እግዚአብሔር የእንደገና አምላክ መሆኑን ማሳያዋ ምህረት. . . . ክፍል አንድ (Pastor Tezera Yared)

እግዚአብሔር የእንደገና አምላክ መሆኑን ማሳያዋ ምህረት....
እህት ምህረት ህሩይ ትባላለች ከልጅነቷ ጀምሮ በእግዚአብሔር ቤት ውስጥ ያደገችና በአገልጋይነት ለረጅም ጊዜያት ያሳለፈች እንስት ነበረች።
በኮልታፋ አፏ ስለ ኢየሱስ ክርስቶስ አዳኝነት ከመናገር ጀምሮ በርካታ መልካም ትዝታዎችን በቤተ ክርስቲያን ውስጥ አሳልፋለች።
እነዛ መልካም ትዝታዎች እና በልጅነቷ የነበራት የክርስቶስ ፍቅር ግን እያደገች በመጣች ቁጥር እና ነገሮችን መለየት እየቻለች በመጣች ቁጥር አብሯት አልዘለቀም።
በተለይ የፕሪፓራቶሪ ቆይታዋን አጠናቃ ዩንቨርሲቲ ከገባች ቀን ጀምሮ በርካታ የወጣትነት አስከፊ ፈተናዎችን አሳልፋለች።
ቀስ በቀስ እየቀዘቀዘ የመጣው በልቧ ውስጥ ልትክደው የማትችለው የእግዚአብሔር ፍቅር ፍፁም ሊባል በሚችል ሁኔታ ጨልሞ ያቺ በልጅነቷ በእግዚአብሔር ፍቅር ንድድ ብላ ያደገችው ምህረት ሙሉ በሙሉ አለማዊ ሆነች።
ያንን አጋጣሚ ተጠቅሞም ዲያቢሎስ ህይወቷን ምስቅልቅሉን አወጣው። በልጅነት እድሜዋ ጌታ ሆይ እወድሀለው ፍቅርህ ልዩ ነው ልክድህ አልችልም ብላ የዘመረችበት አፏ ድንገት ሳይታሰብ በሬጌ እና ራፕ ሙዚቃዎች ተሞላ ።
በትንንሽ እግሮቿ እየዞረች ወንጌል የሰበከችባቸውን ሰፈሮች ሌሊት በአልኮል እና በሲጋራ ሱስ ተጠምዳ ረገጠቻቸው።
ኢየሱስ ፍቅር ነው:: በንፅህና እናገለግለዋለን ብለው አብረዋት ቃል የተገባቡ የልጅነት ጓደኞቿን ማሪዋና እና ኮኬይን እንዴት በቤት ውስጥ እንደሚያድግ የሚያሳዩ መንገድ አሳች ጓደኞቿን መርጣ ተለያየቻቸው።
ሌሊት እየዞሩ ጭፈራ ቤትን ማካለል፣ አዳዲስ የወጡ ቶፕ 10 (Top Ten) የሆሊውድ ዘፈኖችን አሳዶ ማዳመጥ የእለት ስራዋ ሆነ፣ ከቅዱሳን ህብረት ይልቅ በአዝማሪ ቤት እና በሀሺሽ ፍቅር ካበዱ ጓደኞቿ ጋር ውሎዋን ማሳለፍ መረጠች።
የሙዚቃ ፍቅር፣ የሀሺሽ ልምምድ፣ በመጠጥ የታጀቡ የስካር ሌሊቶች በመስቀል የተሰራውን የክርስቶስን ጥልቅ ፍቅር አስክዶ ህይወቷን ምስቅልቅሉን አወጣው።
በሌሊት እየዞሩ መከራዎችን ማየት፣ በመኪና አደጋ አብረዋት የሆኑ አለማዊ ጓደኞችን አሰቃቂ በሆነ መልኩ በመለያየት በቃልኪዳን የታሰረውን የቅድስና ህይወት በማፍረስ ትንሿ ምህረት አስከፊ ጊዜያትን አሳለፈች።
በተኩላዎች መሀል ገብታ በእግዚአብሔር ቤት ውስጥ ያደገችው ትንሿ በግ ትልልቅ መከራዎችን አየች። በዚያ መሀል ግን እናቷ የልጇ መጥፋት ግድ ይላት ስለነበር ጌታ ሆይ በምህረት ላይ ምህረትህ ይውረድ እያለች ትፀልይ ነበር።
ፀሎቷም ተሰማና እግዚአብሔር ምህረትን ከሞት አፍ ለይቶ አወጣት።
ያኔ ግን ወደ ቤቷ ስትመልስ በ2 እግሯ ረግጣ በወጣችበት መልኩ አልነበረም።
በአጋጣሚዎች መሀል በተፈጠረ ስህተት በተከሰተባት የማህፀን ውጪ እርግዝና እራሷን ስታ በከፍተኛ ስቃይ ውስጥ ሆና በጉልኮስ እገዛ ነፍስ ውጪ ነፍስ ግቢ ስቃይ ላይ ሆና ነበር።
በዚያ ሁኔታ ውስጥ እያለች አጥብቃ ስትፀልይላት የኖረችው እናቷ ሆስፒታል ከመውሰድ ይልቅ በአታላይ አለም ተስባ የተወሰደችባት በጓን ተነጥቃ ከተወሰደችበት ቤተ ክርስቲያን ልጄ ትፈወሳለች ብላ ጉልኮስ እንደተሰካባት ተሸክማ አምጥታት የቤተ ክርስቲያናችን ዋና መጋቢ እና ባለራዕይ መጋቢ ተዘራ ያሬድ በጉባኤ መሀል ፀልዮላት ሙሉ በሙሉ ተፈወሰች።
ጌታ የሰጣት የመጨረሻ እድሏ እንደሆነ እና ከዚህ በሗላ የእግዚአብሔርን ቤት ጥላ የምትወጣ ከሆነ ክፉ ነገር እንደሚገጥማት አሳስቦ የንስሀ ቃል አስገብቷት ከመድረክ ወረደች።
ከዛን ቀን በሗላ እስከዛሬዋ ቀን ድረስ በእግዚአብሔር ቤት ውስጥ በንፅህና እና በማስተዋል ፍፁም በሆነ ጤንነት ውስጥ አለማዊ ምኞትን እና ፍቅርን ክዳ በመሀከላችን ጌታን እያመለከች ትገኛለች።
ሙሉ በሙሉ በቅንነት እና በግልፅነት የእድሜ እኩዮቿ እንዲማሩበት ብላ ከላይ በዝርዝር የተገለፀውን የምስክርነት ቃል በጉባኤ መሀል ያለ ማንም ግፊት በፍቃደኝነት ሰጥታለች ክብር ሁሉ ለኢየሱስ ይሁን።