Атырауда жоғалып кеткен бүтін бір отбасы мүшелерінен әлі ешқандай хабар жоқ

Атырау облысында бүтін бір отбасының алты адамы жоғалды. Қызылқоға ауданы Жангелдин ауылының тұрғындарынан бір айдан бері хабар жоқ. Туыстары қазір іздестіріліп жатқан Қарабалиндер қорадағы малдарын сатып, соңғы айдың зейнетақысын да алып кеткендерін айтады. Бірақ үйіндегі дүние-мүлкі, тоңазытқыштағы тағамдары сол күйі тұр. Тәртіп сақшылары адам өлтіру бабымен іс қозғап, барлық қаланың Ішкі Істер органдарына сұрау салған. Бірақ ерлі-зайыптылар мен екі қызы, бір ұлы және күйеу балалары туралы әзірге іліп алар ақпарат жоқ.
Үй жинақы. Дүние-мүлік орнында. Тоңазытқыштағы сүт-майлары да қойылған күйі тұр. Жоғалған Қарабалиндер отбасының баспанасына кірген жақындары аң-таң. Олар барлық затын тастап, алты бірдей адамның ізім-ғайым жоқ болып кетуі мүмкін емес дейді. Айтуларынша, бұл жерде бір гәп бар.

АСИЛА МҰҚАНҒАЛИЕВА, жоғалғандардың туысы:
Ауыл адамдары ноябрьде байқаған. Енді кеше хакерлер қараса олар күйеумен қыз Жангелдин ауылға барған деп отыр. Бесіне дейін сонда болған. Содан кейін аға-жеңгем үшті күйлі жоғалған. Білмейміз немен кетті, немен қойды. Құдағидың үйіне бардық сұрадық қыз бен күйеу қайда деп сонда құдағи балам Ақбаянды қаратуға алып кетті, шығып кетті,- ноябрьде шығып кетті, -деді. Содан ноябрдің 11 хабарласты деп айтты құдағиым содан хабар жоқ.
Бұл жаңалық тұтас Жангелдин ауылын алаңдатқан. Көршілері ең алдымен үйдің жалғыз ұлы Наурыз Мұқанғалиев Ақтаудан жұмыс таптым деп кетіп, қайтып оралмаған. Ал, қараша айында отағасы Мақсот Қарабалин жұбайы мен мүгедектігі бар қызын алып, дәрігерге қаралуға шығып кеткен көрінеді. Кейін Мақсоттың қызы мен күйеу баласының да хабар-ошарсыз кеткені белгілі болыпты. Ал, құда-құдағиларының ұлын іздемей, полицияға да арыз түсірмеуі жақындарының көңілдеріне күдік ұялатыпты.

АСИЛА МҰҚАНҒАЛИЕВА, жоғалғандардың туысы:
Біз еще айтып кеттік арызды неге түсірмей отырсыңдар деп, түсірем деп әлі түсірмеді. Енді хакер Атырауда күйеу баланы нетіп беріп отыр. Енді точно білмеймін. Іздеуді тоқтатып салмасын дейміз, қашан табылып ортамызға тірі әкелсін өлі әкелсін тірі табылса екен деп тілеймін. Соны тек тоқтатып тастамаса екен деп тілеймін.
Полиция жоғалғандар туралы арыз тек он күн бұрын ғана түсті деп отыр. Соған қарамастан алты адамды іздеуге барлық күштік құрылымдар жұмылдырылған. Болжам бойынша олар Өзбекстанға кетуі мүмкін.

ҚҰТТЫБАЙ САДЫҚОВ, Атырау облысы полиция департаменті бастығының бірінші орынбасары:
Қазіргі таңда іздестіру жұмыстары жүріп жатыр. Республика көлемінде бағыт-бағдар берілді. Жүрген жерлерін анықтау мақсатында облыс емес, тек қана республиканың түкпір-түкпірінде іздеу шаралары басталды. Емделу орындары, басқа да жеке де бәрі тексерілуде. Запрос бәрі берілді. Азаматтардың құрылғылары Қазақстан аумағынан қосылып өшкендері анықталды.

Тәртіп сақшылары тұрғындарды тек ресми ақпарат көздеріне ғана сенуге шақырады. Өйткені жалған мәліметтер тергеу жұмыстарына кедергі келтіруі мүмкін.

#Информбюро #атырауоблысы #жоғалғанотбасы #Жангелдинауылы #31канал