တရားသူကြီးတွေဘာကြောင့် တရားခွင်မှာကျမ်းမကျိန်ရဲကြတော့တာလဲ | People's Spring

တရားသူကြီးတွေဘာကြောင့် တရားခွင်မှာကျမ်းမကျိန်ရဲကြတော့တာလဲ

ကဖေး/People's Spring

တရားစီရင်ရေးမှာနှစ်ပေါင်း ၁၀၀ ကျော်ကျင့်သုံးခဲ့တဲ့ ဥပဒေပုဒ်မတစ်ခုကို အာဏာသိမ်းစစ်တပ်အတွက် တာဝန်ထမ်းနေတဲ့တရားသူကြီးတွေက ဇန်နဝါရီလဆန်းမှာပယ်ဖျက်လိုက်ကြပါတယ် ။စစ်အာဏာရှင်အလိုကျ ပြည်သူထောင်ပေါင်းများစွာကို မတရားအမိန့်တွေချနေတဲ့ တရားသူကြီးတွေဟာ တရားခွင်ထဲက ကျမ်းပြန်စူးမှာကို ထိတ်လန့်တုန်လှုပ်နေကြပါတယ်။ ဒါကြောင့် တရားခွင်မှာ ကျမ်းသစ္စာကျိန်ဆိုတာကိုပယ်ဖျက်လိုက်ကြပါတယ် အခုတပါတ်မှာ စစ်ကောင်စီရဲ့ တရားသူကြီးတွေ ကျမ်းသစ္စာကျိန်ဆိုတာကိုဘယ်လိုပယ်ဖျက်ခဲ့ကြတယ်ဆိုတဲ့အကြောင်း ပြောပြပါမယ် ။


နေပြည်တော်မှာ ၂၀၂၆ခုနှစ်၊ဇန်နဝါရီလ ၅ရက်နေ့က မြန်မာ့တရားစီရင်ရေး မဏ္ဍိုင်အတွက် မှတ်တမ်းဖြစ်လာမယ့်အစည်းအဝေးတစ်ခုပြုလုပ်ခဲ့ပါတယ် ။အစည်းအဝေးခေါင်းစဉ်က ပြည်ထောင်စုတရားစီရင်ရေးဥပဒေကို ပဉ္စမအကြိမ် ပြင်ဆင်သည့်ဥပဒေ(မူကြမ်း)နှင့် စပ်လျဉ်းတဲ့ အပြီးသတ်ညှိနှိုင်းအစည်းအဝေးလို့ ခေါင်းစဉ်တပ်ထားကြပါတယ်။

တကယ်က ဒီအစည်းအဝေးမှာ စစ်အုပ်စုကို သစ္စာခံနေကြတဲ့ တရားသူကြီးတွေကို ခြောက်လှန့်နေတဲ့ ဥပဒေပုဒ်မတစ်ခုကို မြေလှန်ဖယ်ရှားပစ်ဖို့ကြိုးစားကြတာဖြစ်ပါတယ်။

ပြည်ထောင်စုတရားစီရင်ရေးဥပဒေပုဒ်မ ၂၃ ပုဒ်မခွဲ(ဂ) ပုဒ်မခွဲငယ်(၂)အရ တရားသူကြီးတွေက တရားခွင်မှာ ကျမ်းသစ္စာကျိန်ဆိုဖို့ မလိုတော့ဘူးလို့ ဇန်နဝါရီ ၅ ရက်နေ့ကအစည်းအဝေးမှာ ဆုံးဖြတ်လိုက်ကြတာပါ။

"တရားခွင်မှာအချိန်မလုံလောက်ဘူးဆိုတဲ့အကြောင်းပြချက်နဲ့ စက္ကန့်သုံးဆယ်တောင်မကြာတဲ့ ကျမ်းသစ္စာကျိန်ဆိုမှုကို ပယ်ဖျက်ဖို့လုပ်နေကြတယ်။သူတို့ကျမ်းမကိုင်ရဲတော့ဘူး။ ငါတို့လုပ်ချင်တာလုပ်တော့မယ်။ ကျမ်းမကိုင်တော့ဘူးလို့ ဆွေးနွေးနေကြပြီ "လို့နေပြည်တော်ကတရားရေးရပ်ဝန်းသတင်းရင်းမြစ်ကပြောပါတယ်။

ဒီကြိုးပမ်းချက်ဟာ မြန်မာနိုင်ငံမှာ တရားရေးမဏ္ဍိုင်ကြီး စုန်းစုန်းမြုပ်သွားမယ့်အန္တရာယ်ပဲလို့ ဥပဒေရေးရာကျွမ်းကျင်သူတွေက ‌ထောက်ပြသတိပေးနေကြပါတယ်။

