《Yahoo電影》專訪｜《無名指》許恩怡遭郭富城批「你冇感動到我」成改進動力

由郭富城、許恩怡及鮑起靜主演的感動之作《無名指》，將肌肉萎縮症少女與照顧者家庭的故事帶到觀眾眼前。《無名指》是許恩怡初出茅廬時期之作，拍攝時經驗尚淺，在重要一場更被郭富城指：「我記得頭幾個take，Aaron話：『你冇感動到我』我即刻諗點算呀！」但她卻慶幸對方的坦誠讓她進步。此外她亦大讚郭富城有「爸爸感」，休息時即致電愛女，戲裡戲外都是個超級好爸爸！

《無名指》︱肌肉萎縮症由不治之症到重燃希望 腦神經科醫生講解治療發展︱Yahoo

借罕見病少女故事為導演自勉
《無名指》的女主角鄧辭年紀輕輕，卻患上肌肉萎縮症，雖然身體一日比一日差，但仍堅毅地面對生命。導演兼編劇孔令政（James）親自撰寫這個故事，目的原來是自勉：「好想搵個人物鼓勵吓自己，搵咗好耐就搵咗鄧辭出嚟，佢充滿生命力，即使面對罕見病充滿掙扎，但面對低潮比一般人更堅強。好想用佢鼓勵自己繼續行落去，所以就拍咗罕見病少女嘅故事。」

這除了是罕見病少女的故事，同時亦是家人照顧者之故事。戲中不論是爸爸郭富城，還是嫲嫲鮑起靜，心路歷程同樣動人，孔令政：「仲有長期病患嘅屋企人，好似好少作品會講照顧者嘅故事、為佢哋發聲。想借呢套戲向觀眾講，唔好咁容易去批判照顧者，佢哋唔係完美，可能會做錯事，但我哋唔係佢，未必明白嗰種天跌落嚟嘅責任。」

許恩怡未拍先哭，媽媽柏安妮亦有助攻建議
最終鄧辭這重要一角，落在新晉演員許恩怡（Natalie）身上。回想導演當年首見對方，Natalie只有17歲，亦從未在香港拍過任何作品，孔令政：「我好早已經定咗郭富城飾演呢個爸爸，但我要搵佢個女嘅時候，我就發現難度極高，好難搵到一個咁嘅演員。後來就搵咗Natalie出嚟飲嘢，都唔係正式試鏡，嗰時佢得17歲。佢一嚟到，嗰種輻射咁嘅能量已經令我醒咗！之後我冇講晒成個故事，純粹將最後天星碼頭食雪糕一幕解釋畀佢聽，Natalie嘅眼淚已經收唔到，咁短時間已經代入到鄧辭嘅角色。」此時許恩怡驚呼：「我都唔記得咗！」但原來這已令導演留下深刻印象，到開拍即邀請對方演出此角。

得到角色後，許恩怡自己都做足功課，除了跟肌肉萎縮症病人見面了解心態，還要分析劇本。由於拍攝並非順時序，所以她亦要隨時演繹不同身體狀態：「我要睇劇本睇到好熟，因為佢嘅狀態會越嚟越沉，加上我哋唔係順住次序拍！我記得自己將劇本分成三四個部分，頭部分狀態最好，之後講兩句說話會喘氣，到後來咬字都唔清楚。媽媽都有建議我睇《My Left Foot》（無悔今生）。」導演James：「呢個都係對罕見病患者嘅一種尊重，一定要跟現實去走。」

郭富城有「爸爸感」常致電愛女，點評許恩怡成進步激勵
至於戲中爸爸鄧叔彥一角，導演早已敲定由郭富城演出，並指對方成為父親後，是最佳的時候去演出此角：「鄧叔彥嘅氣質好難拿捏，要一個好有人生閱歷嘅演員，要經歷好多事先可以好從容咁喺鏡頭面前表現。加上Aaron係個爸爸，年紀都好適合演呢個角色，呢個時機都好完美。」

問到Natalie的感受，她就大讚郭富城的「爸爸感」來自現實中對愛女的態度：「佢成日會講起佢啲女，如果有長嘅休息時間，佢都會即刻打畀佢哋，就算講緊好曳，佢都會笑住嚟講！」入行以來，幾位影帝劉德華、吳慷仁與今次的郭富城都演過她爸爸：「我覺得各有各爸爸嘅感覺，但畢竟《無名指》係同Aaron時間最長，所以感受會再深少少。（導演：每一場戲都係佢兩個）無錯！又係你！哈哈！」

雖然劇情大多較沉重，但偶然機會下，Natalie都發現到郭富城的幽默感！「佢嘅幽默感都好厲害，我哋拍攝嘅時候會用個app收音，開始嘅時候會叮叮聲。我聽到嘅時候會想跳舞，但同自己講喺Aaron隔離要忍住！唔好咁幼稚！但我諗多咗，原來佢都會（跳舞）！」

最後講到難忘的一場，許恩怡表示是跟郭富城在圖書館內交心一幕。但原來這一幕都令許恩怡感壓力，甚至被郭富城直接道出問題！「我記得頭幾個take，Aaron話：『你冇感動到我』我即刻諗點算呀！但我又好感恩佢同我講，其實代表到佢想要真實嘅反應，佢想靠我嘅台詞，令佢嘅情緒自然出到嚟。佢就同我換個方式講對白，最後（語氣）係輕少少咁講出嚟，佢嘅情緒都出嚟。我諗觀眾都睇到係真反應定設計出嚟嘅反應。」感恩有前輩的坦誠，Natalie才能與對方共演出這部動人之作，感動觀眾。

採訪：何德
許恩怡
Hair Stylist: Sev Tsang @ Hair Culture
Hair Assistant: Candace Vo @ Hair Culture
Makeup: Omix
Venue: Lubuds Group FWD House 1881
*******************

▶【影迷注意】Yahoo電影專欄現正上架！緊貼最新電影動向，安排周末睇戲娛樂！https://bit.ly/3wlSVNK

#郭富城 #許恩怡 #無名指 #Yahoo電影 #YAHOOTVHK