အလင်္ကာပုလဲပန်း ချန်နယ်အသစ်ဖွင့်လိုက်ပြီ

အလင်္ကာပုလဲပန်း ချန်နယ်အသစ်ဖွင့်လိုက်ပြီ
_____________________________

အလင်္ကာပုလဲပန်းချန်နယ်သစ်ကို TM Media ကထပ်မံဖွင့်လိုက်ပါတယ်။ အလင်္ကာပုလဲပန်းဆိုတာက မြန်မာစာ၊ မြန်မာစကားရဲ့ ဝေါဟာရရင်းမြစ်ရယ်၊ စာပေရသတွေရယ်ကို တင်ပြနေတဲ့ မြန်မာစာအကြောင်း အစီအစဉ်တွေပါ။ ဒီအစီအစဉ်တွေကို ကျနော်ဘီဘီစီမှာ ရှိစဉ်ကတည်းကဖန်တီးခဲ့တာဖြစ်ပြီး ပရိသတ်အားပေးထောက်ခံမှု တောင်းဆိုမှုအများအပြားရှိတဲ့အစီအစဉ်တွေလည်း ဖြစ်ပါတယ်။

သံဃာတွေတောင် ပုံမှန်နားထောင်တာ၊ အားပေးတာ၊ မေးခွန်းပို့မေးမြန်းတာတွေရှိခဲ့ပါတယ်။ ဘာ့ကြောင့်လဲဆိုတော့ သံဃာတွေရဲ့ ဘာသာရေးစာမေးပွဲတွေမှာတောင် အလင်္ကာပုလဲပန်းထဲက အကြောင်းအရာတွေကို မေးခွန်းထဲထည့်သွင်းမေးမြန်းတာတွေရှိခဲ့လို့ပါ။ အရင်ကတော့ မေးခွန်းတချို့ကိုတောင် ကျနော်သိမ်းထားဖူးပါတယ်။

လူပရိသတ်တွေကလည်း ကျောင်းသား၊ ကျောင်းဆရာ၊ စာပေသမားအစုံအလင်ပါဝင်ကြပါတယ်။ အဲသလိုလူနဲ့သံဃာအများရဲ့တောင်းဆိုချက်ကြောင့် ချန်နယ်အသစ်ဖွင့်လိုက်တာပါ။ ဒါပေမဲ့ အခုချန်နယ်အသစ်ဖွင့်လိုက်ချိန်မှာ ကြည့်ရှုသူနားထောင်သူဟာ ဘီဘီစီမှာတုန်းကထက်တော်တော်ကြီးကို နည်းလွန်းနေပါတယ်။ အကြောင်းရင်းကတော့ ကျနော့်ချန်နယ်က အသစ်ဖြစ်နေပြီး လူအများဆီမရောက်သေးလို့ကြည့်သူနည်းနေသေးတာလို့ သဘောပေါက်မိပါတယ်။ ဒီအကြောင်းအရာတွေဟာ မြန်မာစာ၊ မြန်မာစကားကို အသုံးပြုနေတဲ့သူတိုင်းအတွက် သိပ်အဖိုးတန်တဲ့အကြောင်းအရာတွေမို့လို့ နိုင်ငံရေးသုံးသပ်ချက်ကြည့်နေကြတဲ့ ပရိသတ်တွေပါလာကြည့်ကြဖို့ဖိတ်ခေါ်ပါရစေခင်ဗျာ။

သိပ်အဖိုးတန်တဲ့အကြောင်းအရာတွေဆိုတာဟာ ကိုယ့်ကိုယ်ကိုယ် အထင်ကြီးပြီး အမွှန်းတင်နေတယ်လို့ မထင်စေလိုပါဘူး။ အကြောင်းအရာအားလုံးလိုလိုဟာ ကျနော့် တဦးတည်းအမြင် တဦးတည်းသဘောထားနဲ့ ပြောဆိုနေတာတွေမဟုတ်ပါဘူး။ ဆရာကြီးများကို မေးမြန်းပြီး ပြန်လည်မျှဝေတင်ဆက်ပေးနေတာပါ။

ဆရာကြီးများဆိုတဲ့အထဲမှာ မြန်မာစာသတ်ပုံကျမ်းကို အဓိကဦးဆောင်ပြုစုတဲ့သူဖြစ်သလို မြန်မာအဘိဓာန်ပြုစုရေးမှာလည်း ခေါင်းဆောင်တွေထဲက တယောက်ဖြစ်တဲ့ ဆရာဦးထွန်းတင့်၊ အမေရိကန်ပြည်ထောင်စု အီလီနွိုင်းတက္ကသိုလ်က အငြိမ်းစားမြန်မာစာပါမောက္ခဆရာဦးစောထွန်း၊ ဘာသာဗေဒကိုအထူးလေ့လာကျွမ်းကျင်သူတယောက်ဖြစ်တဲ့ ဆရာဦးသာနိုး၊ ကဗျာဆရာကိုလေးအင်းဝဂုဏ်ရည်၊ ဂုဏ်ထူးဦးသိန်းနိုင်၊ လှတောစကားတွေကို ပြုစုတဲ့ ဆရာအောင်နိုင်မန်းတက္ကသိုလ်၊ ကဗျာဆရာဦးအံ့မောင် ၊ ရခိုင်သုတေသီပါမောက္ခဒေါက်တာအေးကျော် စတဲ့သူတွေအပြင် တခြားကျွမ်းကျင်သူပညာရှင်တွေလည်းပါဝင်ကြပါတယ်။

