«Ош сила» лотереясынын уюштуруучулары камакка алынды

Бишкекте мыйзамсыз лотерея өткөргөн уюшкан кылмыштуу топтун ишмердүүлүгү токтотулду, деп билдирди УКМК.

«Кылмыштуу топ уруксат документтери жок, Кыргыз Республикасынын лотерея жөнүндө мыйзамын бузуу менен «Ош сила» лотереясын өткөрүү менен алдамчылык кылганы аныкталган.

Лотереяда кыймылдуу жана кыймылсыз мүлк (унаа, батир, жер) түрүндөгү кымбат-баалуу байгелер ойнотулган. Бирок бардык байге алдын ала камдалган адамдарга берилип, мүлк лотереянын уюштуруучуларында калган.

Кеңседе жүргүзүлгөн тинтүү иштеринин натыйжасында буюм далилдер — лотерея билеттерин басып чыгаруучу принтер, барабан, байге катары колдонулган автоунаалар, ошондой эле мыйзамсыз иш-аракетти тастыктаган документтер табылды.

Бул факт боюнча алдамчылык беренеси менен кылмыш иши козголуп, уюштуруучулар К.у.К. жана Б.М.А. кармалып, №21 тергөө абагына киргизилди», - дейт УКМК.