بنت هيتان الغجرية حسناء الجن المقهورة والغيورة

3 عصور وذات الجنية تسقط في نفس الاختبار
عشق وغيرة مدمرة من الجنية بنت هيتان الغجرية
قصة خيالية من كتابة وتأليف وتقديم محمد سعيد.
تدور احداث القصة في الزمن المعصر وزمن بناء قصر البارون والزمن المملوكي .
احداث مشوقة وساحرة تسافر بك لعالم ملئ بالاثارة السحر والحب والرعب والغرابة .
قصة حصرية على قناة حكايه خانة على اليوتيوب .
قناة اوديو ايجي سابقا audio eg
مقتطف من القصة :
اترمى سيف الدين في حضن امه وهو بيبكي وبيقولها نارهار طلعت عفريتة وهي اللي قتلت شهد .
مقدرتش امه تستوعب في البداية لكن سريعا اندفعت واتفتحت نوافذ وابواب البيت .
ومن بين ضباب وشرار نار ظهرت نارهار قدام سيف الدين وامه ،
وهي بتعتذر لسيف الدين وبتطلب منه انه يسامحها .
اتفزعت ام سيف ومقدرتش تحتمل وسقطت فاقدة الوعي .
بص سيف لأمه وهو في حالة من الهلع .
وظن ان نارهار قتلتها هي كمان .
وخرج من البيت مفزوع وركب فرسه وجري على بيت الشيخ زهران اللي كان ساكن في حي قريب .
وكان سيف عارف انه من اصحاب العلم والمعارف الغيبية .
وكان الناس بيلجأوا ليه في كتير من الامور ،
ابسط الناس كانوا بيروحولوا وكمان الاعيان والحكام .
صحى سيف الدين الشيخ زهران وحكى ليه بايجاز عن اللي حصل وعن العفريتة اللي خدعته واتجوزته .
فراح الشيخ مع سيف الدين لبيته ،
ولما دخلوا البيت لاقى سيف امه فاقت .
وكانت قاعدة بتبكي وعلى وشها الرعب على السرير جنب شهد اللي كانت في سكون تام وبتبدو انها خلاص فارقت الحياة .
وقالتله وهي صوتها بيترعش العفريتة هي اللي فوقتني وقالتلي اقولك ان هي منتظراك في بيتكم ،
وبتطلب انك تسامحها وترجعلها .
وتخلي الساحر اللي انت جايبه علشان يأذيها يمشي وميتدخلش .
والا هيكون غضبها عليا وعليك وعلى الساحر نفسه مالوش حد ومفيش شئ هيقف في وش غضبها او هيقدر يمنعه .
وقالتلي كمان اقولك انها بتقسم انها بتعشقك .
وعشقها ليك كان هو السبب في انها اخفت عنك حقيقتها وفي انها قتلت شهد علشان تبقى ليها لوحدها.
بص سيف الدين للشيخ زهران اللي كان بيسمع باهتمام ،
فقال الشيخ اطمنوا خير ان شاء الله مش هيكون الا كل خير ،
وبص الشيخ زهران لشهد بتأمل وقرب منها وحط منديله على
رقبتها .
وحط ايده فوق المنديل وقالهم بنتنا شهد بخير وباذن الله هتكون كويسة وهتقوم ،
شهد بتبدو انها مراة صالحة وصلاح الصالحين حصن ضد كيد الجن الفتاك مهما كانت قوته ،
هي صحيح اتأثرت بشدة بالسحر القوي .
لكن باذن الله هيتكتب ليها النجاة .
وطلب الشيخ زهران بعض الاعشاب .
وكانت من الاعشاب المنزلية المألوفة زي اليانسون والحلبة والبردقوش .
ونقعهم في مياة فضل يقرا عليها ايات وارقام وكلام تاني غريب ،
وطلب سكينة حادة ، وفي مكان اثار مخالب نارهار في رقبة شهد
عمل خدوش فاتفتحت الجروح من جديد وخرجت منها قطرات من الدم
وسكب زهران قطرات من المنقوع اللي حضره على الجروح .
فوقف الدم واترعشت شهد بقوة ،
فقالهم الشيخ اطمنوا هي ساعات وهتفوق ،
ولما تفوق لازم تشرب باقي المنقوع اللي حضرته وهترجع احسن من الاول .
قبل سيف الدين ايد الشيخ زهران وهو بيتمنى ان كلامه يكون صحيح وفعلا شهد تفوق وترجعله .
فقاله زهران تعالى معايا ووديني للبيت اللي الجنية منتظراك فيه .
بص سيف الدين بخوف للشيخ فابتسم وقاله اطمن .
راحوا للبيت وكانت نارهار مختفية لكن صوتها ظاهر ،
وقالت بصوت مدوي وليه صدى مرعب الظاهر انك مش مصدق اني مؤذية اكتر مما يتخيل عقلك علشان كده استخفيت بتهديدي يا ابن ارجون .
#قصص