အာဏာသိမ်းစစ်အုပ်စုအတွက်တက်ကြွစွာလုပ်ပေးနေကြတဲ့ တရားရေးဘက်ကရာထူးအကြီးဆုံးပုဂ္ဂိုလ်တွေရဲ့ဇန်နဝါရီလ ၅ရက်နေ့မှာ ကြိတ်လုပ်ခဲ့တဲ့ အစည်းအဝေးဟာ တရားခွင်ထဲက ကျမ်းသစ္စာကျိန်ဆိုမှုကို ဖျောက်ဖျက်ဖယ်ရှားပစ်ဖို့ ခြေလှမ်းအစဖြစ်ပါတယ်။အဲဒီနေ့ကနေပြည်တော်မှာရှိတဲ့ ဥပဒေရေးရာဝန်ကြီးဌာန အစည်းအဝေးခန်းမထဲကို ဥပဒေရေးရာဝန်ကြီးဌာန၊ပြည်ထောင်စုဝန်ကြီးလည်းဖြစ်ပြည်ထောင်စုရှေ့နေချုပ်လည်းဖြစ်တဲ့ ဒေါက်တာသီတာဦး၊ ဒုတိယဝန်ကြီးနဲ့ဒုတိယရှေ့နေချုပ် ဒေါက်တာထိန်လင်းဦး၊ ပြည်ထောင်စုတရားလွှတ်တော်ချုပ်တရားသူကြီး ဒေါ်သင်းသင်းနွဲ့၊ ပြည်ထောင်စုတရားလွှတ်တော်ချုပ်ရုံး အမြဲတမ်းအတွင်းဝန် ဦးအောင်မော်၊ဥပဒေမူကြမ်းစိစစ်ရေးဦးစီးဌာနညွှန်ကြားရေးမှူးချုပ် ဒေါက်တာကြည်ကြည်သန်းအောင်၊ ပြည်ထောင်စုတရားစီရင်ရေးကြီးကြပ်မှုရုံး ညွှန်ကြားရေးမှူးချုပ်ဒေါ်တင်နွယ်စိုးတို့မိနစ်ပိုင်းပဲခြားပြီး ဝင်လာကြပါတယ်။

သူတို့တစ်ဦးချင်းရဲ့မျက်နှာပေးတွေဟာ တစ်ခုခုကို စိုးရိမ်ထိတ်လန့်နေဟန်ပေါ်ပြီး တစ်ဦးနဲ့တစ်ဦး ဟန်လုပ်ပြုံးပြရုံကလွဲလို့ အစည်းအဝေးခန်းမဟာ တိတ်ဆိတ်နေခဲ့တယ်လို့ နေပြည်တော်အတွင်းစည်းထဲက တရားရေးဝန်ထမ်းတစ်ဦးက ပြောပါတယ်။ခန်းမထဲမှာလူပေါင်း၂၀ကျော်ရှိပြီးသူတို့ ၆ ဦးကပဲ အဓိက လိုတိုရှင်း ဆွေးနွေးသွားတာပါ။

တရားခွင်မှာ တရားသူကြီးတွေ ကျမ်းမကျိန်ဘဲ အမိန့်ချဖို့ လမ်းကြောင်းကိုပထမဆုံးနှပ်ကြောင်းပေးသူက ပြည်ထောင်စုတရားလွှတ်တော်ချုပ်တရားသူကြီး ဒေါ်သင်းသင်းနွဲ့ပါ။

သူကပြည်ထောင်စုတရားစီရင်ရေးဥပဒေပုဒ်မ ၂၃ ပုဒ်မခွဲ(ဂ) ပုဒ်မခွဲငယ်(၂)အရ တရားသူကြီးတွေဟာ နေ့စဉ်တရားခွင်စတက်အချိန်မှာတရားခွင်အတွင်း ကျမ်းသစ္စာ သို့မဟုတ် ကတိသစ္စာပြုနေရခြင်းကလက်တွေ့မှာမဖြစ်မနေမလိုအပ်တော့ဘူးလို့စတင်ဆွေးနွေးပါတယ်။

