Beýik Saparmyrat Türkmenbaşy - Ýürekdeş

Dünýäden nesibäň göterlen güni
Dosty-ýar kän,
Hossar kän toýyň toýlajak,
Al-şerap aýlajak,
Al-şerap içjek!
Emma gerdeniňe alyp ýüküňi,
Hany, seniň jiger derdiň çekişjek?!

Mydam depesinde göterip ýörmän,
Günleň biri bulap urýar keç pelek.
Ine, şonda paýlaşmaga derdiňi
Jigerdeş,
Bagyrdaş,
Ýürekdeş gerek!

...Gursakdaky derdim geçende çenden,
Men daglara gidip,
Derdimi aýtdym.
Daglar meni göterdi al-asmana,
Men daglardan
Dag deý
Beýgelip gaýtdym!

Ýürekde hesretim edende heläk,
Beýewana baryp aýtdym men derdim.
Hydyr gören çöller ruhum täzeläp,
Berdi maňa dünýä ýaly giňligin.

Üýşüp-çaşyp toý meýlisler sowylýar,
Emma derdiň ýeke çeken ýagşydyr.
Gussaň bölüşmäge dertdeş bolmasa,
Baş alyp
Daglara çykan ýagşydyr!

Bu dünýäniň syry kändir darydan,
Hoş günüňde tanap bolmaz päk dostyň.
Mydam saňa tanap berer Ýaradan
Agyr günde dert çekişjek hak dostuň.