គ្រីស្ទាន និងការផ្សាយដំណឹងដែលពឹងផ្អែកលើខ្លួនឯង

គ្រីស្ទានបច្ចុប្បន្ននេះ Modern Church ពួកគេផ្សព្វផ្សាយដំណឹងល្អដោយពឹងផ្អែកទៅ ភាគជោគជ័យ ទ្រព្យសម្បត្តិ និងភាពឡូយឆាយ។ល។ ពួកគេមិនចង់និយាយពីការផ្លាស់ប្រែចិត្ត ការរស់នៅបរិសុទ្ធ ការតយុទ្ធនឹងអំពើបាប ការរស់នៅដែលកោតខ្លាចព្រះទេ ពីព្រោះពួកគេគិតថា បើនិយាយទៅមនុស្សនឹងមិនសប្បាយចិត្តទេចំពោះការទាំងនេះ ទាំងគ្រីស្ទានដូចគ្នា និងមិនជឿផងដែរ។
ពួកគេគិតថា គ្រីស្ទានគួរតែឡូយឆាយ និងមានទ្រព្យសម្បត្តិជាច្រើន គ្រីស្ទានខ្លះមិនមានទ្រព្យសម្បត្តិតែត្រូវសំញ៉ែងហាក់ដូចជាមាន ព្រោះបើពួកគេឡូយឆាយនោះ នោះលោកីយ៍នឹងចាប់អារម្មណ៍លើពួកគេ ហើយពួកគេនឹងគេចផុតពីការបៀតបៀនផ្សេងៗផងដែរ។ ពួកគេគិតថាខ្លួនពួកគេផ្ទាល់មានសមត្ថភាពគ្រប់គ្រាន់ក្នុងការបំផ្លាស់បំប្រែមនុស្ស ដោយមិនចាំបាច់ប្រើប្រាស់ព្រះបន្ទូល ឬការប្រកាសចំណុចស្នូលនៃដំណឹងល្អទៅកាន់មនុស្សនោះទេ។ ពួកគេគ្រាន់តែរៀបចំយុទ្ធសាស្ត្រ នឹងការរៀបចំព្រឹត្តការណ៍បែបរំភើបៗ មានក្រុមតន្ដ្រីពូកែៗ នឹងមានក្រុមដឹកនាំថ្វាយបង្គំស្អាតៗ នោះមនុស្សនឹងចាប់អារម្មណ៏ជាង។ នៅក្នុងការប្រជុំថ្វាយបង្គំផ្ទាល់ ពួកគេថែមទាំងមិននិយាយឬ អធិប្បាយពីឈើឆ្កាង ការរងទុក្ខ អំពើបាប ការលឺឆ្កាងដើរតាមព្រះគ្រីស្ទទេ។ល។ ពួកគេនិយាយតែចំនុចដែលល្អៗ ដូចជា៖ ព្រះជាសេចក្ដីស្រឡាញ់ ព្រះសប្បុរស ព្រះមានសេចក្ដីមេត្តាករុណា ព្រះជាអ្នកគង្វាលល្អ ព្រះអង្គមានផែនការល្អសម្រាប់លោកអ្នក។ល។ ពួកគេដកចេញចោលនូវចំនុចផ្សេងៗទៀត ដែលព្រះគម្ពីរបង្រៀនថា ព្រះអង្គមានសេចក្ដីក្រោធ ព្រះអង្គនឹងជំនុំជម្រះមនុស្សមានបាប ព្រះអង្គនឹងបោះមនុស្សទៅស្ថាននរក។ល។ ប្រសិនបើពួកគេនិយាយបែបនេះ នោះពួកគេនឹងបាត់បង់ប្រជាប្រិយភាព។
ក្នុងព្រះគម្ពីរមិនបានប្រាប់យើងពីយុទ្ធសាស្ត្រលម្អិត នឹងរបៀបផ្សេងៗក្នុងការឈោងចាប់មនុស្សទេ ហើយព្រះគម្ពីរមិនបារម្ភថា នៅពេលដែលគ្រីស្ទាននៅម័យនេះផ្សាយដំណឹងល្អទៅមនុស្ស មនុស្សនឹងបដិសេធពួកគេ ដ្បិតរឿងនេះ នឹងកើតឡើងតែម្ដង។
ព្រះយេស៊ូវផ្ទាល់ត្រូវបានមនុស្សស្អប់ដោយសារទ្រង់យាងមកគឺបង្ហាញពីការការក្រក់របស់ពួកគេ យ៉ូហាន ៧ៈ៧ ។
ព្រះអង្គមិនផ្ដោតទៅលើភាពជោគជ័យ ឬទ្រព្យសម្បត្តិរបស់ទ្រង់ទេ ក្នុងការធ្វើបេសកម្មផ្សាយដំណឹងល្អ ហើយក៏មិនខ្វល់ថា ការប្រកាសរបស់ទ្រង់ ពីព្រះរាជ្យនៃព្រះ ការផ្លាស់ប្រែចិត្តពីអំពើបាបនឹងការដើរតាមទ្រង់ នឹងមានមនុស្សប៉ុន្មាននាក់ដែលឯកភាព នឹងទទួលជឿនោះដែរ។ ព្រះអង្គយាងមកគឺដើម្បីសង្គ្រោះមនុស្ស នឹងប្រាប់មនុស្សអោយប្រែចិត្ត ដ្បិតនគរស្ថានសួគ៏ជិតមកដល់ហើយ! ការប្រកាសដំណឹងល្អរបស់ព្រះអង្គគឺបែបសេចក្ដីពិត ចេញពីព្រះឪស្ឋទ្រង់មក មិនតម្រូវចិត្តអ្នកស្ដាប់នោះឡើយ។ ការផ្សាយដំណឹងល្អគ្រីស្ទានយើងគឺយើងត្រូវធ្វើដូចជាព្រះយេស៊ូវនឹងពួកសាវករបស់ទ្រង់ យើងផ្សាយដំណឹងល្អទៅកាន់មនុស្សមិនមែនតម្រូវចិត្តមនុស្ស ឬបារម្ភខ្លាចគេមិនជឿនោះដែរ។ អ្វីដែលយើងត្រូវប្រកាសគឺប្រកាសពីដំណឹងល្អដ៏ពិតដែលមាននៅក្នុងព្រះបន្ទូលទ្រង់ នោះដំំណឹងល្អ ឬព្រះបន្ទូលព្រះផ្ទាល់នឹងធ្វើការក្នុងចិត្តរបស់ពួកគេ ផ្លាស់ប្រែពួកគេតាមរយៈសារនៃព្រះបន្ទូលនោះ រឿងពួកគេជឿ ឬមិនជឿជារឿងរបស់ពួកគេជាមួយព្រះប៉ុណ្ណោះ សម្រាប់យើង យើងត្រូវស្មោះត្រង់ក្នុងសេចក្ដីពិត ការជាប់លាប់ក្នុងសេចក្ដីអធិស្ឋាន និងព្រះបន្ទូលទ្រង់។