Mustafa S. Kaçalin, Kutadgu Bilig Okumaları, 10. Seminer

anıŋ tört ėşi ol awınġu körüp || kėŋeşçi bular erdi birle turup
0050. ėki ḳaḏın erdi küḏegü ėki || bular erdi üḏrüm boḏunda yėgi
0051. ʿati̇̄ḳ erdi aşnu ḳamuġda oza || bayatḳa bütügli köŋül til tüze
0052. yuluġ ḳıldı mālı teni cānını || yalawaç sewinçi tiledi köni
0053. basa fārūḳ erdi kişi üḏrümi || tili köŋli bir teg boḏun köḏrümi
0054. bu erdi basutçı köni di̇̄nḳa kök || şeri̇̄ʿat yüzindin kiterdi eşük
0055. basa ʿutmān erdi uwutluġ silig || kişide üḏürmiş aḳı kėŋ elig
F 17 0056. fidā ḳıldı barın neŋin hem özin || yalawaç angar bėrdi ėki ḳızın
0057. ʿali̇̄ erdi munda basaḳı talu || kür ersig yüreklig meŋesi tolu
K 16 0058. aḳı erdi elgi yüreki teḏük || biliglig saḳınuḳ kör atı beḏük
0059. bular erdi di̇̄n hem şeri̇̄ʿat köki || bular yüḏti kāfir munāfıḳ yüki
0060. bu tört ėş maŋa tört tadu teg—turur || tüzülse tadu çın tiriglik bolur
0061. meniŋdin bularḳa üküş miŋ selām || tegürgil iḏim sen kesüksüz ulam
0062. olarnı meniŋdin sewindür tuçı || uluġ künde ḳılġıl elig tuttaçı
04. [bāb] yaruḳ yaz faṣlın uluġ buġra—ḫan ögdisin ayur
0063. tuġardın ese keldi öŋdün yėli || ajun itgüke açtı uştmaḫ yolı
0064. yaġız yėr yıpar toldı kāfūr kėtip || bezenmek tiler dünyā körkin ėtip
0065. ėrinçig ḳışıġ sürdi yazḳı esin || yaruḳ yaz yana ḳurdı davlat yasın
0066. yaşıḳ yandı bolġay yana ornıŋa || balıḳ ḳudruḳındın ḳozı burnıŋa
H 14 0067. ḳurımış yıġaçlar tonandı yaşıl || bezendi yipün al sarıġ kök ḳızıl
0068. yaġız yėr yaşıl torḳu yüzke badı || ḫıtay arḳışı yadtı tawġaç eḏi
0069. yazı taġ ḳır oprı töşendi yaḏıp || ėtindi ḳolı ḳaşı kök al keḏip
0070. tümen tü çėçekler yazıldı küle || yıpar toldı kāfūr ajun yıḏ bile
0071. ṣabā yėli ḳoptı ḳaranfil yıḏın || ajun barça bütrü yıpar burdı kin
0072. ḳaz ördek ḳuġu ḳıl ḳalıḳıġ tudı || ḳaḳılayu ḳaynar yoḳaru ḳoḏı
K - 0073. ḳayusı ḳopar kör ḳayusı ḳonar || ḳayusı çapar kör ḳayu suw içer
0074. kökiş turna kökte ünün yaŋḳular || tizilmiş titir teg uçar yėlgürer
0075. ular ḳuş ünin tüzdi ünder ėşin || silig ḳız oḳır teg köŋül bėrmişin
0076. ünin ötti keklik küler ḳatġura || ḳızıl aġzı ḳan teg ḳaşı ḳap ḳara
0077. ḳara—çumġuḳ ötti sata tumşuḳın || üni oġlaġu ḳız üni teg yaḳın
0078. çėçeklikte sandwaç öter miŋ ünün || oḳır ṣūrı—ʿibri̇̄ tünün hem künün
0079. elik külmiz oynar çėçekler üze || sıġun muyġaḳ aġnar yorır tėp keze
0080. ḳalıḳ ḳaşı tügdi közi yaş saçar || çėçek yazdı yüz kör küler ḳatġurar
0081. bu üḏte ajun öz öziŋe baḳıp || küwenip sewinip eḏiŋe baḳıp
0082. ėletü maŋa açtı dünyā sözin || ayu körmediŋ mü bu ḫaḳan yüzin