Ashough Nazeli - Im sourb matour (Armenian song)

Աշուղ Նազելիի «Իմ սուրբ մատուռ» երգն է՝ հեղինակի կատարմամբ: Այն առաջին անգամ ներկայացվել է 2000 թվականին «Սայաթ-Նովա» համահայկական երգի մրցույթին, երբ Նազելի Գրիգորյանն առաջին անգամ ելույթ է ունեցել «Սայաթ-Նովա» աշուղական երգի անսամբլի հետ՝ առաջին անգամ հանդես գալով Աշուղ Նազելի անվամբ: Այդ ժամանակ «Իմ սուրբ մատուռ» երգը մրցանակի արժանացավ և ընդգրկվեց տարվա լավագույն երգերի տասնյակի մեջ:
Դրանից ի վեր այս երգը շատ հաճախ է կատարվում՝ տեղ գտնելով տարբեր անսամբլների երգացանկում:

«Իմ սուրբ մատուռ»-ը Աշուղ Նազելիի երախայրիքն է, այն առաջին երգը, որ որպես այցեքարտ, ճանաչում բերեց հեղինակին հանրության շրջանում:
«Այս երգն իմ աղոթքն է: Իմ ծննդավայրում մի փոքրիկ մատուռ կա, - պատմում է Աշուղ Նազելին, - ես երեխա ժամանակից միշտ գնում եմ այնտեղ: Եվ երգը գրելիս էլ հիշում էի, թե իմ տատիկն ինչպես էր մի գունավոր սիրուն աքլոր թևի տակ դրած, մեզ՝ երեխաներիս էլ իր հետ վերցրած, յոթ անգամ խաչի բոլորը պտտվում և մատաղ անում: Ու ես շատ տպավորված էի այդ տեսարանով: Հիշում եմ նաև նրա մրմունջը, թե ինչպես էր ասում. «Տեր Աստված, շառից, փորձանքից հեռու պահես իմ երեխեքին»: Ու այդպես այս հիշողությունը դարձավ երգ:

Ինչպես խոստովանում է Աշուղ Նազելին, «Շանթ» ՀԸ «Ժողովրդական երգիչ» նախագծում նորովի մատուցվեց այս երգը (ինչպես նաև նրա հեղինակային այլ երգեր)՝ ավելի մեծ ճանաչում բերելով իրեն: Ժյուրիի անդամները նույնիսկ կատակում էին, որ մասնակիցներից յուրաքանչյուր երկրորդը երգում է «Իմ սուրբ մատուռ»-ը:
2021 թվականի աշնանը երիտասարդ երգիչ Ռազմիկ Բաղդասարյանի առաջարկով այս երգը հեղինակը կատարել է նրա հետ՝ նոր գործիքավորմամբ, որը շուտով կներկայացվի հանրությանը:
Ի դեպ, 2017 թվականին լույս է տեսել Աշուղ Նազելիի երգերի ժողովածուն, որը նույնպես կրում է «Իմ սուրբ մատուռ» վերնագիրը:
Երգի խոսքերը՝

Մի հին խաչքար՝ ուսին փոշի դարերի,
Մի ծեր խաչքար՝ գամված ահել քարերին,
Փոքրիկ մատուռ՝ օծված բույրով մոմերի,
Անխոս վկան՝ վարգով սուրող օրերի:

կրկներգ.
Իմ սուրբ մատուռ, ոտքդ եկա ես նորից,
Ինձ ազատիր չարից, մեղքից, փորձանքից,
Մի թող հանկարծ, որ հավատս երերա,
Իմ սուրբ ընկեր, եղի՛ր նորից կարեկից:

Դու մի փոքրիկ, մի աննշան սրբատեղ,
Ծարավին ջուր և հիվանդին՝ ճար ու դեղ,
Մոլորվածին՝ դու լույս, վառվող մի կանթեղ,
Մաքրամաքուր մի հանգրվան դու զորեղ:

Իմ խեղճ նանի համբույրներից խունացած,
Խաչքարիդ մոտ մոմ կվառեմ խոնարհված,
Ու ջերմեռանդ իմ աղոթքը սրդողած
Դու կիմանաս, մատուռ, ու մեկ էլ Աստված:

կրկներգ.
Իմ սուրբ մատուռ, ոտքդ եկա ես նորից,
Ինձ ազատիր չարից, մեղքից, փորձանքից,
Մի թող հանկարծ, որ հավատս երերա,
Քո Նազելուն եղի՛ր նորից կարեկից: