សង្ខេបព័ត៌មានជាតិសំខាន់ៗ ប្រចាំថ្ងៃទី២៧ ខែវិច្ឆិកា ឆ្នាំ២០២៥

---
១. សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានប្រតិកម្មឆ្លើយតបទៅនឹងការនិយាយមិនពិតរបស់លោក អ៊ុំ សំអាន ពាក់ព័ន្ធនឹងបញ្ហាបោះបង្គោលព្រំដែន។ ដោយមើលឃើញថា បុគ្គល អ៊ុំ សំអាននេះនិយាយដោយគ្មានមូលដ្ឋានចំណេះដឹងខាងបញ្ហាព្រំដែន សម្តេចធិបតី បានផ្តាំទៅលោក អ៊ុំ សំអាន និងបក្ខពួកថា បើមិនយល់ច្បាស់ពីកិច្ចការព្រំដែន ឬការប្រើប្រាស់ផែនទីទេ សូមកុំខ្លាចអន់អី អាចស្នើសុំមន្រ្តីជំនាញរបស់រាជរដ្ឋាភិបាលកម្ពុជា ឱ្យជួយបង្រៀន និងពន្យល់បាន។ ប្រតិកម្មរបស់សម្តេចធិបតី គឺបន្ទាប់ពីលោក អ៊ុំ សំអាន នៅព្រឹកថ្ងៃព្រហស្បតិ៍នេះ បានបង្ហោះសារហ្វេសប៊ុករបស់ខ្លួនដែលខ្លឹមសារថា ព្រំដែនចាស់ Pong Nam Ron និងស្រុកកំរៀង ខេត្តបាត់ដំបង មិនមែនស្ថិតនៅព្រំដែនបច្ចុប្បន្ននេះទេ ដោយលើកយកឈ្មោះ ឧត្ដមសេនីយ៍ អ៊ី ឈាន ទេសរដ្ឋមន្ត្រី និងជាអតីតអភិបាលខេត្តប៉ៃលិន មកជាអំណះអំណាង ហើយបានបន្ដថា ឥឡូវនេះ កម្ពុជាទទួលស្គាល់ព្រំដែនថ្មី គឺធ្វើឱ្យបាត់បង់ទឹកដីខ្មែរជាច្រើនគីឡូម៉ែត្រការ៉េនៅតំបន់នោះ។ តាមសម្តេចធិបតី រហូតមកដល់ពេលនេះ អ្វីដែលលោក អ៊ុំ សំអាន និយាយពាក់ព័ន្ធនឹងកិច្ចការព្រំដែនហាក់ដូចជាគ្មានអ្វីច្បាស់លាស់ អាចយកជាការបានទាំងមូលដ្ឋានបច្ចេកទេសផែនទី និងទាំងមូលដ្ឋានច្បាប់ ឬឯកសារយោងនានា។
ប្រភព៖ សម្ដេចធិបតី ហ៊ុន ម៉ាណែត (https://www.facebook.com/permalink.ph...)

២. នាយឧត្ដមសេនីយ៍ អ៊ី ឈាន ទេសរដ្ឋមន្ត្រី និងជាអតីតអភិបាលខេត្តប៉ៃលិន បានបដិសេដចំពោះអ្វីដែលបុគ្គល អ៊ុំ សំអាន បានផ្សព្វផ្សាយលើបណ្ដាញសង្គមពាក់ព័ន្ធនឹងបញ្ហាបោះបង្គោលព្រំដែន។ នាយឧត្ដមសេនីយ៍ អ៊ី ឈាន អះអាងថា បុគ្គល អ៊ុំ សំអាន បានយកឈ្មោះលោក ទៅប្រឌិតរឿងពាក់ព័ន្ធនឹងបញ្ហាព្រំដែន ក្នុងចេតនាញុះញង់ កេងចំណេញនយោបាយ បង្កចលាចលសង្គម និងធ្វើឱ្យពលរដ្ឋយល់ច្រឡំមកលើរាជរដ្ឋាភិបាល និងគណៈកម្មការចម្រុះខណ្ឌសីមាព្រំដែនគោក(JBC) កម្ពុជា ដែលកំពុងវាស់វែងបោះបង្គោលព្រំដែន តាមឯកសារដែលបន្សល់ទុកពីអាណាព្យាបាលបារាំង និងច្បាប់អន្តរជាតិ។
ប្រភព៖ ឧត្ដមសេនីយ៍ អ៊ី ឈាន (  / pfbid0zxjntbuhummpbtrsrhaejwnpzvdpbfz4pwl9...  )

៣. ឧត្តមសេនីយ៍ត្រី អេង ហ៊ី ស្នងការ ស្នងការដ្ឋានទំនាក់ទំនងកិច្ចការសាធារណៈ កងរាជអាវុធហត្ថលើផ្ទៃប្រទេស បានប្រកាសថ្កោលទោសយ៉ាងដាច់អហង្ការ ចំពោះសម្តីជេរប្រមាថមកលើបុគ្គល និងអង្គភាពកងរាជអាវុធហត្ថ ពីលោក ផែង វណ្ណៈ តាមផេក «Pheng Vannak News » កាលពីយប់ថ្ងៃទី២៦ ខែវិច្ឆិកា ឆ្នាំ២០២៥។ ឧត្តមសេនីយ៍ត្រី អេង ហ៊ី បានគូសបញ្ជាក់ថា កងរាជអាវុធហត្ថ ទទួលខុសត្រូវរាល់សកម្មភាពក្នុងការអនុវត្តតួនាទី, ភារកិច្ចរបស់ខ្លួន។ ប្រសិនបើប្រព្រឹត្តអំពើល្មើសច្បាប់នឹងទទួលទោសចំពោះមុខច្បាប់, ប្រសិនបើប្រព្រឹត្តខុសវិន័យកងទ័ពនឹងទទួលវិន័យទណ្ឌកម្ម។ តាមញត្តិថ្កោសទោសនេះដដែល, ឧត្តមសេនីយ៍ត្រី អេង ហ៊ី បានសុំឱ្យលោក ផែង វណ្ណៈ ធ្វើការបកស្រាយ និងបង្ហាញភស្តុតាងជាសាធារណៈចំពោះពាក្យសម្តីដែលបានផ្សព្វផ្សាយនិងការជេរប្រមាថមកលើកងរាជអាវុធហត្ថ៕
ប្រភព៖ ឧត្តមសេនីយ៍ត្រី អេង ហ៊ី (  / 17koegpzny  )

៤. ក្រសួងការបរទេសកម្ពុជា បញ្ជាក់សាជាថ្មីអំពីការប្រកាន់ខ្ជាប់នូវ «គោលនយោបាយចិនមួយ» ក្រោយមានការចោទសួរពីប្រព័ន្ធផ្សព្វផ្សាយមួយចំនួនទាក់ទងនឹងទស្សនៈរបស់កម្ពុជា ស្តីពីភាពតានតឹងនាពេលថ្មីៗនេះរវាងប្រទេសជប៉ុន និងចិន ជុំវិញបញ្ហាតៃវ៉ាន់។ នេះបើតាមសេចក្ដីថ្លែងការណ៍របស់អ្នកនាំពាក្យ នៃក្រសួងការបរទេសកម្ពុជា កាលពីថ្ងៃទី២៦ ខែវិច្ឆិកា ឆ្នាំ២០២៥។ តាមអ្នកនាំពាក្យក្រសួងការបរទេសកម្ពុជា កម្ពុជា ចាត់ទុកបញ្ហាដែលទាក់ទងនឹងតៃវ៉ាន់ជាកិច្ចការផ្ទៃក្នុងនៃសាធារណរដ្ឋប្រជាមានិតចិន ព្រមទាំងគាំទ្រកិច្ចខិតខំប្រឹងប្រែងរបស់ចិនដើម្បីសម្រេចបាននូវការបង្រួបបង្រួមជាតិ និងប្រឆាំង នឹង «ឯករាជ្យតៃវ៉ាន់» គ្រប់ទម្រង់។ បន្ថែមពីនេះ កម្ពុជាគាំទ្រចំពោះកិច្ចប្រឹងប្រែង នានាក្នុងការរក្សាសន្តិភាព ក្នុងតំបន់ ដោយផ្អែកលើគោលការណ៍ នៃការគោរពគ្នាទៅវិញទៅមក និងការដោះស្រាយទំនាស់ដោយសន្តិវិធី។
ប្រភព៖ ក្រសួងការបរទេសកម្ពុជា (  / pfbid02rmkcwzszdefxcbwavxtyuknaq6aphyjmqur...  )

Facebook:   / preah.khan.khmer  
Telegram: https://t.me/preah_khan
TikTok:   / preah_khan