အကြောင်းပြချက်က တရားခွင်ထဲမှာကျမ်းသစ္စာသို့မဟုတ်ကတိသစ္စာပြုတာက နိုင်ငံတကာမှာလည်း သတ်မှတ်ထားမှုမရှိသလို တရားရုံးတွေက အမြဲတမ်းတည်ထောင် ထားတာဖြစ်လို့ နေ့စဉ်တရားခွင်တက်သည့်အချိန်မှာ ကျမ်းသစ္စာ သို့မဟုတ် ကတိသစ္စာပြုရမယ် ဆိုတဲ့ပြဋ္ဌာန်းချက်ကိုပယ်ဖျက်လိုက်ရင် တရားစီရင်ရေးဆိုင်ရာ နေ့စဉ်လုပ်ငန်းတွေကို လျင်မြန်စေမယ်လို့ အကြောင်းပြပါတယ်။ဒါ့ကြောင့် ပြည်ထောင်စုတရားစီရင်ရေးဥပဒေကို ပြင်ဆင်လိုတယ်လို့ဆွေးနွေးပါတယ်။

ဒေါ်သင်းသင်းနွဲ့ရဲ့ ဆွေးနွေးချက်ကို ဒေါ်သီတာဦးက မဆိုင်းမတွ ထောက်ခံ ဆွေးနွေးပါတယ်။

တရားသူကြီးတွေကို စတင်တာဝန်ပေးအပ်ချိန်မှာ ကျမ်းသစ္စာ သို့မဟုတ် ကတိသစ္စာပြုဖို့ပြည်ထောင်စု တရားစီရင်ရေးဥပဒေမှာ ပြဋ္ဌာန်းထားပြီးဖြစ်လို့ နေ့စဉ် တရားခွင်မှာ ကျမ်းသစ္စာ သို့မဟုတ် ကတိသစ္စာပြုဖို့ မလိုတော့ဘူးလို့ ဆိုပါတယ်။

"တရားသူကြီးတစ်ယောက်အတွက် အကြီးမားဆုံးသော ထောင်ချောက်ကတော့ သူကိုယ်တိုင် ဖန်တီးခဲ့တဲ့ မတရားမှုတွေနဲ့ ပြန်လည်ခြောက်လှန့်ခံရခြင်းပါပဲ" လို့ အငြိမ်းစားတရားသူကြီးတစ်ဦးက ပြောပါတယ်။

ကိုယ်တိုင်ပဲသိတဲ့ စိတ်ဒဏ်ရာကနေ လွတ်ရာလွတ်ကြောင်း အဖြေရှာလိုကြတဲ့ တရားသူကြီးတွေဟာ စစ်အာဏာရှင်ကို ကြောက်လန့်မှုတွေ၊လာဘ်လာဘမျှော်ကိုးမှုတွေနဲ့ စုံလုံးကန်းနေဆဲဖြစ်ပါတယ်။ ကိုယ့်အမှားကိုယ်မဆင်ခြင်ဘဲ တရားခွင်ထဲက ကျမ်းကျိန်ဆိုမှုကိုသာ ဖယ်ရှားဖို့လုပ်နေပါတယ်။

ဒီကြိုးပမ်းချက်ဟာ မြန်မာနိုင်ငံမှာတရားရေးစနစ်ကြီး စုန်းစုန်းမြုပ်သွားမယ့်အန္တရာယ်ပဲလို့ ဥပဒေရေးရာကျွမ်းကျင်သူကထောက်ပြပါတယ်။

ဥပဒေရေးရာကျွမ်းကျင်သူတစ်ဦးကတော့ ကျမ်းမကိုင်ရဲတော့တဲ့ တရားသူကြီးတွေရဲ့ အထက်ပါလုပ်ရပ်အပေါ် အခုလိုမှတ်ချက်ပြုလိုက်ပါတယ်။

"ဒါဟာ လူကဲ့ရဲ့ဖွယ်ရာသမိုင်းတွင်မယ့် အကြောင်းပြချက်တစ်ခုပါ။ ကျမ်းကျိမ်ခြင်းကိုပယ်ဖျက်ဖို့ကြိုးစားမှုဟာ လာဘ်ယူပိုလုပ်ဖို့၊အဂတိ လိုက်စားခြင်းပိုလုပ်ဖို့ ကြိုးစားအားထုတ်မှုပါဘဲ။" ငါတို့တရားသူကြီးတွေ လွတ်လပ်စွာ လာဘ်စားတော့မယ်ဟေ့” လို့ နိုင်ငံသိကြေညာလိုက်တာနဲ့ အတူတူပါပဲ" ။ ။

𝗣𝗲𝗼𝗽𝗹𝗲'𝘀 𝗦𝗽𝗿𝗶𝗻𝗴

#ludunwayoo #လူထုနွေဦး #PS #People*sSpring #myanmar #NewsMedia #media #politics #international #trending #new #update #info #newsfeed #dailynews #newsupdate #breakingnews #myanmarnews #updatenews #PSA