ကျနော့်မြန်မာစာဝေါဟာရ ရင်းမြစ်တွေအကြောင်းပြောထားတာကို နားထောင်ပြီး တချို့ကသတ်ပုံအကြောင်းပြောနေတာလို့ထင်တတ်ကြပါတယ်။ သတ်ပုံအကြောင်းလည်း ဟုတ်သင့်သလောက်ဟုတ်ပေမဲ့ အဲဒီထက် လေးနက်ပါတယ်။ ကျနော်တို့ပြောနေတဲ့ မြန်မာစကားလုံးတလုံးဟာ ဘယ်လို အနက်အဓိပ္ပာယ်ရှိသလဲ။ မူရင်းက ဘာလဲ။ ဘာ့ကြောင့် ဒီလိုစာလုံးပေါင်းနေတာလဲဆိုတာကို ရှင်းပြနေတာပါ။ သတ်ပုံဆိုတာ အရင်ကဒီလိုပေါင်းလို့ အခုလည်း ဒီလိုပေါင်းရတယ်ဆိုတာမျိုးမဟုတ်ပါဘူး။ ဘာ့ကြောင့်ဒီလိုစာလုံးပေါင်းရတယ်ဆိုတဲ့ အကြောင်းရင်းရှိပါတယ်။ အဲဒါကိုသိဖို့အရေးကြီးပါတယ်။ အဲဒါမှ ကိုယ့်စကားကိုယ့်စာပေကိုနားလည်နိုင်မှာပါ။

ဒီနေ့ခေတ်မှာ မီဒီယာအားလုံးလိုလိုဟာ နိုင်ငံတွေ အဖွဲ့အစည်းတွေရဲ့ ဘဏ္ဍာရေးထောက်ပံ့မှုနဲ့ ရပ်တည်နေကြပါတယ်။ တချို့ဆိုရင် စစ်အုပ်စုရဲ့ထောက်ပံ့ကြေးရယူနေကြတာလည်းရှိပါတယ်။ တချို့လည်း NUG ကထောက်ပံ့တာကို အတန်အသင့်ရကြတယ်လို့ ကြားမိပါတယ်။ ကျနော်တို့ TM Media ဟာအခုထက်ထိ ဘယ်ကထောက်ပံ့ကြေးမှ ရယူထားတာမရှိသေးပါဘူး။ ယူတဲ့လူတွေကို ကျနော်အပြစ်တင်နေတာမဟုတ်ပါဘူး။ ကျနော်တို့ကိုယ်တိုင်လည်း ကြာကြာတောင့်ခံနိုင်ဖို့မသေချာပါဘူး။ ဒါပေမဲ့ တတ်နိုင်သမျှ အချိန်ကြာကြာ လွတ်လပ်အမှီခိုကင်းချင်တဲ့ဆန္ဒရှိတဲ့အတွက် ဘယ်သူ့လှူဒါန်းငွေအပေါ်မှာမှ မှီခိုအားထားနေတာမျိုးမဟုတ်ဘဲ ကိုယ့်ဝင်ငွေနဲ့ကိုယ်ရပ်တည်နိုင်ဖို့ ကြိုးစားနေပါတယ်။ ပြည်သူလူထုရဲ့ထောက်ပံ့မှုနဲ့ရပ်တည်ဖို့ကြိုးစားနေပါတယ်။

အဲဒီအတွက် ခက်ခဲပါတယ်။ ပင်ပန်းပါတယ်။ ကျနော့်ကိုဘယ်လိုနည်းနဲ့ ငွေလှူဒါန်းရမလဲဆိုပြီး လာမေးကြသူတွေလည်း တော်တော်များများရှိပါတယ်။ ငွေမလှူနိုင်ရင်တောင်မှ ကျနော့်ကို ကူညီရာလည်း ရောက်ပြီး ကိုယ်နဲ့ကိုယ်ရဲ့အသိုင်းအဝိုင်းအတွက်လည်း အကျိုးရှိအောင် ကိုယ်နဲ့နီးစပ်သူတွေ အလင်္ကာပုလဲပန်း ချန်နယ်ကို subscribe လုပ်ကြဖို့ ကြည့်ရှုကြဖို့ တိုက်တွန်းပေးကြပါလို့ ပန်ကြားပါတယ်။ မြန်မာစကားပြောသူတွေအတွက် အမှန်တကယ်တန်ဖိုးလည်းရှိ အကျိုးလည်းရှိပြီး သိသင့်သိထိုက်တဲ့အရာအများအပြားကို အလင်္ကာပုလဲပန်းမှာတင်ပေးနေတယ်ဆိုတာကို လာပြီးကြည့်ရှုနားထောင်ရင်သဘောပေါက်သွားကြပါလိမ့်မယ်။

ချန်နယ်ရဲ့လိပ်စာက    / @alinkarbur   ဖြစ်ပါတယ်။ အောက်မှာလည်း လင့်ချပေးထားပါမယ်။

အားလုံးကိုကျေးဇူးတင်ပါတယ်ခင်ဗျာ။