ដំណាំឫស្សីទំពាំងផ្អែម ងាយដាំ ងាយថែទាំ និងងាយទទួលបានទិន្នផលខ្ពស់

ឫស្សីទំពាំងផ្អែម ជារុក្ខជាតិដំណាំបន្លែប្រភេទថ្មីមួយទៀតដែលកំពុងមានតម្រូវការទីផ្សារខ្ពស់ទាំងនៅក្នុងស្រុក និងនាំចេញទៅប្រទេសជិតខាង ហើយបានផ្តល់នូវចំណូលពីការដាំដុះច្រើនគួរសម និងមិនសូវពិបាកក្នុងការថែទាំនោះឡើយ។
លោក អ៊ឹង ទ្រី ជាម្ចាស់ចំការឫស្សីទំពាំងផ្អែមទន្លេបិទ ស្ថិតនៅខេត្តត្បូងឃ្មុំបានមានប្រសាសន៍ប្រាប់ AMS ឲ្យដឹងថា ទំពាំងផ្អែមនេះមានប្រភពមកពីក្រៅប្រទេស ដែលមានលក្ខណៈពិសេសម្យ៉ាង គឺមិនសូវហាង ឬមិនមានជាតិអាស៊ីតច្រើនដូចជាទំពាំងធម្មតា ឬទំពាំងក្នុងស្រុកនោះទេ។
លោកបានបន្តថា ៖ «ខ្ញុំបានចាប់ផ្ដើមដាំឫស្សីផ្អែមនេះជាង 3ឆ្នាំហើយនៅលើផ្ទៃដីប្រមាណ 3ហិចតា ដោយសារវាស្រួលដាំ ងាយស្រួលថែ និងឆាប់បានផល ហើយពេលលក់មានម៉ូយមកយកដល់ៗកន្លែង និងមានតម្លៃថ្លៃជាងទំពាំងធម្មតា»។
លោកបន្តថា ៖ «ឫស្សីផ្អែមនេះក្រៅពីអាចលក់ជាទំពាំង យើងក៏អាចទុកឱ្យធំលក់ជាឫស្សី ឬក៏ទុកផ្សាំលក់ជាកូនក៏បាន។ ចំពោះតម្លៃទំពាំងបើស្ថិតក្នុងរដូវប្រាំងអាចលក់បានចន្លោះ 6,000-7,000រៀលក្នុង1គីឡូក្រាម ចំណែកឯរដូវវស្សាមានតម្លៃ 2,000-3,000រៀលក្នុង1គីឡូក្រាមប៉ុណ្ណោះ ដោយសារមានទំពាំងព្រៃច្រើន។ ចំណែកឯកូនដែលបានផ្សាំទុកធ្វើពូជឫស្សីផ្អែមវិញគេត្រូវចំណាយពេលយូរជាងទំពាំង ហើយអាចលក់បានមួយដើមមានតម្លៃ 5,000 រៀល»។
ជាធម្មតាចំការរបស់លោក អ៊ឹង ទ្រី អាចប្រមូលផលទំពាំងបានប្រមាណ 300គីឡូក្រាមជារៀងរាល់ថ្ងៃលក់ឱ្យទៅឈ្មួញកណ្ដាលនៅភ្នំពេញ និងតាមបណ្តាខេត្តផ្សេងទៀត។ យ៉ាងណាក៏ដោយ លោកក៏បានប្រាប់ឲ្យដឹងផងថា ទំហំនៃទិន្នផលនេះពុំទាន់អាចផ្គត់ផ្គង់តម្រូវការរបស់អតិថិជនគ្រប់គ្រាន់នៅឡើយនោះទេ ហើយលោកក៏កំពុងតែពង្រីកផ្ទៃដីដាំដុះបន្ថែមទៀត។
