محجوب شريف - أموت لا أخاف

هذه القناة على اليوتيوب هى محاولة للتوثيق لعيون الغناء السودانى.. نرحب بمقترحاتكم
محجوب شريف...
محجوب نضيف..
محجوب عفيف..
محجوب وطن .......
لا دنست إيدو الخيانة
ولا عزايمو في يوم رخن
ما بين ثنايا الروح بدفق حن
وفي الخاطر سكن..
محجوب وطن ..
تلقاه في عيون التعابى
المعدمين
تلقاه دمعة ونازلة في خد الغلابى الحائرين
محجوب تواريخنا العظيمة
ومجدنا الحافظو الزمن
محجوب شريف
محجوب وطن...
كان في زمان الفرقة معلم للتوحد والفخار
كان للبزيدو العتمة في وش الوطن
طلة نهار
كان المشاعر الطيبة
في قلب المحن
محجوب وطن...
جيناك نفتش فيك عننا عن شليل
عن عزة ...عن تاريخ عظيم
لا اتهز لا طلاه ليل..
جيناك وعارفين إنو في جواك وطن
جيناك وعينينا البتشتاقك حضور
فوقك بكن..
محجوب وطن ...
شاعر ..
شاعر يفيض كالنيل غنى
ويدي المعالم سودنة
شاعر بحس بي ضيق بلادنا
وهمنا
شاعر قدر ما ضاق عذاب
لا اتهز عودو ولا انتنى
شاعر موشح بالنضال
شارب المآسي وحاضنا
عز الشدائد والهموم
نور حياتنا ولونا
محجوب غنى الفجر الطروب
محجوب فؤادنا ودمنا ....
فارقتنا وخليتنا بعدك
نبكي بالدمع الغزير
حسرة وضنا
تبكيك اراضي الطين
بيوتات المحنة وسوسنا
تبكيك عيونا الما لقت
بعدك سعادة ولا هنا
تبكيك
ملايين البيوت
من شعرك اللي الروح دنا

تبكيك بنيات الصباح
يوم ضيك الفارع فنى
محجوب وطن عز المحن
محجوب أبونا وعمنا.
.