#شيلة

السحر ما حكمه التحريم في كل حال
لا صار ما اثّر على المسلم ولا كفّره

الشعر سحر المسامع والقلوب الحلال
ماهوب سحرٍ يفرّق بين رجل ومره

سر العلاقه ما بين الشعر والاحتفال
مثل العلاقه ما بين الطيب والمبخره

الاول ليا صدح عطر سموع الرجال
والآخر يفوح فالمكان ويعطّره

ماقبل حسن الضيافه غير حسن القبال
خبز ابلج ولا بعير وجيهٍ مكشره

الضيف فالوجه قدره مثل قدر السبال
وجهٍ ما يحشم ضيوفه ما يحشم شعره

حياكم الله على فالٍ بعده العقال
الفال طيبٍ وراه دلالٍ مبهره

وعقاله اللي يادوبه بالشناكر يشال
من كثر سمنه يسيل من صحنه لسفره

في ضيافة اللي لضيفانه يهين الريال
حصيله اول نهاره فآخره يخسره

وان كان جاء فالعلوم علوم لا قال طال
وليا ضرب فالثرا الممطور ثار غبره

ابوي مثقاب قدمي فالعلوم الجزال
عساني اكون قدامه على المقبره

ادر ان مدح الابو والاخو موضع جدال
ولا صار قول وفعل ما احدٍ بمستنكره

اللي تعلّم دروسه من دروس الليال
قلمه الاحداث وفجوج الفضا دفتره

مدحٍ بليا فعل مثل الاكل بالشمال
ابن القبيله ماهو مقطوع من شجره

شليويح ماعذربه مدحه هذا اقرب مثال
مدحه لروحه يزيد المفخره مفخره

واللي يلاوي قحوم الخيل يوم القتال
مدحه لروحه يخلي للقصيد ثمره

المدح تاج الفعول اللي تعز الرجال
وفي غير راعيه مثل السرج فوق بقره

واليوم عيدٍ ماهو محتاج شوف الهلال
التاسع من اربعه هجري وليل اعشره

يا جعل ما مقتفيه إلا رفاه وعيال
في بيتٍ الله يبارك فيه ويعمّره

افرح وانا معك يا ضبيّان لا جا المجال
الاخو ما يترك عن اخوه ما يذخره

انا اعتبرني سندك بحال والا بمال
من ضحكة السن لين يجي لها غرغره

وانته سمي جدك اللي يوم غنا وقال
بيت ليا اتلى ولد كل يبا يذكره

أنا ضبيّان والضايق بعينه خلال
واللي يطول سقم عينه يطول اسهره

شيخٍ لربعه ذوي مفرز سوات الظلال
وربعه ذوي مفرز حزامٍ يشد أظهره

ذخاير اللي ليا ردوا لبيض السلال
في ساعةٍ يرخص الرجال دم انحره

ربعي قبيلة ذوي زراق مثل الجبال
الضلع ما طاح لو يطيح منها احجره

قبيلةً لو تشوف الموت قالت تعال
بالموت دون الكرامه كنّها مبشره