ពាក់ព័ន្ធទៅនឹងបច្ចេកទេសនៃការដាំដុះ និងថែទាំ លោក អ៊ឹង ទ្រី បញ្ជាក់ថា សម្រាប់ការដាំដំណាំប្រភេទនេះគេត្រូវចំណាយពេលប្រមាណ 8ខែទើបទទួលបានទិន្នផលជាទំពាំង ដែលអាចកាត់លក់វិលជុំបណ្ដាក់គ្នាជាបន្តបន្ទាប់បាន។ លោកបន្តទៀតថា ទំពាំងអាចមានទម្ងន់ត្រឹម 700-800 ក្រាម(7-8ខាំ) នៅឆ្នាំដំបូង ហើយវានឹងកាន់តែធំល្អនៅឆ្នាំបន្ទាប់ មានន័យថាកាន់តែយូរវាកាន់តែបានផលច្រើន។
ចំពោះការដាំដុះគេអាចដាំបានពី 750-800គុម្ពលើទំហំដី1ហិចតា ដែលបងប្អូនប្រជាពលរដ្ឋអាចដាំបានជាជាងការទុកដីឱ្យទំនេរចោល។ វិធីដាំដំណាំនេះមាន3ប្រភេទផ្សេងៗគ្នាគឺ ទី1 វិធីផ្សាំកូន ទី2វិធីបំបៅ និងទី3គឺ គាស់គល់យកមកដាំតែម្ដង។ បន្ថែមពីលើនេះ វាក៏ងាយស្រួលក្នុងការដាំ និងថែទាំ មិនរើសប្រភេទដី ពោលគឺឱ្យតែមានទឹកគ្រប់គ្រាន់ និងជីធម្មជាតិជាជំនួយគឺជាការស្រេច។
ចំណែកឯកត្តាប្រឈមវិញ ម្ចាស់ចំការរូបនេះបានប្រាប់ថា ៖ «ផលលំបាកគឺអាចកើតមាននៅក្នុងររដូវប្រាំងបន្តិចប៉ុណ្ណោះ ដែលត្រូវការផ្គត់ផ្គង់ទឹកឱ្យបានគ្រប់គ្រាន់ដើម្បីអាចទទួលបានផលទំពាំងល្អសម្រាប់នាំចេញទៅកាន់ទីផ្សារ ហើយនៅក្នុងរដូវវស្សាគេពុំបាច់ស្រោចទឹកនោះទេ។ ដំណាំឫស្សីទំពាំងផ្អែមនេះមិនមានក្ដីបារម្ភទៅលើបញ្ហាសត្វល្អិតមកយាយីបំផ្លាញឡើយ គេគ្រាន់តែជ្រំដី ដាក់ជី ថែស្មៅ (កុំប្រើជីបាញ់សម្លាប់ស្មៅនាំឱ្យដើមឫស្សីរួញ) និងស្រោចទឹកជាប្រចាំ វានឹងលូតលាស់បានល្អ។ ដាំត្រឹមរយៈពេល3ខែ វានឹងចាប់ផ្តើមចេញទំពាំងលើកដំបូង»។
ចុងក្រោយ លោក ទ្រីក៏ចង់ឱ្យប្រជាពលរដ្ឋខ្មែរយល់ដឹងពីបច្ចេកទេសកសិកម្មឱ្យបានច្រើន ងាកមកដាំដំណាំដែលមានទីផ្សារពិសេសដំណាំឫស្សីផ្អែមនេះដែលផ្ដល់ផលច្រើន ងាយស្រួលដាំ និងមានទីផ្សារល្អ។ សម្រាប់អ្នកដែលចង់ដាំឫស្សីផ្អែមនេះ លោកក៏មានបង្ហោះវីដេអូបង្រៀនបច្ចេកទេសដាំ និងលក់ពូជនៅក្នុងផេកហ្វេសប៊ុក ចំការឫស្សី តាទំពាំងផ្អែម ទន្លេបិទ ផងដែរ៕
#AMS #AMSEconomy