Белгілі суретші, педагог Кошабаева Әлия Туматайқызының дербес көрмесі ашылды.

2026 жылғы 9 қаңтар күні сағат 16:00-де Ақтөбе облыстық өнер музейінде суретші, педагог Кошабаева Әлия Туматайқызының дербес көрмесі ашылды.

Әлия Кошабаева — 1984 ж 9 мамырда, Әйтеке би ауылында дүниеге келді. «Қамқорлық» оңалту орталығында педагог қызметін атқарады және көпбалалы ана. Әлия Кошабаева бейнелеу өнері және сызу мамандығы бойынша кәсіби білім алған, көп жылдан бері балалармен, соның ішінде инклюзивті балалармен шығармашылық бағытта жұмыс істеп келе жатқан суретші-педагог. Көрмеде автордың заманауи көзқараста орындалған фотосуреттері мен шағын форматтағы көркем жұмыстары ұсынылады. Шығармаларда күнделікті өмір сәттері, көңіл күй, ішкі сезім мен қоршаған ортаға деген жеке көзқарас бейнеленген. Автор қазіргі цифрлық мүмкіндіктерді пайдалана отырып, телефон арқылы түсірілген фотосуреттерді шығармашылық құрал ретінде ұсынады.
Көрме аясында қосымша бөлім ретінде Әлия Кошабаеваның шәкірті, 13 жастағы жас суретші Умбетова Даринаның жұмыстары көпшілік назарына ұсынылады. Дарина 7 жасынан бастап сурет салады, әсіресе адам беті, эмоциялар, қозғалыстағы кейіпкерлер мен мультяшты образдарды бейнелеуге ерекше қызығады. Ол түрлі шығармашылық байқауларға қатысып, жүлделі орындарға ие болған, сондай-ақ «Балапан» телеарнасы ұйымдастырған байқауда жеңіске жетіп, 3D мультфильм жасау бойынша білім алған. Даринаның туындылары — баланың ішкі әлемі, сезімі мен қиялының шынайы көрінісі.
Бұл көрме — ұстаз бен шәкірт арасындағы шығармашылық байланысты, тәжірибе мен жас қиялдың үндесуін көрсететін мәдени жоба.

#ақтөбе #музей #мәдениет #painting #творчество #шығармашылық