Millət vəkili Orhan Erdem: "Azərbaycanla Türkiyənin mövqeyi ortaqdır: həm güclü, həm də haqlısan"

“Azərbaycan xalqının lideri cənab İlham Əliyevi və onun həmkarlarını, Azərbaycan ordusunu səmimi qəlbdən təbrik edirik. Otuz ildən çox müddətdən sonra, ərazisinin təxminən iyirmi beş faizi Ermənistanın işğalı altında qaldıqdan sonra bunu böyük bir qələbə ilə, daha sonra iyirmi dörd saatlıq hücumla müəyyən bir nöqtəyə çatdırdılar və çox qısa müddətdə bu torpaqları qurmağa başladılar. Gedib bu yerləri gördük. Belə bir şey nadir hallarda olur. O yollar, hava limanları geri qayıdanlar üçün təmin ediləcək. Evlərin, universitetlərin və məktəblərin açılışını gördük. Çox məmnun olduq. Böyük bir nümayəndə heyəti ilə səfər etdik. Həqiqətən də görməyə dəyər”.

Bu barədə Bizimyol.info xəbər portalına Türkiyə Cümhuriyyəti Böyük Millət Məclisi (TBMM) Türkiyə-Azərbaycan Parlamentlərarası Dostluq Qrupunun sədr müavini, AK Parti Konya millət vəkili Orhan Erdem danışıb. Millət vəkili qeyd edib ki, işğaldan azad edilmiş torpaqlarda əldə edilən böyük irəliləyişi öz gözləri ilə görüb.

Orhan Erdemin fikrincə, bu qələbə Türk dövlətlərində özünəinamı gücləndirdi.

“Azərbaycan təkcə o torpaqlarda həlak olan şəhidin və ya yurdundan didərgin düşən vətəndaşın haqqını almadı, eyni zamanda bütün Türk dövlətləri bir-birini qucaqlamaq üçün daha böyük fürsət qazandı. Türk Dövlətləri Təşkilatı bu qələbədən sonra mövqe qazandı. Əlbəttə ki, bu baxımdan qardaş ölkə Türkiyənin Azərbaycanla bir yerdə olması çox vacibdir. Cənab İlham Əliyevin sözlərini heç vaxt unutmayacağam. “Əgər bu qələbəni qazanmışıqsa, qardaşım Rəcəb Tayyib Ərdoğanın “əgər başqa bir ölkənin təyyarəsi havaya qalxarsa, bu müharibəyə qarışarsa, Türk təyyarələri havaya qalxmağa hazırdır. Onun "F16-lar buradadır” dediyi gün rahatladıq və qələbəni daha da qətiyyətli addımlarla qazandıq” demişdi. Bu sözlər həqiqətən də, bir-birimizi nə qədər daha çox qucaqlayıb, bir yerdə dayanmalı olduğumuzu göstərir”-deyə millət vəkili bildirib.

Orhan Erdem qeyd edib ki, hazırda dünyada ədalət, insan haqları, qanunun aliliyi yoxdur və Birləşmiş Millətlər Təşkilatı, Avropa İttifaqı kimi təşkilatların sadəcə adı var.

“Qarabağda haqlı olan Azərbaycanın ehtiyac duyduğu diqqət 3o il başqa istiqamətə yayındırıldı. Şimali Kipr Türk Cümhuriyyəti məsələsi 1974-cü ildən bəri uzanır. Güclüsənsə, haqlısan. Amma Azərbaycanın da, Türkiyənin də mövqeyi belədir: həm güclü, həm də haqlısan.
Digər ölkələrdən fərqli olaraq, bizdə insanları haqsız yerə, lakin güclü şəkildə əzən bir zehniyyət yoxdur. Bizim fərqimiz budur və bu baxımdan dünyanın hər bir ölkəsinə kömək etməyə çalışırıq. Azərbaycanın Pakistanla mövqeyi, Türkiyə, Azərbaycan və Pakistanın bu çərçivədə imzalayacaqları bir ittifaq bağlamaq qərarları... Bir sözlə, bu qələbə həm də Türk Dövlətlərinin qələbəsi sayılar, məncə”-deyə Orhan Erdem bildirib.

Orxan Musa - İradə Cəlil, Bizimyol.info

Hörmətli üzvlər, şahidi olduğunuz maraqlı hadisələrin video və fotolarını çəkib, bizə göndərə bilərsiniz: Whatsapp/Telegram: (+994) 50 498 73 68

"Bizim Yol" qəzetinin və "Bizimyol.info" xəbər portalının rəsmi hesabları:
"Bizim Yol" xəbər portalı - https://www.bizimyol.info
Facebook -   / bizimyolinfo  
Instagram -   / bizimyolinfo  
YouTube -    / bizimyolinfotv  
TikTok -   / bizimyolinfo  
X (Twitter) -   / bizimyolinfo  

Bizi izlədiyiniz və abunə olduğunuz üçün təşəkkürlər.