusalem ih umtupawl hrangah Pathian hnenah kirsalnak ah an hmangih an lam a tluang sal (2 Chronicles 33:21-35). Pathian hmaiah nun lungawinak nei in le, hnangamnak thawn caan an hmang thei sal.

Israel siangpahrang tuantu dingin cun Pathian daan hi felfaiten a thlunnak dingah daan bu a kutin a ngan dingih a ngan ṭheh ah a nun sung a siarin a thlun bet ding. Cutiih a tuahnak ding san cu, a hruaimi mipipawl hnakin a ṭha hleice lo ti a hmuhawknak dingah asi (Deu. 17:1-20). Curuangah prophet Jeremiah hnenah Pathian in hitin a sim “Zokhalin uar a duh asile Keimah I theihnak le I theihthiamnak in uaraw sawn seh! Ziangahtile ka duhdawtnak cu cem ni a neilo (Jer. 9:23-24) ti’n a sim.

Israel mipi hrangah daan hi lungphek parih ngan le casual parih nganmi daan pawl an thlun tikah an hlawh a tling ṭheu nan, a thlun famkim le a thlun kumtluan an um thei ṭheu lo. Curangah, Pathian in lungphek parih ngan siloin nan thinlung sung, nan ruahnak sung rori ih ka daan ka ngan ni ara thleng ding a timi cu kan Bawipa Jesuh Khrih ah a famkim ter asi (Jer. 31:33), (Heb. 10:16).

Pathian nung a zumtu, Thlarau Thianghlim ih a cencilhmi zumtupawl cu a hramhram in Pathian thu thlun tumnak nei nawnlo in, Pathian thu thlun le Pathian duhzawng ih nun ding cu an nunnak ih tumtahbikmi ah a cang. Curuangah Pathian Thlarau Thianghlim ih a hruaimipawl, Jesuh Khrih ah hrin tharsaalmi pawlih thinlung sungah Pathian ṭihzahnak, Pathian daan thlun duhnak in a khat (2 Cor. 3:3).

Jesuh Khrih thawn tonawk le nuntlang ahcun nun hin sullam a neiih, Pathian daan, Pathian thupek, Pathian ih thu thlun, Pathian duhzawngih nun hi thil harsa tuk asi lo. Daan hi thlun famkim theilo kan sivekin Pathian in zangfahnak sawn in a thlengih, cui a zangfahnak thuthangṭha kan theih fiang hnu ahcun in zangfahtu Pathian duhzawng ih nun hi a nuammi nun lungawinak arak si. Cun, Pathian zangfahnak, Jesuh Khrih hmangih kan ngah zo ruangah tu ahcun kan Bawipa Jesuh Khrih hrang nungin kan minungpi pawl duhdawt ding hi kan tumtah tumbik arak si.

YouTube:
C-Ministry Music-    / cministrymusic  
C-Ministry Sermon-    / cministry  

FB & IG
Facebook Page:   / christcanchange  
Instagram IG:   / c.ministry19  

Email:
[email protected]