სერგეი შოიგუ: რუსეთი და სირია ალეპოს დაბომბვას რვა საათით შეაჩერებენ

რუსეთი და სირია ქალაქ ალეპოს დაბომბვას რვა საათით შეაჩერებენ. როგორც რუსეთის თავდაცვის მინისტრმა სერგეი შოიგუმ განაცხადა, აღნიშნული ზომა საჭიროა ე.წ. ჰუმანიტარული პაუზის შემოღებისთვის.

„ჰუმანიტარული პაუზა“, რომელიც გუშინ რუსეთის გენშტაბმა დააანონსა, 20 ოქტომბერს გამოცხადდება. ამ ინიციატივის ფარგლებში, ალეპოში მყოფი ბოევიკებისთვის ჰუმანიტარული დერეფნები გაიხსნება და მათ ქალაქის დატოვების საშუალება მიეცემათ.

დაგეგმილია ასევე, ალეპოდან სამოქალაქო პირების გაყვანა და დაჭრილთა ევაკუაცია. როგორც მოსალოდნელია, ჰუმანიტარული პაუზა 8 საათით გამოცხადდება,

თუმცა, გაერო-ში აცხადებენ, რომ ავიადარტყმების შეჩერება მეტი დროით არის საჭირო. „ჩვენ მივესალმებით ნებისმიერ პაუზას საბრძოლო მოქმედებებში, თუმცა დახმარების მისაწოდებლად უფრო ხანგრძლივი პაუზა არის საჭირო“, - განაცხადა გაერო-ს გენერალური მდივნის წარმომადგენელმა სტეფან დუჟარიკმა.