6. Patruna Ilqagħhom

Kull darba li l-vara ta’ Santa Katarina titfaċċa fid-daħla prinċipali tal-knisja tagħna, fil-ħruġ min-niċċa jew inkella fil-ħruġ tal-purċissjoni, fost il-ferħ u l-entużjażmu tal-poplu Żurrieqi nisimgħu t-taqbiliet ħelwin mimlija tifħir lil Qaddisa tagħna. Fuq kollox sħabna d-dilettanti tan-nar isellmulha wkoll b’salut, murtali u kaxxa nfernali. Dan jagħmluh b’tant dedikazzjoni u b’sogru liema bħalu. Matul iż-żminijiet kien hemm ukoll dawk li sfortunatament ħallewna waqt li kienu qed jaħdmu n-nar għall-festa għażiża tagħna. It-talba tagħna lil Santa Katarina tkun dejjem dik li tilqagħhom fi ħdanha u twassalhom fi ħdan il-Ħallieq.

O Patruna ilqagħhom, urihom it-triq,
Kun magħhom wassalhom fi ħdan il-Ħallieq,
Ħniena jkollok minn ruħhom, nitolbuk Mulej,
Ħarstek żomm fuq dawn magħna, fiż-żmien ‘l għadu ġej...

F’dan ir-raħal tagħna, mal-milja tas-snin,
Fil-jum ta’kull festa, ilkoll miġburin,
Il-ħruġ tal-istatwa nassistu u naraw,
Il-ħidma ta’ ħutna flimkien nammiraw

Bil-qniepen, bil-banda jinkiser is-skiet,
Titriegħed il-art u jinxtgħelu s-smewwiet,
Inħarsu l-fuq u b’dax-xogħol nitpaxxew,
U niftakru f’dawk li bin-nar hawn ħallew

O Patruna ilqagħhom, urihom it-triq,
Kun magħhom wassalhom fi ħdan il-Ħallieq,
Ħniena jkollok minn ruħhom, nitolbuk Mulej,
Ħarstek żomm fuq dawn magħna, fiż-żmien ‘l għadu ġej

F’jiem jissemmew baqgħu, fost l-agħar mill-ġrajjiet,
Fejn triegħed il-madwar, bla ma nxtegħlu s-smewwiet,
Fost ġiri, għajjat illi fena’ l-widnejn,
U dmugħ illi ġelben ma bosta ħaddejn

Marċ funebri tisma, li jaqsam il-qalb,
Tindaqq il-qanpiena u jingħad it-talb,
Fis-skiet tisma l-biki u miegħu l-ilfieq,
Ta’ qalb tant muġugħa, li bil-mod biex tfieq

O Patruna ilqagħhom, urihom it-triq,
Kun magħhom wassalhom fi ħdan il-Ħallieq,
Ħniena jkollok minn ruħhom, nitolbuk Mulej,
Ħarstek żomm fuq dawn magħna, fiż-żmien ‘l għadu ġej

U jerġa għal darb’ oħra tal-miċċa il-ħruq,
Fis joħroġ mill-kanna u jispara ‘l fuq,
U dan l-ispettaklu, in-nies jistennew,
Biex sena war’ oħra, dawn bih jitpaxxew

Niftakru f’dawk ħutna, li lkoll ħadmu sfieq,
Sabiex pjaċir jagħtu lin-nies taż-Żurrieq,
Ma ntebħux li tagħhom, kien wasal il-ħin,
Ħallewna nibkuhom, żgur qatt minsijin

O Patruna ilqagħhom, urihom it-triq,
Kun magħhom wassalhom fi ħdan il-Ħallieq,
Ħniena jkollok minn ruħhom, nitolbuk Mulej,
Ħarstek żomm fuq dawn magħna, fiż-żmien ‘l għadu ġej
Ħniena jkollok minn ruħhom, nitolbuk Mulej,
Ħarstek żomm fuq dawn magħna, fiż-żmien ‘l għadu ġej